IND-W vs PAK-W, ICC Women's T20 WC 2026: ભારત અને પાકિસ્તાનની મહિલા ટીમો વચ્ચે બર્મિંગહામના એજબેસ્ટન મેદાન પર આજે 14 જૂન, રવિવારના રોજ T20 વર્લ્ડ કપ 2026 નો હાઈવોલ્ટેજ મુકાબલો રમાવા જઈ રહ્યો છે. પરંતુ મેચ પહેલા સૌથી મોટો સવાલ એ ચર્ચાઈ રહ્યો છે કે શું ભારતીય ક્રિકેટ ટીમ પાકિસ્તાની પ્લેયર્સ સાથે હાથ મિલાવશે?
હરમનપ્રીત કૌરે આપ્યો સ્પષ્ટ જવાબ
આ રોમાંચક મેચ પહેલા પાકિસ્તાની ખેલાડીઓ સાથે Handshake એટલે કે હાથ મિલાવવા અંગેના સવાલ પર ભારતીય મહિલા ટીમની કેપ્ટન હરમનપ્રીત કૌરે કંઈ પણ કહેવાનો ઇનકાર કરી દીધો છે. તેણે સ્પષ્ટ શબ્દોમાં કહ્યું કે, "અમે અહીં માત્ર ક્રિકેટ માટે આવ્યા છીએ અને અમે અન્ય કોઈ બાબત વિશે વાત કરતા નથી."
ભારતીય ટીમની 'નો-હેન્ડશેક' પોલિસી
નોંધનીય છે કે, વર્ષ 2025 ના મેન્સ એશિયા કપથી ભારતીય ખેલાડીઓએ પાકિસ્તાની ખેલાડીઓ સાથે 'નો હેન્ડશેક' (No handshake) એટલે કે હાથ ન મિલાવવાની નીતિ અપનાવી છે. આ સિલસિલો રાઇઝિંગ સ્ટાર્સ એશિયા કપ, અંડર-19 એશિયા કપ અને અંડર-19 વર્લ્ડ કપની મેચોમાં પણ સતત જોવા મળ્યો છે.
ગયા વર્ષે રમાયેલા મહિલા વર્લ્ડ કપ દરમિયાન પણ હરમનપ્રીત કૌરે પાકિસ્તાનની કેપ્ટન ફાતિમા સના સાથે હાથ મિલાવ્યા ન હતા, જેથી T20 વર્લ્ડ કપ 2026 માં પણ આવું જ વલણ જોવા મળી શકે છે.
પુલવામા આતંકી હુમલા બાદ વધ્યું અંતર
રાજકીય મુદ્દાઓને કારણે લાંબા સમયથી ભારત અને પાકિસ્તાન વચ્ચે કોઈ દ્વિપક્ષીય સિરીઝ રમાઈ નથી, બંને ટીમો માત્ર મલ્ટીનેશન ટૂર્નામેન્ટમાં જ એકબીજા સામે ટકરાય છે. જોકે, પુલવામા હુમલા બાદ ક્રિકેટના મેદાન પર પણ બંને દેશો વચ્ચે અંતર વધી ગયું છે. પુલવામા હુમલામાં માર્યા ગયેલા માસૂમ લોકોના સન્માનમાં ભારતીય ખેલાડીઓ ક્રિકેટના મેદાન પર પાકિસ્તાની ખેલાડીઓ સાથે હાથ મિલાવતા નથી.
આંકડાઓમાં ભારતીય ટીમનો દબદબો
જો આંકડાની વાત કરવામાં આવે તો ભારતીય મહિલા ટીમ પાકિસ્તાન પર હંમેશા ભારે પડી છે. T20 ઇન્ટરનેશનલના હેડ-ટુ-હેડ (Head-to-Head) રેકોર્ડમાં ભારત 13-3 થી આગળ છે. એટલું જ નહીં, વિમેન્સ T20 વર્લ્ડ કપના ઈતિહાસમાં પણ ભારતીય ટીમનો દબદબો રહ્યો છે, અને ભારત તેમાં પણ પાકિસ્તાન સામે 6-2 થી લીડ ધરાવે છે.