Sachin Tendulkar on Vaibhav Sooryavanshi: ભારતીય ક્રિકેટમાં 15 વર્ષના યુવા બેટ્સમેન વૈભવ સૂર્યવંશીનું નામ આ સમયે દરેકના મોં પર છવાયેલું છે. પોતાની તોફાની અને આક્રમક બેટિંગથી મોટા-મોટા દિગ્ગજોને પોતાના પ્રશંસક બનાવનાર આ યુવા ખેલાડીને લઈને પૂર્વ મહાન ક્રિકેટર સચિન તેંડુલકરે એક અત્યંત મહત્વની સલાહ આપી છે.
હાલમાં જ વૈભવ સૂર્યવંશીને દિલીપ ટ્રોફી (Duleep Trophy) માં ઈસ્ટ ઝોનની ઉપકપ્તાની સોંપવામાં આવી, ત્યારે સચિન તેંડુલકરે વાંધો વ્યક્ત કરતા કહ્યું કે, આટલી નાની ઉંમરે ખભા પર કેપ્ટનશીપનો બોજ નાખવો તે યોગ્ય નિર્ણય નથી. સચિને 15 વર્ષીય વૈભવ સૂર્યવંશીને ઉપકપ્તાનીનો બોજ આપવાને બદલે તેને ધીમે-ધીમે આગળ વધારવાની ભલામણ કરી છે.
દિલીપ ટ્રોફીમાં વૈભવ સૂર્યવંશીને નાની ઉંમરે મળેલી નવી જવાબદારી અંગે સચિન તેંડુલકરે અભિપ્રાય આપતા સ્પષ્ટ શબ્દોમાં કહ્યું કે, 'મને લાગે છે કે દિલીપ ટ્રોફીમાં તેને વાઈસ કેપ્ટન બનાવવો થોડી ઉતાવળ છે. અત્યારે આપણે તેને રેડ બોલથી વધુ મેચો રમવા દેવી જોઈએ અને ઉતાવળ કરવાને બદલે એક-એક કદમ આગળ વધવું જોઈએ.'
ફેન્સે ઈંગ્લેન્ડના જો રૂટના તેમના ટેસ્ટ રેકોર્ડ્સની નજીક પહોંચવા અંગે સવાલ પૂછ્યો હતો. આ અંગે સચિન તેંડુલકરે જો રૂટના વખાણ કરતા કહ્યું કે, 'મેં શરૂઆતથી જ તેની ક્ષમતાને ઓળખી લીધી હતી. જ્યારે તેણે પોતાની પ્રથમ ટેસ્ટ મેચ રમી હતી, ત્યારે જ મને સમજાઈ ગયું હતું કે આ ખેલાડી ક્રિકેટ જગતમાં ખૂબ મોટું નામ કમાશે.' આ સાથે સચિને વર્તમાન સમયમાં પોતાના ફેવરિટ વિદેશી બેટ્સમેન તરીકે સ્ટીવ સ્મિથ અને હેરી બ્રુકના નામ પસંદ કર્યા હતા.
બીજી તરફ, ભારતીય સીનિયર ટીમમાં સંજુ સેમસન અને અભિષેક શર્માના તોફાની ફોર્મને કારણે વૈભવ સૂર્યવંશીને હાલમાં પ્લેઈંગ 11 માં તક મેળવવા માટે રાહ જોવી પડી રહી છે. ટીમમાં મજબૂત હરીફાઈ અને સિલેક્શન અંગે ઉભા થઈ રહેલા સવાલ પર ભારતીય ટીમના હેડ કોચ ગૌતમ ગંભીરે પોતાના કડક અંદાજમાં પરિસ્થિતિ સ્પષ્ટ કરી દીધી છે.
વૈભવ સૂર્યવંશીની ક્રિકેટિંગ કારકિર્દીની શરૂઆત અત્યંત શાનદાર રહી છે.
- IPL ડેબ્યૂ અને સૌથી ઝડપી સદી: વૈભવ સૂર્યવંશીએ વર્ષ 2025 માં પોતાનું IPL ડેબ્યૂ કર્યું, જ્યાં તેણે IPL મા કોઈપણ ભારતીય ખેલાડી દ્વારા સૌથી ઝડપી સદી ફટકારવાનો રેકોર્ડ તોડી નાખ્યો હતો.
- ઓરેન્જ કેપ વિજેતા (2026): ત્યારબાદ વર્ષ 2026 ની IPL સીઝનમાં વૈભવ 16 મેચોમાં 776 રન બનાવીને Orange Cap વિજેતા બન્યો હતો.
- ટીમ ઈન્ડિયા ડેબ્યૂ અને T20I રેકોર્ડ: આ ઉત્કૃષ્ટ પ્રદર્શન બાદ તેનું ભારતીય રાષ્ટ્રીય ટીમમાં ડેબ્યૂ થયું હતું. ભારત માટે વૈભવ અત્યાર સુધીમાં 10 T20I મેચ રમી ચૂક્યો છે, જેમાં તેણે 29 ની એવરેજ અને 185 સ્ટ્રાઈક રેટથી કુલ 295 રન બનાવ્યા છે.