ભારત-પાકિસ્તાન મેચ પહેલાં મિતાલી રાજની ટીમ ઈન્ડિયાને સલાહ, પ્રેમા રાવતને ગણાવી 'સરપ્રાઇઝ પેકેજ'

IND W vs PAK W: મહિલા એશિયા કપમાં ભારત અને પાકિસ્તાન વચ્ચે રમાનારા હાઈ-વોલ્ટેજ મુકાબલા પહેલાં ભારતીય મહિલા ક્રિકેટ ટીમની પૂર્વ કેપ્ટન મિતાલી રાજે ટીમને મહત્વનો ગુરુમંત્ર આપ્યો છે. મિતાલી રાજે ખેલાડીઓને મેચ દરમિયાન બહારના શોરબકોર અને સોશિયલ મીડિયાના દબાણથી દૂર રહીને માત્ર પોતાની રમત અને પ્રક્રિયા પર ધ્યાન કેન્દ્રિત કરવા ભારપૂર્વક જણાવ્યું છે.

બહારના દબાણથી દૂર રહેવાની સલાહ

સોની સ્પોર્ટ્સ નેટવર્ક સાથેની ખાસ વાતચીતમાં મિતાલી રાજે જણાવ્યું હતું કે ભારત-પાકિસ્તાન મેચને લઈને મીડિયા અને ચાહકોમાં ચર્ચા થવી સ્વાભાવિક છે, તેથી આ બહારના શોરબકોરને રોકવો શક્ય નથી.

દબાણથી બચો: ખેલાડીઓએ વારંવાર એવું ન વિચારવું જોઈએ કે આ બહુ મોટી મેચ છે. આવું વિચારવાથી મેચ શરૂ થાય તે પહેલાં જ માનસિક દબાણ ઊભું થાય છે.

સીનિયર્સની જવાબદારી: મિતાલીના જણાવ્યા મુજબ, પાકિસ્તાન હોય, ઈંગ્લેન્ડ હોય કે ન્યુઝીલેન્ડ—અંતે ટીમે સામે રહેલી રમત જ જીતવાની હોય છે. આવા સમયે સીનિયર ખેલાડીઓની મુખ્ય જવાબદારી છે કે તેઓ યુવા ખેલાડીઓને મોટા મુકાબલાના ટેન્શનથી મુક્ત રાખે.

પ્રેમા રાવત બનશે 'સરપ્રાઇઝ પેકેજ'

ભારતીય ટીમની યુવા ઓલરાઉન્ડર પ્રેમા રાવત અંગે વાત કરતાં મિતાલી રાજે તેમને ટીમ માટે 'સરપ્રાઇઝ પેકેજ' ગણાવી છે. ભારત-એ ટીમના મુકાબલાઓમાં પ્રેમાએ બેટ અને બોલ બંનેથી શાનદાર પ્રદર્શન કર્યું છે. લેગ-સ્પિનર હોવાના કારણે તે ટી-20 અને ટૂંકા ફોર્મેટમાં ઝડપથી વિકેટ લેવામાં માહિર છે.

બેટિંગ અને બોલિંગ ઉપરાંત તે વિકેટો વચ્ચે ઝડપી દોડ અને શાનદાર ફીલ્ડિંગ માટે પણ જાણીતી છે. મિતાલીના મતે, પ્રેમા પાસે એક સંપૂર્ણ ઓલરાઉન્ડર બનવાના તમામ ગુણો છે અને આંતરરાષ્ટ્રીય સ્તરે પોતાની ક્ષમતા સાબિત કરવા તેને પૂરતી તકો મળવી જોઈએ.