Ravi Shastri Exclusive: ભારતીય ટીમના ભૂતપૂર્વ મુખ્ય કોચ રવિ શાસ્ત્રીનું માનવું છે કે ન્યૂઝીલેન્ડમાં સફળ થવા માટે ભારતીય બેટ્સમેનોએ પોતાની રમતમાં જરૂરી ફેરફારો કરવા પડશે. ન્યૂઝીલેન્ડ પ્રવાસને ભારતીય ક્રિકેટના ભવિષ્ય માટે ખૂબ જ મહત્વનો ગણાવતા રવિ શાસ્ત્રીએ કહ્યું કે, આ ક્રિકેટ પ્રવાસ પર ટીમનું પ્રદર્શન આગળની દિશાનો સંકેત આપશે. વાંચો રવિ શાસ્ત્રી સાથેની વિશેષ વાતચીતના મુખ્ય અંશ:
સવાલ: ભારતે ચાર વર્ષ પછી ભુવનેશ્વર કુમારને T20 ટીમમાં વાપસી કરાવી છે. યુવા ખેલાડીથી સજ્જ ટીમમાં તેમનો અનુભવ કેટલો ઉપયોગી થશે?
જવાબ: અનુભવનો કોઈ વિકલ્પ નથી, તેને બજારમાં ખરીદી કે વેચી શકાતો નથી. ભુવનેશ્વરે IPL માં જે પ્રકારનું પ્રદર્શન કર્યું છે અને ભારતીય ટીમ સાથે તેમનો જેટલો અનુભવ છે, તેને જોતાં તેઓ ન્યૂઝીલેન્ડની પરિસ્થિતિ માટે આદર્શ બોલર સાબિત થશે. વાસ્તવમાં, તેઓ કોઈ પણ પરિસ્થિતિમાં અસરકારક સાબિત થઈ શકે છે.
સવાલ: આજકાલ ત્રણેય ફોર્મેટમાં સતત ક્રિકેટ રમાઈ રહ્યું છે. તેવામાં ન્યૂઝીલેન્ડ સામેની બે ટેસ્ટ મેચની શ્રેણી કેટલી મહત્વપૂર્ણ રહેશે?
જવાબ: ટેસ્ટ સિરીઝ મહત્વપૂર્ણ છે, પરંતુ હવે વનડે (ODI) અને T20 પર પણ ઘણો ભાર મૂકવામાં આવી રહ્યો છે. ન્યૂઝીલેન્ડનો આખો દોઢ મહિનાનો પ્રવાસ ભારતીય ક્રિકેટના ભવિષ્યની દિશા બતાવનારો રહેશે. ત્યાંની પરિસ્થિતિ દક્ષિણ આફ્રિકા જેવી પણ હોઈ શકે છે, તેથી આ પ્રવાસ ખૂબ જ મહત્વપૂર્ણ છે.
સવાલ: ન્યૂઝીલેન્ડ સામેની ટેસ્ટ સિરીઝ ભારતની WTC ફાઈનલની આશાઓ માટે નિર્ણાયક બની શકે છે. ગિલની આગેવાની હેઠળ યુવા ભારતીય ટીમની શક્યતાઓને તમે કેવી રીતે જુઓ છો?
જવાબ: ભારત માટે આ સરળ નહીં હોય. પોઈન્ટ ટેબલમાં સ્થિતિ અને દક્ષિણ આફ્રિકામાં ઓસ્ટ્રેલિયાની જીતને જોતા ન્યૂઝીલેન્ડ સામેની સિરીઝ ભારત કરતાં યજમાન ન્યૂઝીલેન્ડ ટીમ માટે વધુ મહત્વપૂર્ણ બની શકે છે. હાલમાં દક્ષિણ આફ્રિકા, ન્યૂઝીલેન્ડ અને ઓસ્ટ્રેલિયામાંથી બે ટીમ ફાઈનલમાં પહોંચે તેવી શક્યતા દેખાય છે. ભારત માટે રસ્તો મુશ્કેલ છે, ન્યૂઝીલેન્ડમાં બાકી રહેલી બંને ટેસ્ટ જીતવી પડશે અને ઓસ્ટ્રેલિયા સામે પાંચ પૈકી ચાર ટેસ્ટ જીતવી પડશે. આ અશક્ય નથી, પરંતુ બીજી ટીમના પરિણામો પર પણ નજર રાખવી પડશે.
સવાલ: ન્યૂઝીલેન્ડમાં ટેસ્ટ સિરીઝની તૈયારી માટે ભારતીય ટીમે કઈ બાબતો પર સૌથી વધુ ધ્યાન આપવું જોઈએ?
જવાબ: ટેસ્ટ ટીમનું વહેલા પહોંચવું અને કેટલીક મેચ રમવી એ સારો નિર્ણય છે. ન્યુઝીલેન્ડમાં શિયાળા પછી ક્રિકેટ શરૂ થઈ રહ્યું હશે અને પીચ ફ્રેશ હશે. મને આશ્ચર્ય નહીં થાય જો ન્યુઝીલેન્ડ એવી પિચ તૈયાર કરે જે તેના ફાસ્ટ બોલરોને મદદરૂપ થાય. ત્યાંનું હવામાન ઝડપી પવનવાળું હોઈ શકે અને બોલ સ્વિંગની સાથે સીમ (Seam) પણ કરશે. ભારતીય બેટ્સમેનોએ આ પરિસ્થિતિને અનુરૂપ વહેલી તકે ઢળવું પડશે. હું 2019માં કોચ તરીકે ન્યુઝીલેન્ડ ગયો હતો. તે સમયે અમે ઓસ્ટ્રેલિયામાં સારું પ્રદર્શન કર્યું હતું અને ન્યુઝીલેન્ડમાં પણ અમારો પ્રવાસ શાનદાર રહ્યો હતો. પરંતુ ન્યુઝીલેન્ડમાં ટેસ્ટ સિરીઝ જીતવી હંમેશા મુશ્કેલ હોય છે. ભારતીય ખેલાડીઓએ ત્યાંની પરિસ્થિતિને ઝડપથી સમજવી પડશે.
સવાલ: ન્યુઝીલેન્ડ પ્રવાસ પર ફાસ્ટ બોલરોની ભૂમિકા કેટલી મહત્વની રહેશે?
જવાબ: ન્યુઝીલેન્ડમાં એટલા મોટા સ્કોર જોવા નહીં મળે, કારણ કે ત્યાં બોલ સ્વિંગ અને સીમ કરે છે. ભારતીય બેટ્સમેનો અને મધ્યમ ક્રમ (Middle Order) ની પરીક્ષા થશે. ભારતમાં સપાટ પિચ પર લાંબી ભાગીદારી બની શકે છે, પરંતુ ન્યૂઝીલેન્ડમાં મધ્યમ ઓવરોમાં પણ વિકેટો મળી શકે છે. ભાગીદારીઓ ખૂબ જ મહત્વપૂર્ણ રહેશે. ખાસ કરીને ટોપ ઓર્ડરના બેટ્સમેનોને સારી શરૂઆત મળે તો તેને મોટી ઈનિંગ્સમાં બદલવી પડશે. બોલરો માટે પણ પોતાની છાપ છોડવાની આ સારી તક છે. હું આ પ્રવાસને લઈને ખૂબ જ ઉત્સાહિત છું, કારણ કે વિદેશી પરિસ્થિતિ જ ખેલાડીઓની સાચી પરીક્ષા લે છે.
સવાલ: ત્રણેય ફોર્મેટમાં સફળ ટ્રાન્ઝીશન માટે ટીમની તૈયારી કેવા પ્રકારની હોવી જોઈએ?
જવાબ: ટેસ્ટ ટીમના ખેલાડીઓ પહેલા પહોંચી રહ્યા છે, જેમાંથી ઘણા વનડે અને T20 ટીમનો પણ હિસ્સો હશે. તેમને પરિસ્થિતિને અનુકૂળ થવામાં મદદ મળશે. જે ખેલાડીઓ માત્ર ટેસ્ટ ટીમમાં છે, તેમણે ચાર દિવસીય મેચનો પૂરો ફાયદો ઉઠાવવો જોઈએ અને નેટ પ્રેક્ટિસમાં સમય વિતાવવો જોઈએ. ન્યુઝીલેન્ડમાં ભારતની જેમ બેટિંગ કરી શકાતી નથી. બોલને મોડેથી રમવો પડશે, શરીરની નજીક રહીને રમવું પડશે અને ઘણા બોલને છોડતા પણ શીખવું પડશે. આ માનસિકતા પહેલેથી જ બનાવવી પડશે.