IND vs NZ: ભારતીય ક્રિકેટ ટીમમાં એક એવા સ્ટાર બોલરની વાપસી થઈ છે, જેણે પોતાની સ્વિંગ બોલિંગથી વિશ્વના દિગ્ગજ બેટ્સમેનોને ચિંતામાં મૂકી દીધા છે. અનુભવી ઝડપી બોલર ભુવનેશ્વર કુમાર (Bhuvneshwar Kumar) આશરે ચાર વર્ષના લાંબા સમયગાળા બાદ ફરી એકવાર ભારતીય ટી20 ટીમમાં વાપસી કરી રહ્યા છે. ગુરુવારથી ન્યૂઝીલેન્ડ સામે શરૂ થઈ રહેલી ટી20 શ્રેણીમાં ભુવી પોતાના સ્વિંગનો જાદુ વિરોધી બેટ્સમેનો પર બતાવવા તૈયાર છે.
ભુવનેશ્વર કુમારની આ વાપસી પર ભારતીય ટીમના પૂર્વ કેપ્ટન રોહિત શર્માએ પણ એક ખૂબ જ દિલને સ્પર્શી જાય તેવો સંદેશ મોકલ્યો છે, જેની સોશિયલ મીડિયા પર જોરદાર ચર્ચા થઈ રહી છે.
રોહિત શર્માએ મોકલ્યો ખાસ મેસેજ
ભુવનેશ્વર કુમાર વર્ષ 2022ના ટી20 વર્લ્ડ કપમાં રોહિત શર્માની કેપ્ટનશિપ હેઠળ રમ્યો હતો, જ્યાં ભારતનો સફર સેમિફાઇનલમાં સમાપ્ત થયો હતો. ત્યારબાદ ન્યૂઝીલેન્ડના પ્રવાસ પછી ભુવીને ટીમ બહાર કરવામાં આવ્યો હતો.
હવે ચાર વર્ષના લાંબા સંઘર્ષ બાદ ભુવનેશ્વર કુમારની કમબેક પર વાત કરતા પૂર્વ કેપ્ટન રોહિત શર્માએ 'ફેમિલી ફૂલ હાઉસ વિથ રોહિત શર્મા' કાર્યક્રમ દરમિયાન કહ્યું હતું કે- અમે ન્યૂઝીલેન્ડ જઈ રહ્યા છીએ. હું આશા રાખીશ અને પૂરી શુભેચ્છા આપું છું કે ભુવી ત્યાં સારું પ્રદર્શન કરે. રોહિત શર્માનો આ નાનો પણ પ્રોત્સાહક મેસેજ દર્શાવે છે કે રોહિત અને સમગ્ર ફેન્સને ભુવી પાસેથી કેટલી મોટી અપેક્ષાઓ છે.
વેસ્ટ ઇન્ડીઝ સામે તક ન મળી, હવે ક્રાઇસ્ટચર્ચમાં નજર
ઉલ્લેખનીય છે કે, ભુવનેશ્વર કુમારને વેસ્ટ ઇન્ડીઝ સામેની પાંચમી ટી20 મેચમાં ટીમ સાથે જોડવામાં આવ્યો હતો. જોકે, કમનસીબે તે મેચ વરસાદના કારણે રદ થઈ ગઈ હતી અને ભુવીને બોલિંગ કરવાનો મોકો મળ્યો નહોતો. પરંતુ હવે તે ન્યૂઝીલેન્ડના ક્રાઇસ્ટચર્ચ ખાતે રમાનારી મેચમાં શાનદાર વાપસી કરવા માટે સજ્જ છે.
IPLમાં ધમાકેદાર પ્રદર્શનનું મળ્યું ફળ
કોઈપણ ખેલાડી માટે ટીમમાં વાપસી કરવી આસાન નથી હોતી, પરંતુ ભુવનેશ્વર કુમારે પોતાની મહેનતથી આ વાત શક્ય બનાવી છે. IPLમાં રોયલ ચેલેન્જર્સ બેંગલુરુ (RCB) તરફથી રમતા તેણે શાનદાર પ્રદર્શન કર્યું હતું. ભુવીએ 2025ની સીઝનમાં 17 વિકેટ અને 2026ની સીઝનમાં 28 વિકેટ ઝડપીને આરસીબીને ચેમ્પિયન બનાવવામાં મહત્વની ભૂમિકા ભજવી હતી.
સતત બે સીઝન સુધી આઈપીએલમાં કરેલા આ વિસ્ફોટક પ્રદર્શનના જોરે જ તેમની માટે ટીમ ઇન્ડિયાના દરવાજા ફરી ખુલ્યા છે.
ન્યૂઝીલેન્ડ ટી20 શ્રેણી માટે ભારતીય સ્ક્વોડ
શ્રેયસ અય્યર (કેપ્ટન), અભિષેક શર્મા, સંજુ સેમસન, વૈભવ સૂર્યવંશી, ઈશાન કિશન, તિલક વર્મા, અક્ષર પટેલ, શિવમ દુબે, નીતિશ કુમાર રેડ્ડી, નમન ધીર, પ્રિન્સ યાદવ, મયંક યાદવ, અર્શદીપ સિંહ, ભુવનેશ્વર કુમાર, વરુણ ચક્રવર્તી, કુલદીપ યાદવ.