Ginger Tulsi Tea Recipe: ચોમાસાની ઋતુ પૂરી થવા લાગે ત્યારે હવામાનમાં ધીમે-ધીમે ઠંડક વધવા લાગે છે. આવા સમયે ગરમાગરમ ચાનો કપ પીવાની મજા જ અલગ હોય છે. જો સામાન્ય ચાથી કંઈક અલગ અને સુગંધિત ચા પીવી હોય તો આદુ-તુલસીની ગરમ ચા બનાવી શકાય. આ ચા બનાવવામાં ખૂબ જ સરળ છે અને તેમાં આદુની ગરમાશ સાથે તુલસીની સુગંધ પણ મળે છે.
આદુ-તુલસીની ચા બનાવવા માટેની સામગ્રી
- પાણી – 1 કપ
- દૂધ – 1 કપ
- ચા પત્તી – 1 ચમચી
- આદુ – 1 નાનો ટુકડો
- તુલસીના પાન – 6થી 8
- ગોળ અથવા ખાંડ – સ્વાદ અનુસાર
- એલચી – 1 નંગ
આદુ-તુલસીની ગરમ ચા બનાવવાની રીત
સૌથી પહેલા એક પેનમાં પાણી ગરમ કરો. તેમાં છીણેલું અથવા થોડું કચડેલું આદુ, તુલસીના પાન અને એલચી ઉમેરો. આ મિશ્રણને 2થી 3 મિનિટ સુધી ઉકળવા દો, જેથી આદુ અને તુલસીનો સ્વાદ પાણીમાં સારી રીતે ભળી જાય.
હવે તેમાં ચા પત્તી ઉમેરો અને લગભગ એક મિનિટ સુધી ઉકાળો. ત્યારબાદ દૂધ ઉમેરો અને ચાને મધ્યમ આંચ પર સારી રીતે ઉકળવા દો. ચા તૈયાર થાય ત્યારે તેમાં સ્વાદ અનુસાર ગોળ અથવા ખાંડ ઉમેરો.
ચાને એકવાર સારી રીતે ઉકાળી લો અને પછી ગાળી લો. ગરમાગરમ આદુ-તુલસીની ચા કપમાં સર્વ કરો. સાથે બિસ્કિટ કે હળવો નાસ્તો હોય તો તેનો સ્વાદ પણ વધી જાય છે.
આદુ-તુલસીની ચાને વધુ સ્વાદિષ્ટ બનાવવાની ટિપ્સ
ચામાં તાજું આદુ અને તાજા તુલસીના પાનનો ઉપયોગ કરશો તો તેનો સ્વાદ અને સુગંધ વધારે સારી આવશે. જો તમને મસાલેદાર ચા પસંદ હોય તો તેમાં એક ચપટી તજ અથવા 1 લવિંગ પણ ઉમેરી શકો છો. ગોળનો ઉપયોગ કરવો હોય તો ચા ગાળ્યા પછી થોડું ઠંડું થાય ત્યારે ઉમેરવો વધુ યોગ્ય રહેશે.