IPL 2026: મેદાન પર બાખડ્યા ખેલાડીઓ, તિલક વર્મા અને જેમી ઓવરટન વચ્ચે ઉગ્ર બોલાચાલી; સૂર્યાએ કરવી પડી મધ્યસ્થી

MI vs CSK, IPL 2026: આઈપીએલની સૌથી ચર્ચિત અને હાઈ-વોલ્ટેજ ગણાતી મુંબઈ ઇન્ડિયન્સ (MI) અને ચેન્નાઈ સુપર કિંગ્સ (CSK) વચ્ચેની મેચમાં મેદાન પર ઉગ્ર માહોલ જોવા મળ્યો હતો. વાનખેડે સ્ટેડિયમમાં રમાયેલી આ મેચ દરમિયાન મુંબઈના બેટ્સમેન તિલક વર્મા અને ચેન્નાઈના ઝડપી બોલર જેમી ઓવરટન વચ્ચે તીખી બોલાચાલી થઈ હતી. પરિસ્થિતિ વણસતી જોઈને સીનિયર ખેલાડી સૂર્યકુમાર યાદવે હસ્તક્ષેપ કરવો પડ્યો હતો.

શું હતો સમગ્ર વિવાદ?

ઘટના મુંબઈની ઇનિંગ્સની 10મી ઓવર દરમિયાન બની હતી. લક્ષ્યાંકનો પીછો કરી રહેલી મુંબઈની ટીમ મુશ્કેલીમાં હતી અને દબાણ સ્પષ્ટ દેખાઈ રહ્યું હતું. ઓવરટનની ઓવરના છેલ્લા બોલ પર તિલક વર્માએ 2 રન લેવાનો પ્રયાસ કર્યો હતો, પરંતુ તે સફળ રહ્યો નહોતો. આ દરમિયાન બંને ખેલાડીઓ વચ્ચે શબ્દોની આપ-લે શરૂ થઈ હતી.

Heat. Pressure. Drama 😤

This rivalry never disappoints 🔥#TATAIPL 2026 | #MIvCSK | LIVE NOW 👉 https://t.co/vkBKeocOG2 pic.twitter.com/hETDJPFFK3

— Star Sports (@StarSportsIndia) April 23, 2026

વીડિયોમાં જોઈ શકાય છે કે તિલક વર્મા ઓવરટન તરફ હાથથી ઈશારો કરીને કંઈક કહી રહ્યો હતો, જેનો ઓવરટને પણ આક્રમક રીતે જવાબ આપ્યો હતો. બંને ખેલાડીઓ વચ્ચેની આ ઉગ્ર દલીલોને કારણે અમ્પાયરે પણ દરમિયાનગીરી કરવી પડી હતી.

સૂર્યકુમાર યાદવે મામલો થાળે પાડ્યો

વિવાદ વધતો જોઈને મેદાન પર હાજર મુંબઈ ઇન્ડિયન્સના સીનિયર બેટ્સમેન સૂર્યકુમાર યાદવ તુરંત આગળ આવ્યા હતા. તેમણે એક જવાબદાર ખેલાડી તરીકે તિલક વર્માને શાંત પાડ્યો હતો અને ત્યારબાદ જેમી ઓવરટન સાથે વાત કરીને મામલો થાળે પાડ્યો હતો. આ ઘટનાનો વીડિયો હાલ સોશિયલ મીડિયા પર જોરદાર વાયરલ થઈ રહ્યો છે અને ફેન્સમાં ચર્ચાનો વિષય બન્યો છે.

મેચની સ્થિતિ અને પ્રદર્શન

તિલક વર્મા, જેમણે અગાઉની મેચમાં શાનદાર સદી ફટકારી હતી, તેઓ આ મેચમાં મોટી ઇનિંગ રમવામાં નિષ્ફળ રહ્યા હતા. તેમણે 29 બોલમાં 37 રન બનાવ્યા હતા અને આખરે અકીલ હોસીનનો શિકાર બન્યા હતા.

નોંધનીય છે કે, ચેન્નાઈએ આપેલા 208 રનના વિશાળ લક્ષ્યાંક સામે મુંબઈની આખી ટીમ માત્ર 104 રનમાં ઓલઆઉટ થઈ ગઈ હતી. મેદાન પરના આ વિવાદે મેચના રોમાંચમાં વધારો કર્યો હતો, પરંતુ અંતે ચેન્નાઈએ એકતરફી વિજય મેળવ્યો હતો.