IND vs WI: ભારતના સ્પિનર કુલદીપ યાદવે વેસ્ટ ઈન્ડિઝ સામેની બીજી એક દિવસીય મેચમાં શાનદાર બોલિંગ કરતા બે વિકેટ ઝડપી હતી. આ સાથે જ તેણે એક દિવસીય ક્રિકેટમાં પોતાની 200 વિકેટ પૂરી કરી લીધી છે. કુલદીપે આ સિદ્ધિ સાથે અનેક મોટા રેકોર્ડ્સ પોતાના નામ કરી લીધા છે અને શેન વોર્ન તથા ઝાહીર ખાન જેવા દિગ્ગજોને પાછળ છોડી દીધા છે.
કુલદીપે પ્રથમ એક દિવસીય મુકાબલામાં પણ શાનદાર બોલિંગ કરીને 4 વિકેટ ઝડપી હતી. આ બીજી મેચમાં જ્યાં એક તરફ તમામ ભારતીય બોલરો વિરુદ્ધ રન વરસી રહ્યા હતા, ત્યારે બીજી તરફ કુલદીપ પ્રમાણમાં સારી બોલિંગ કરી રહ્યો હતો. જો કે, છેલ્લી ઓવરોમાં વેસ્ટ ઈન્ડિઝના બેટ્સમેનોએ તેમના પર પણ પ્રહાર કર્યા, છતાં તેણે બે મહત્વની વિકેટ ઝડપીને પોતાનું ખાસ 'ડબલ સેન્ચુરી' પૂરી કરી હતી.
કુલદીપ યાદવે વનડેમાં પૂરી કરી 200 વિકેટ
કુલદીપને 200 વિકેટ પૂરી કરવા માટે માત્ર બે જ વિકેટની જરૂર હતી. તેણે બે વિકેટ લેતાની સાથે જ ભારત માટે વનડે ક્રિકેટમાં 200 વિકેટનો આંકડો પાર કરી લીધો છે. આ કમાલ કરનારો તે ભારતનો નવમો બોલર બની ગયો છે. આ ઉપરાંત, તે 200 વિકેટ ઝડપનારા માત્ર ચોથો સ્પિનર બન્યો છે. તેની અગાઉ અનિલ કુંબલે, હરભજન સિંહ અને રવીન્દ્ર જાડેજા આ સિદ્ધિ હાંસલ કરી ચૂક્યા છે.
કુલદીપ યાદવે શેન વોર્નને પાછળ છોડ્યો
કોઈપણ સ્પિનર દ્વારા વનડે ક્રિકેટમાં સૌથી ઓછા બોલમાં 200 વિકેટ લેવાના મામલે કુલદીપ યાદવ ત્રીજા ક્રમે પહોંચી ગયો છે. તેણે મહાન સ્પિનર શેન વોર્નને પાછળ છોડી દીધો છે. વનડેમાં સૌથી ઓછા બોલમાં 200 વિકેટ પૂરી કરવાનો રેકોર્ડ પાકિસ્તાનના પૂર્વ સ્પિનર સક્લેન મુશ્તાકના નામે છે, જેણે 5451 બોલમાં આ સિદ્ધિ મેળવી હતી.
વનડેમાં સૌથી ઓછા બોલમાં વિકેટ ઝડપનાર સ્પિનર્સ
- સક્લેન મુશ્તાક - 5451
- રાશિદ ખાન - 5782
- કુલદીપ યાદવ - 6319
- એડમ ઝામ્પા - 6385
- આદિલ રશીદ - 6881
- શેન વોર્ન - 6983
કુલદીપ યાદવ યાદીમાં બીજા સ્થાને પહોંચ્યો
ભારત માટે સૌથી ઓછા વનડે મુકાબલા રમીને 200 વિકેટ પૂરી કરવાના મામલે કુલદીપ બીજા ક્રમે પહોંચી ગયો છે. તેણે અજીત અગરકર અને ઝાહીર ખાનને પણ પાછળ છોડી દીધા છે. કુલદીપે 123 મેચોમાં 200 વિકેટ પૂરી કરી છે. આ યાદીમાં પ્રથમ ક્રમે મોહમ્મદ શમી મોજૂદ છે.
ભારત માટે સૌથી ઓછી મેચોમાં 200 વિકેટ પૂરી કરનાર બોલર્સ
- મોહમ્મદ શમી - 104 મેચ
- કુલદીપ યાદવ - 123 મેચ
- અજીત અગરકર - 133 મેચ
- ઝાહીર ખાન - 144 મેચ
- અનિલ કુંબલે - 147 મેચ
- જવંગલ શ્રીનાથ - 147 મેચ