CSK vs MI Match: રવિવારે IPL 2025 ની ત્રીજી મેચમાં ચેન્નાઈ સુપર કિંગ્સે મુંબઈ ઈન્ડિયન્સને 4 વિકેટે હરાવ્યું હતું. ચેન્નઈએ 18મી સિઝનની શરૂઆત જીત સાથે કરી હતી. બીજી તરફ, મુંબઈ સતત 13મા વર્ષે IPLની શરૂઆતની મેચ જીતી શક્યું નથી. ભલે ચેન્નઈ આ મેચ જીતી ગયું હોય, પરંતુ મુંબઈના યુવા બોલર વિગ્નેશ પુથુરની ચર્ચા થઈ રહી છે.
વિગ્નેશ પુથુરે IPLમાં ડેબ્યૂ કર્યું
વિગ્નેશ પુથુરે ચેપોક ખાતેથી IPLમાં ડેબ્યૂ કર્યું હતું. તે રોહિત શર્માની જગ્યાએ ઇમ્પેક્ટ પ્લેયર તરીકે મેદાનમાં ઉતર્યો અને પોતાની બોલિંગથી પણ પોતાની છાપ છોડી. પુથુરે ચેન્નાઈના મિડલ ઓર્ડરને પોતાની જાળમાં ફસાવી દીધા હતા. ચેન્નઈને સારી શરૂઆત મળી હતી, પછી પુથુરે પોતાના સ્પિનથી ટીમની મુશ્કેલીઓ વધારી દીધી હતી.
કેરળના વિગ્નેશ પુથુરે 4 ઓવરના ક્વોટામાં 32 રન આપીને 3 વિકેટ લીધી હતી. એમએ ચિદમ્બરમ સ્ટેડિયમની સ્પિન-ફ્રેન્ડલી પિચ પર, પુથુરે પહેલા ચેન્નાઈના કેપ્ટન રુતુરાજ ગાયકવાડને પોતાની જાળમાં ફસાવ્યો. સીએસકેના કેપ્ટને 26 બોલમાં 6 ચોગ્ગા અને 3 છગ્ગાની મદદથી 53 રનની ઇનિંગ રમી. આ પછી, વિગ્નેશ પુથુરે શિવમ દુબે અને દીપક હુડ્ડાને પેવેલિયનનો રસ્તો બતાવ્યો. દુબેએ 9 અને હુડ્ડાએ 3 રન બનાવ્યા હતા.
પુથુર ધોનીના શરણમાં પહોંચ્યો
મેચ પછી, વિગ્નેશ પુથુરે ચેન્નાઈ સુપર કિંગ્સના ભૂતપૂર્વ કેપ્ટન મહેન્દ્ર સિંહ ધોનીની શરણમાં પહોંચ્યો હતો. મેચ દરમિયાન, જ્યારે બંને ટીમોના ખેલાડીઓ એકબીજા સાથે હાથ મિલાવી રહ્યા હતા, ત્યારે પુથુરે મહેન્દ્ર સિંહ ધોની સાથે વાત કરી. પુથુર ધોનીના કાનમાં કંઈક કહી રહ્યો હતો. આ દરમિયાન માહી હસતો જોવા મળ્યો અને તેણે પુથુરના ખભા પર હાથ મૂક્યો હતો. આ ઘટનાના ફોટા અને વીડિયો સોશિયલ મીડિયા પર પણ વાયરલ થઈ રહ્યા છે. મેચ પછી, મુંબઈના કેપ્ટન સૂર્યકુમાર યાદવે પણ પુથુરની પ્રશંસા કરી હતી.