Dal Bafla Recipe: રાજસ્થાની ભોજનનું નામ આવે એટલે દાળ બાટી, ચુરમા અને ઘીથી ભરપૂર સ્વાદિષ્ટ વાનગીઓ યાદ આવે છે. પરંતુ શું તમે ક્યારેય રાજસ્થાની દાળ બાફલા ટ્રાય કર્યા છે? દાળ બાટી જેવી દેખાતી આ વાનગી બનાવવાની રીત થોડી અલગ છે. બાફલાને પહેલાં પાણીમાં ઉકાળવામાં આવે છે અને ત્યારબાદ શેકવામાં આવે છે, જેના કારણે તે અંદરથી નરમ અને બહારથી થોડા ક્રિસ્પી બને છે. તેને ગરમાગરમ પંચમેલ દાળ અને ઘી સાથે પીરસવામાં આવે તો તેનો સ્વાદ વધુ મજેદાર લાગે છે. તો જાણો ઘરે જ રાજસ્થાની સ્ટાઇલ દાળ બાફલા બનાવવાની પરફેક્ટ રેસીપી.
દાળ બાફલા બનાવવા માટેની સામગ્રી
આ પણ વાંચો
બાફલા માટેની સામગ્રી
- 2 કપ ઘઉંનો લોટ
- 2 ચમચી સોજી
- 3 ચમચી ઘી અથવા તેલ
- અડધી ચમચી અજમો
- સ્વાદ અનુસાર મીઠું
- જરૂર મુજબ પાણી
- બાફલા બોળવા માટે ઘી
દાળ બનાવવા માટેની સામગ્રી
- અડધો કપ તુવેરની દાળ
- અડધો કપ મગની દાળ
- 1 નાની ડુંગળી, સમારેલી
- 1 ટામેટું, સમારેલું
- 1 ચમચી આદુ-લસણની પેસ્ટ
- અડધી ચમચી હળદર
- 1 ચમચી લાલ મરચું
- 1 ચમચી ધાણાજીરું
- અડધી ચમચી ગરમ મસાલો
- અડધી ચમચી જીરું
- ચપટી હિંગ
- 2 ચમચી ઘી અથવા તેલ
- સ્વાદ અનુસાર મીઠું
- જરૂર મુજબ પાણી
- કોથમીર અને લીંબુનો રસ
દાળ બાફલા બનાવવાની રીત
સૌપ્રથમ એક મોટા વાસણમાં ઘઉંનો લોટ, સોજી, અજમો, મીઠું અને ઘી લો. બધી સામગ્રીને બરાબર મિક્સ કરો. હવે થોડું-થોડું પાણી ઉમેરીને કઠણ લોટ બાંધી લો. લોટને ઢાંકીને 15થી 20 મિનિટ માટે બાજુ પર રાખો, જેથી બાફલા સરસ બને.
હવે લોટમાંથી મધ્યમ કદના ગોળા બનાવો. દરેક ગોળાને હથેળીથી થોડો દબાવીને વચ્ચે હળવો ખાડો કરો. આ રીતે બધા બાફલા તૈયાર કરી લો.
એક મોટા વાસણમાં પાણી ઉકાળવા મૂકો. પાણી ઉકળવા લાગે એટલે તેમાં તૈયાર કરેલા બાફલા ઉમેરો. મધ્યમ તાપે આશરે 15થી 20 મિનિટ સુધી બાફલા બરાબર ચડી જાય ત્યાં સુધી ઉકાળો. ત્યારબાદ તેને પાણીમાંથી કાઢીને થોડા ઠંડા થવા દો અને વધારાનું પાણી નિતારી લો.
હવે બાફલાને ઓવનમાં 180થી 200 ડિગ્રી સેલ્સિયસ તાપમાને આશરે 15થી 25 મિનિટ શેકી શકો છો. વચ્ચે એકવાર ફેરવી દો, જેથી બંને બાજુ સરસ રંગ આવે. જો ઓવન ન હોય તો અપ્પમ પેન અથવા જાડા તળિયાવાળી કડાઈમાં ઢાંકણ રાખીને ધીમા તાપે ફેરવતા ફેરવતા શેકો. બાફલા બહારથી હળવા ક્રિસ્પી અને અંદરથી નરમ થાય એટલે તૈયાર છે.
હવે દાળ બનાવવા માટે તુવેર અને મગની દાળને ધોઈને પ્રેશર કૂકરમાં ઉમેરો. તેમાં હળદર, મીઠું અને જરૂર મુજબ પાણી નાખીને 3થી 4 સીટી થાય ત્યાં સુધી અથવા દાળ નરમ થાય ત્યાં સુધી બાફો. દાળ બફાઈ જાય પછી તેને હલાવીને એકરસ કરી લો.
એક કડાઈમાં ઘી ગરમ કરો. તેમાં જીરું અને હિંગ ઉમેરો. ત્યારબાદ સમારેલી ડુંગળી નાખીને હળવી ગુલાબી થાય ત્યાં સુધી સાંતળો. હવે આદુ-લસણની પેસ્ટ અને ટામેટાં ઉમેરીને બરાબર પકાવો. તેમાં લાલ મરચું, ધાણાજીરું અને ગરમ મસાલો નાખીને મસાલો ઘી છોડે ત્યાં સુધી સાંતળો.
હવે તૈયાર કરેલી દાળ આ મસાલામાં ઉમેરો. જરૂર મુજબ પાણી નાખીને દાળને 8થી 10 મિનિટ ધીમા તાપે ઉકળવા દો, જેથી મસાલાનો સ્વાદ દાળમાં બરાબર ભળી જાય. છેલ્લે કોથમીર અને થોડો લીંબુનો રસ ઉમેરીને ગેસ બંધ કરો.
પીરસતી વખતે ગરમ બાફલાને હળવા હાથે તોડી અથવા આખા રાખીને ઉપરથી ગરમ ઘી રેડો. તેની સાથે ગરમાગરમ દાળ પીરસો. સ્વાદિષ્ટ રાજસ્થાની દાળ બાફલા તૈયાર છે.