IND vs AFG 1st T20: ભારત અને અફઘાનિસ્તાન વચ્ચે ત્રણ મેચોની T20 શ્રેણીની પ્રથમ મેચ રવિવારે દિલ્હીના અરુણ જેટલી સ્ટેડિયમ ખાતે રમાશે. આ શ્રેણીનું યજમાનપદ અફઘાનિસ્તાન સંભાળી રહ્યું છે, જે બંને દેશો વચ્ચેના ક્રિકેટ સંબંધો અને મિત્રતામાં એક નવો અધ્યાય ઉમેરે છે. અફઘાનિસ્તાન માટે ભારત અગાઉ પણ પોતાના 'હોમ ગ્રાઉન્ડ' સમાન રહ્યું છે, જ્યાં દેહરાદૂન અને ગ્રેટર નોઈડામાં તેમણે હોમ મેચો અને પ્રેક્ટિસ સેશન્સ યોજ્યા છે.
'તક-એ-ઝફર' ગેટ અને ફ્રેન્ડશિપ કપનું અનાવરણ
મેચની પૂર્વસંધ્યાએ ભારતીય કેપ્ટન શ્રેયસ અય્યર અને અફઘાન કેપ્ટન ઈબ્રાહિમ ઝદરાને સ્ટેડિયમના ગેટ નંબર 3 પર કાબુલના ઐતિહાસિક 'તક-એ-ઝફર' ગેટની પ્રતિકૃતિ સમક્ષ 'ફ્રેન્ડશિપ કપ' (Friendship Cup) ટ્રોફીનું લોન્ચિંગ કર્યું હતું. આ ગેટ અફઘાનિસ્તાનના સૈનિકોની યાદમાં બનાવવામાં આવેલું એક ગૌરવપૂર્ણ પ્રતીક છે, જે રીતે દિલ્હીમાં 'ઈન્ડિયા ગેટ'નું મહત્વ છે. પ્રેક્ષકો આ પ્રતિકૃતિ ગેટમાંથી સ્ટેડિયમમાં પ્રવેશ કરશે.
ટીમ ઈન્ડિયાની પ્લેઈંગ XI અને પ્લેયર્સ અંગે મૂંઝવણ
મેદાન પર બંને ટીમો જીત માટે પૂરતી તાકાત લગાવશે. ભારત માટે સૌથી મોટો પ્રશ્ન ઓપનિંગ/ટોપ-ઓર્ડરમાં વૈભવ સૂર્યવંશી અને સંજુ સેમસનમાંથી કોઈ એકની પસંદગી કરવાનો છે. 15 વર્ષીય નિર્ભય બેટ્સમેન વૈભવ અને અનુભવી સેમસન બંને રેસમાં છે.
બીજી તરફ, ફિટનેસની ચિંતા વચ્ચે ઈશાન કિશન આ મેચ માટે ઉપલબ્ધ રહેશે તેવા સંકેત મળ્યા છે. સ્પિન વિભાગમાં અક્ષર પટેલ અને વોશિંગ્ટન સુંદરનું રમવું લગભગ નક્કી છે, જ્યારે ત્રીજા સ્પિનર તરીકે વરુણ ચક્રવર્થી અથવા ઝડપી બોલર યશ ઠાકુર વચ્ચે પસંદગી થશે. જસપ્રીત બુમરાહ, અર્શદીપ સિંહ અને નીતિશ કુમાર રેડ્ડી પેસ આક્રમણ સંભાળશે.
અફઘાનિસ્તાનના સ્પિનરો સામે ભારતીય બેટ્સમેનોની કસોટી
આ શ્રેણી આગામી એશિયન ગેમ્સની તૈયારીઓ માટે ભારત માટે ખૂબ મહત્વપૂર્ણ છે. રાશિદ ખાન, નૂર અહેમદ અને મુજીબ ઉર રહેમાન જેવા વિશ્વસ્તરીય સ્પિનરો સામે ભારતીય બેટ્સમેનોની વાસ્તવિક કસોટી થશે. અફઘાન ટીમ પાસે ફઝલહક ફારૂકી, નવીન-ઉલ-હક, મોહમ્મદ નબી અને અઝમતુલ્લાહ ઓમરઝાઈ જેવા આક્રમક ઓલરાઉન્ડરો પણ હાજર છે.
ગૌતમ ગંભીર શાનદાર 'મેન-મેનેજર': શ્રેયસ અય્યર
કેપ્ટન શ્રેયસ અય્યરે મુકાબલા પહેલાં મુખ્ય કોચ ગૌતમ ગંભીરના વખાણ કરતાં જણાવ્યું હતું કે, "ગૌતમ ભાઈ દરેક ખેલાડીમાં વિશ્વાસ અને આત્મવિશ્વાસ ભરે છે. દરેક ખેલાડી પોતાની ભૂમિકા અંગે સ્પષ્ટ છે. મેં અગાઉ KKR માં પણ તેમની સાથે કામ કર્યું છે, જેથી હું તેમના અભિગમને સારી રીતે સમજું છું."