Chocolate Dry Fruit Ghughra Recipe: દિવાળીનો તહેવાર મીઠાઈ અને નાસ્તા વિના અધૂરો લાગે છે. આ વખતે પરંપરાગત માવાના ઘુઘરાને બદલે કંઈક નવું બનાવવું હોય તો ચોકલેટ ડ્રાયફ્રૂટ ગુજિયા (ઘુઘરા) એક સરસ વિકલ્પ છે. તેમાં ચોકલેટનો સ્વાદ, કાજુ-બદામનો ક્રંચ અને બહારથી કરકરું પડ મળીને તેને ખાસ બનાવે છે. દિવાળી પર મહેમાનોને કંઈક અલગ મીઠાઈ પીરસવા અથવા ઘરે જ સ્વાદિષ્ટ ઘુઘરા તૈયાર કરવા માટે આ રેસિપી અજમાવી શકો છો.
ચોકલેટ ડ્રાયફ્રૂટ ગુજિયા (ઘુઘરા) બનાવવાની સામગ્રી
બહારનું પડ બનાવવા માટે
- 2 કપ મેંદો
- 3 ચમચી ઘી
- જરૂર મુજબ પાણી
- તળવા માટે તેલ અથવા ઘી
સ્ટફિંગ માટે
- અડધો કપ સમારેલા કાજુ-બદામ
- 2 ચમચી કિસમિસ
- અડધો કપ ચોકલેટ ચિપ્સ અથવા સમારેલી ચોકલેટ
- 2 ચમચી નારિયેળનું છીણ
- 2 ચમચી ખાંડનો પાઉડર
- અડધી ચમચી એલચી પાઉડર
ચોકલેટ ડ્રાયફ્રૂટ ગુજિયા (ઘુઘરા) બનાવવાની રીત
સૌપ્રથમ એક મોટા વાસણમાં મેંદો લો. તેમાં ઘી ઉમેરીને બરાબર મિક્સ કરો, જેથી મેંદો મુઠ્ઠીમાં દબાવતાં બંધાઈ જાય. હવે થોડું-થોડું પાણી ઉમેરીને કઠણ લોટ બાંધો. લોટને ઢાંકીને 20 મિનિટ માટે બાજુ પર રાખો, જેથી ઘુઘરાનું પડ સારી રીતે તૈયાર કરી શકાય.
હવે સ્ટફિંગ બનાવવા માટે એક પેનમાં સમારેલા કાજુ અને બદામને ધીમા તાપે થોડા શેકી લો. તેમાં કિસમિસ અને નારિયેળનું છીણ ઉમેરીને મિક્સ કરો. મિશ્રણ ઠંડું થાય પછી તેમાં ખાંડનો પાઉડર, એલચી પાઉડર અને ચોકલેટ ચિપ્સ ઉમેરો. ધ્યાન રાખો કે મિશ્રણ ગરમ હોય ત્યારે ચોકલેટ ન ઉમેરવી, નહીં તો તે ઓગળી શકે છે.
ત્યારબાદ બાંધેલા લોટમાંથી નાની-નાની લૂઈ બનાવો અને પૂરી જેવો ગોળ આકાર વણી લો. તેની વચ્ચે તૈયાર કરેલું ચોકલેટ-ડ્રાયફ્રૂટનું સ્ટફિંગ મૂકો. હવે પૂરીની કિનારી પર થોડું પાણી લગાવીને તેને અડધી વાળી દો અને કિનારીઓને સારી રીતે દબાવીને બંધ કરો. ઘુઘરાને સુંદર આકાર આપવા માટે કાંટા અથવા ઘુઘરા બનાવવાના મોલ્ડનો ઉપયોગ પણ કરી શકો છો.
હવે એક કડાઈમાં તેલ અથવા ઘી ગરમ કરો. ગેસની આંચ મધ્યમથી ધીમી રાખીને ઘુઘરાને ધીમે-ધીમે તળી લો. ઘુઘરા સોનેરી અને કરકરા થાય ત્યારે તેને બહાર કાઢીને વધારાનું તેલ નીતરવા દો. ઠંડા થયા પછી ચોકલેટ ડ્રાયફ્રૂટ ગુજિયા પીરસવા માટે તૈયાર છે.
ટિપ્સ
- ઘુઘરાનું સ્ટફિંગ ભર્યા પછી તેની કિનારીઓ બરાબર બંધ કરો, જેથી તળતી વખતે તે ખુલી ન જાય.
- ચોકલેટને ગરમ સ્ટફિંગમાં ઉમેરવાને બદલે મિશ્રણ ઠંડું થાય પછી જ ઉમેરો.
- ઘુઘરા ધીમા તાપે તળવાથી બહારથી કરકરા અને અંદરથી સરસ રીતે તૈયાર થશે.
- સંપૂર્ણ ઠંડા થયા પછી ઘુઘરાને હવાચુસ્ત ડબ્બામાં ભરીને રાખો.