Instant Fruit Rabdi Recipe: ઘરે કંઈક મીઠું અને અલગ બનાવવાનું મન થાય ત્યારે આ Instant Fruit Rabdi બનાવી શકો છો. દૂધ અને કસ્ટર્ડથી તૈયાર થતી ક્રીમી રબડીમાં સફરજન, દ્રાક્ષ, દાડમ જેવા તાજા ફળો ઉમેરવાથી તેનો સ્વાદ વધુ રિફ્રેશિંગ બને છે. ખાસ વાત એ છે કે આ ડેઝર્ટ બનાવવા માટે કલાકો સુધી દૂધ ઉકાળવાની જરૂર પડતી નથી.
ફ્રૂટ રબડી બનાવવાની સામગ્રી
- દૂધ – 500 મિલી
- કસ્ટર્ડ પાઉડર – 2 ટેબલસ્પૂન
- ખાંડ – 3થી 4 ટેબલસ્પૂન
- સફરજન – 1 નાનું
- દ્રાક્ષ – ½ કપ
- દાડમના દાણા – ¼ કપ
- કેળું – 1
- કાજુ-બદામ – 2 ટેબલસ્પૂન
- એલચી પાઉડર – ¼ ટીસ્પૂન
- કેસર – થોડા તાંતણા, વૈકલ્પિક
ફ્રૂટ રબડી બનાવવાની રીત
સૌપ્રથમ એક વાટકીમાં થોડું ઠંડું દૂધ લઈને તેમાં કસ્ટર્ડ પાઉડર સારી રીતે મિક્સ કરી લો, જેથી તેમાં ગઠ્ઠા ન રહે. હવે બાકીનું દૂધ એક પેનમાં ગરમ કરો અને તેમાં ખાંડ ઉમેરો.
દૂધ ગરમ થાય ત્યારે તેમાં તૈયાર કરેલું કસ્ટર્ડ મિશ્રણ ધીમે ધીમે ઉમેરતા જાઓ અને સતત હલાવતા રહો. થોડી જ વારમાં દૂધ ઘટ્ટ થઈને ક્રીમી બની જશે. તેમાં એલચી પાઉડર અને કેસર ઉમેરો અને ગેસ બંધ કરી દો.
હવે કસ્ટર્ડ રબડીને સંપૂર્ણપણે ઠંડી થવા દો. ત્યારબાદ તેમાં સમારેલા સફરજન, દ્રાક્ષ, દાડમ અને કેળાના ટુકડા ઉમેરો. ઉપરથી કાજુ-બદામ નાખીને હળવા હાથે મિક્સ કરો.
ફ્રૂટ રબડીને થોડા સમય માટે ફ્રિજમાં ઠંડી થવા મૂકો. ઠંડી થયા બાદ તેને સર્વિંગ બાઉલમાં કાઢીને ઉપર થોડા દાડમના દાણા અને ડ્રાયફ્રૂટથી ગાર્નિશ કરો. તૈયાર છે મિનિટોમાં બનતી ક્રીમી અને ટેસ્ટી Instant Fruit Rabdi.