ICC Women's T20 World Cup 2026, IND-W vs PAK-W: ઇંગ્લેન્ડમાં શરૂ થયેલા આઇસીસી મહિલા ટી-20 વર્લ્ડ કપ 2026 (ICC Women's T20 World Cup 2026) માં આજે ક્રિકેટ જગતની બે કટ્ટર હરીફ ટીમો આમને-સામને ટકરાશે. આજે રવિવારે ગ્રુપ-1ની મહત્વપૂર્ણ મેચમાં ભારત અને પાકિસ્તાનની મહિલા ટીમો વચ્ચે હાઈવોલ્ટેજ મહામુકાબલો રમાશે.
IND-W vs PAK-W: કટ્ટર હરીફ વચ્ચે મુકાબલો
ગત નવેમ્બર 2025 માં પહેલીવાર ICC મહિલા ટી-20 વર્લ્ડ કપ જીત્યા બાદ, કેપ્ટન હરમનપ્રીત કૌરની આગેવાની હેઠળની ભારતીય ટીમ પોતાના પહેલા T20 ટાઇટલ પર નજર રાખી રહી છે. આવો જાણીએ આ રોમાંચક મેચ પહેલા બંને ટીમોના આંકડા, પિચ રિપોર્ટ અને મેચની તમામ વિગતો.
IND-W vs PAK-W: મેચ ક્યારે અને ક્યાં રમાશે?
ભારત અને પાકિસ્તાનની મહિલા ટીમો વચ્ચેની આ મેચ આજે 14 જૂન, રવિવારના રોજ બર્મિંગહામના ઐતિહાસિક એજબેસ્ટન સ્ટેડિયમ ખાતે રમાશે. આ મેચ ભારતીય સમય અનુસાર સાંજે 7:00 વાગ્યે શરૂ થશે, જ્યારે ટોસ અડધો કલાક વહેલા એટલે કે સાંજે 6:30 વાગ્યે થશે.
Harmanpreet Kaur and her team are adding the final touches before their big opening clash 🇮🇳🏃♀️
— ICC (@ICC) June 14, 2026
Watch the Women's #T20WorldCup 2026 LIVE, broadcast details here 📺 https://t.co/niBjzedxPu pic.twitter.com/3owGe1Gxhi
IND-W vs PAK-W: લાઈવ મેચ કેવી રીતે જોવી?
- લાઇવ ટેલિકાસ્ટ (TV): ક્રિકેટ પ્રેમીઓ આ મેચનું જીવંત પ્રસારણ સ્ટાર સ્પોર્ટ્સ નેટવર્ક (Star Sports Network) ની ચેનલો પર જોઈ શકશે.
- લાઇવ સ્ટ્રીમિંગ (Online): ડિજિટલ પ્લેટફોર્મ પર મેચનું લાઈવ સ્ટ્રીમિંગ જીઓ હોટસ્ટાર (JioHotstar) ની વેબસાઇટ અને મોબાઇલ એપ પર ઉપલબ્ધ રહેશે.
- આ ઉપરાંત ગુજરાતી જાગરણ એપ પર મેચનો લાઈવ બ્લોગ પણ વાંચી શકાશે.
એજબેસ્ટન પિચ રિપોર્ટ અને હવામાનની સ્થિતિ
21 હજાર દર્શકોની ક્ષમતા ધરાવતા એજબેસ્ટન સ્ટેડિયમની પિચ બેટર્સ અને બોલરો બંનેને સમાન મદદ પૂરી પાડે છે. બર્મિંગહામમાં રવિવારે તાપમાન 10 થી 19 ડિગ્રી સેલ્સિયસ વચ્ચે રહેવાની ધારણા છે. વરસાદની સંભાવના માત્ર 20 ટકા જ છે, પરંતુ વાદળછાયું વાતાવરણ અને પવનના કારણે શરૂઆતની ઓવરોમાં ફાસ્ટ બોલરોને સ્વિંગ મળી શકે છે.
Pakistan put in the hard work in the nets ahead of tomorrow’s big #T20WorldCup clash 👊
— ICC (@ICC) June 14, 2026
Catch the action LIVE, tickets link 🎟️ https://t.co/8kyuNOXKdL pic.twitter.com/CHNK5HYAGz
પિચનો મિજાજ: શરૂઆતમાં નવા બોલથી ફાસ્ટ બોલરોને સારી મૂવમેન્ટ મળે છે, પરંતુ મેચ જેમ જેમ આગળ વધે તેમ સ્પિનરો માટે પણ પિચ મદદગાર સાબિત થાય છે. અહીં પ્રથમ ઇનિંગ્સનો સરેરાશ સ્કોર 145 રન છે અને 150થી વધુનો સ્કોર ઘણો ચેલેન્જિંગ માનવામાં આવે છે. અગાઉના રેકોર્ડ મુજબ, પ્રથમ બેટિંગ કરનારી ટીમે 10 અને ટાર્ગેટ ચેઝ કરનારી ટીમે 9 મેચમાં જીત મેળવી છે.
IND-W vs PAK-W: હેડ-ટુ-હેડ રેકોર્ડ
T20 ફોર્મેટમાં બંને ટીમો વચ્ચેનો રેકોર્ડ જોવામાં આવે તો, ભારતીય ટીમ પાકિસ્તાન પર ભારે વર્ચસ્વ ધરાવે છે. વર્ષ 2009 થી અત્યાર સુધીમાં બંને ટીમો વચ્ચે કુલ 16 આંતરરાષ્ટ્રીય T20 મેચ રમાઈ છે. આ 16 મેચમાંથી ભારતે 13 મેચમાં પાકિસ્તાનને કારમી હાર આપી છે, જ્યારે પાકિસ્તાનની ટીમ માત્ર 3 વખત જ સફળ રહી શકી છે.
આ પણ વાંચો: T20 કેપ્ટન બન્યા બાદ શ્રેયસ અય્યરે મુંબઈમાં લીધો લક્ઝુરિયસ એપાર્ટમેન્ટ, ભાડું જાણીને હોશ ઉડી જશે!
IND-W vs PAK-W: સંભવિત પ્લેઈંગ-11 (Playing 11)
- ભારત (Indian Women Squad): સ્મૃતિ મંધાના, શેફાલી વર્મા, યાસ્તિકા ભાટિયા/ભારતી ફુલમાળી, હરમનપ્રીત કૌર (કેપ્ટન), જેમિમાહ રોડ્રિગ્સ, રીચા ઘોષ (વિકેટકીપર), દીપ્તિ શર્મા, શ્રેયંકા પાટીલ, ક્રાંતિ ગૌડ, નંદિની શર્મા અને શ્રી ચરણી.
- પાકિસ્તાન (Pakistan Women Squad): મુનીબા અલી (વિકેટકીપર), ગુલ ફિરોઝા, આયશા ઝફર, આલિયા રિયાઝ, ફાતિમા સના (કેપ્ટન), ઈમન ફાતિમા, ઇરમ જાવેદ, તુબા હસન, ડાયના બેગ, નશરા સંધુ અને સાદીયા ઈકબાલ.