SMAT: ભારતીય બેટ્સમેન પૃથ્વી શોએ IPL હરાજી પહેલા પોતાના પ્રભાવશાળી પ્રદર્શનથી તમામ ફ્રેન્ચાઇઝીનું ધ્યાન આકર્ષિત કરવાનો પ્રયાસ કર્યો છે. પૃથ્વી શોએ સૈયદ મુશ્તાક અલી T20 ટુર્નામેન્ટના બીજા રાઉન્ડમાં શાનદાર પ્રદર્શન કરીને પોતાની ટીમ મહારાષ્ટ્રને જીત તરફ દોરી હતી. કોલકાતામાં હૈદરાબાદ સામેની એલીટ ગ્રુપ B મેચમાં પૃથ્વી શોએ 36 બોલમાં 66 રન બનાવ્યા, જેમાં નવ ચોગ્ગા અને ત્રણ છગ્ગાનો સમાવેશ થાય છે.
કુલકર્ણી સાથે દમદાર ભાગીદારી
લક્ષ્યનો પીછો કરવા ઉતરેલા પૃથ્વીએ અર્શીન કુલકર્ણી સાથે મળીને પહેલી વિકેટ માટે 73 બોલમાં 117 રનની સદીની ભાગીદારી નોંધાવી હતી. પૃથ્વીએ 23 બોલમાં પોતાની ફિફ્ટી પૂરી કરી હતી. હૈદરાબાદે મહારાષ્ટ્રને 192 રનનો ટાર્ગેટ આપ્યો હતો. પૃથ્વી અને અર્શીનના શાનદાર પ્રદર્શનને કારણે મહારાષ્ટ્રે 18.4 ઓવરમાં બે વિકેટ ગુમાવીને લક્ષ્યાંક હાંસલ કરી લીધો હતો. અર્શીન 54 બોલમાં 12 ચોગ્ગા અને બે છગ્ગાની મદદથી 89 રન બનાવીને અણનમ રહ્યો હતો.
પૃથ્વી ઋતુરાજ ગાયકવાડની ગેરહાજરીમાં સૈયદ મુશ્તાક અલી ટુર્નામેન્ટમાં મહારાષ્ટ્ર ટીમનું નેતૃત્વ કરી રહ્યો છે. ઋતુરાજ 30 નવેમ્બરથી દક્ષિણ આફ્રિકા સામે શરૂ થનારી ત્રણ મેચની ODI શ્રેણી માટે ભારતીય ટીમનો ભાગ છે, જેના કારણે તે આ સ્થાનિક T20 ટુર્નામેન્ટમાં રમી રહ્યો નથી. પૃથ્વી વર્તમાન સ્થાનિક સિઝનમાં મહારાષ્ટ્ર માટે સારા ફોર્મમાં છે. તે મુંબઈથી મહારાષ્ટ્ર ટીમમાં જોડાયો હતો. ગયા વર્ષે પૃથ્વીને તેના ખરાબ પ્રદર્શનને કારણે IPL હરાજીમાં ખરીદવામાં આવ્યો ન હતો.
અન્ય મેચોના પરિણામો
સૈયદ મુશ્તાક અલી ટ્રોફીના એલીટ ગ્રુપની અન્ય મેચોમાં, રાજસ્થાને ત્રિપુરાને પાંચ વિકેટથી હરાવ્યું. પ્રથમ બેટિંગ કરતા ત્રિપુરાએ 20 ઓવરમાં સાત વિકેટે 169 રન બનાવ્યા. જવાબમાં રાજસ્થાને 18.5 ઓવરમાં પાંચ વિકેટે 171 રન બનાવીને મેચ પાંચ વિકેટથી જીતી લીધી. જ્યારે ગ્રુપ A મેચમાં રેલવેએ કેરળને 32 રનથી, ગ્રુપ Bમાં મધ્યપ્રદેશે બિહારને 62 રનથી, ગ્રુપ Cમાં પુડુચેરીએ બરોડાને 17 રનથી અને ગ્રુપ Dમાં દિલ્હીએ તમિલનાડુને છ વિકેટથી હરાવ્યું. જ્યારે ગ્રુપ Cમાં હરિયાણા અને પંજાબ વચ્ચેની મેચ ટાઇ રહી હતી, પરંતુ હરિયાણા સુપર ઓવરમાં જીતી ગયું હતું.
અભિષેકનું બેટ શાંત રહ્યું
આ દરમિયાન હૈદરાબાદમાં હરિયાણા અને પંજાબ વચ્ચે ગ્રુપ સી મેચ રમાઈ હતી. પ્રથમ બેટિંગ કરતા હરિયાણાએ 20 ઓવરમાં 9 વિકેટ ગુમાવીને 207 રન બનાવ્યા. કેપ્ટન અંકિત કુમાર (51) અને નિશાંત સિંધુ (61) એ અડધી સદી ફટકારી. પંજાબ માટે, અશ્વિની કુમારે સૌથી વધુ ત્રણ વિકેટ લીધી.
જવાબમાં પંજાબે 20 ઓવરમાં 7 વિકેટ ગુમાવીને 207 રન બનાવ્યા. કેપ્ટન અભિષેક શર્મા (6)ને અંશુલ કંબોજ દ્વારા બોલ્ડ કરવામાં આવ્યો. પંજાબ અનમોલપ્રીત સિંહ (81)ની ઇનિંગને કારણે મેચ ટાઇ કરવામાં સફળ રહ્યું. અનમોલપ્રીતે 37 બોલમાં 8 ચોગ્ગા અને પાંચ છગ્ગા ફટકારીને 81 રન બનાવ્યા.