Papdi Lilva Nu Shaak Recipe: પાપડી-લીલવાનું શાક ગુજરાતના લગભગ દરેક ઘરમાં પસંદ કરવામાં આવે છે. પાપડી, લીલવા, લીલા લસણ અને મસાલાના સ્વાદથી ભરપૂર આ શાક રોટલી, ભાખરી કે પરાઠા સાથે ખૂબ જ ટેસ્ટી લાગે છે. જો તમે રોજના શાકથી કંઈક અલગ બનાવવાનું વિચારી રહ્યા હોવ તો પાપડી-લીલવાનું શાક એક ઉત્તમ વિકલ્પ બની શકે છે. ચાલો જાણીએ તેને બનાવવાની સરળ રીત.
પાપડી-લીલવાનું શાક બનાવવાની સામગ્રી
- 250 ગ્રામ પાપડી
- 1 કપ લીલવા
- 3 ચમચી તેલ
- 1 ચમચી અજમો
- ચપટી હિંગ
- 1 ચમચી આદુ-મરચાંની પેસ્ટ
- 1/2 કપ લીલું લસણ ઝીણું સમારેલું
- 1/2 કપ કોથમીર
- 1 ચમચી ધાણા-જીરું પાઉડર
- 1/4 ચમચી હળદર
- 1 ચમચી ખાંડ
- 1 ચમચી લીંબુનો રસ
- મીઠું સ્વાદ મુજબ
- જરૂર મુજબ પાણી
પાપડી-લીલવાનું શાક બનાવવાની રીત
સૌપ્રથમ પાપડીને સારી રીતે ધોઈ તેના તાંતણા કાઢી લો અને નાના ટુકડામાં કાપી લો. લીલવાને પણ સાફ કરીને તૈયાર રાખો. હવે કૂકરમાં પાપડી અને લીલવા સાથે થોડું મીઠું અને જરૂરી પાણી ઉમેરી 2 થી 3 સીટી સુધી બાફી લો.
ત્યારબાદ એક કડાઈમાં તેલ ગરમ કરો. તેમાં અજમો અને હિંગનો વઘાર કરો. હવે આદુ-મરચાંની પેસ્ટ ઉમેરી થોડું સાંતળો. પછી લીલું લસણ અને કોથમીર ઉમેરી સુગંધ આવે ત્યાં સુધી હલાવતા રહો. હવે તેમાં ધાણા-જીરું પાઉડર, હળદર અને મીઠું ઉમેરી મિક્સ કરો. ત્યારબાદ બાફેલા પાપડી અને લીલવા ઉમેરી બધી સામગ્રીને સારી રીતે ભેળવી લો. જરૂર લાગે તો થોડું પાણી ઉમેરી શકો છો.
શાકને 5 થી 7 મિનિટ ધીમા તાપે ચઢવા દો. અંતે ખાંડ અને લીંબુનો રસ ઉમેરી એકવાર હલાવી લો. ઉપરથી કોથમીર ભભરાવી ગરમાગરમ સર્વ કરો.
ટિપ્સ
- લીલા લસણનો ઉપયોગ કરવાથી શાકનો સ્વાદ વધુ સરસ બને છે.
- વધુ ટેસ્ટ માટે ઉપરથી થોડું તાજું ખમણેલું કોપરું ઉમેરી શકાય.
- શાકને વધારે ચઢાવવું નહીં, નહીં તો પાપડીનો કુદરતી સ્વાદ ઓછો થઈ શકે.