IND W vs THAI W: મહિલા એશિયા કપ 2026માં ભારતીય મહિલા ક્રિકેટ ટીમે પોતાના વિજયી અભિયાનની શાનદાર શરૂઆત કરી છે. થાઇલેન્ડ સામે રમાયેલી પોતાની પ્રથમ મેચમાં હરનમપ્રીત કૌરની ટીમે 94 રને વિજય મેળવ્યો હતો. મેચમાં એક સમયે મિડલ ઓર્ડરના ધબડકાને કારણે ભારતીય ટીમ મુશ્કેલીમાં મુકાઈ ગઈ હતી, પરંતુ ઓપનર શેફાલી વર્માની અડધી સદી અને ત્યારબાદ બોલરોના શાનદાર પ્રદર્શનના જોરે ભારતે મેચ પર સંપૂર્ણ કબજો જમાવી લીધો હતો.
મંધાનાએ માત્ર 19 રન બનાવીને પણ રચ્યો નવો ઈતિહાસ
ટોસ હારીને પહેલા બેટિંગ કરવા ઉતરેલી ભારતીય ટીમને ઓપનર સ્મૃતિ મંધાના અને શેફાલી વર્માએ ઝડપી શરૂઆત અપાવી હતી. બંને વચ્ચે પ્રથમ વિકેટ માટે 38 રનની ભાગીદારી થઈ હતી. સ્મૃતિ મંધાના 19 રનના વ્યક્તિગત સ્કોરે રનઆઉટ થઈ ગઈ હતી, પરંતુ આ નાની ઇનિંગ દરમિયાન પણ તેણે એક મોટો ઐતિહાસિક રેકોર્ડ પોતાના નામે કરી લીધો હતો.
મંધાના હવે મહિલા આંતરરાષ્ટ્રીય ક્રિકેટમાં સૌથી વધુ રન બનાવનારા બેટરોની યાદીમાં વિશ્વમાં બીજા ક્રમે પહોંચી ગઈ છે. તેણે ન્યૂઝીલેન્ડની સુજી બેટ્સને પાછળ છોડી દીધી છે. હવે તેના નામે 10,756 આંતરરાષ્ટ્રીય રન નોંધાયેલા છે અને તે માત્ર ભારતની પૂર્વ સુકાની મિતાલી રાજ (10,868 રન)થી પાછળ છે.
શેફાલી વર્માની વિસ્ફોટક ફિફ્ટી, પણ મિડલ ઓર્ડર ધબડાયો
બીજી તરફ ઓપનર શેફાલી વર્માએ થાઇલેન્ડના બોલરો સામે આક્રમક બેટિંગ ચાલુ રાખી હતી. શેફાલીએ માત્ર 36 બોલમાં 8 ચોગ્ગા અને 3 છગ્ગાની મદદથી 64 રનની શાનદાર ઇનિંગ રમી હતી.
ભારતે 10 ઓવરમાં 2 વિકેટે 100 રન બનાવી લીધા હતા અને એક સમયે ટીમ 180+ નો સ્કોર કરશે તેમ લાગતું હતું. પરંતુ 10 ઓવર પછી થાઇલેન્ડના બોલરોએ મેચમાં વાપસી કરી હતી. ભારતે પછીની 10 ઓવરમાં માત્ર 58 રન ઉમેરીને 7 વિકેટો ગુમાવી દીધી હતી. અંતમાં ક્રાંતિ ગૌડે અણનમ 15 રન (1 ચોગ્ગો, 1 છગ્ગો) ફટકારીને ભારતને 20 ઓવરમાં 159 રનના સન્માનજનક સ્કોર સુધી પહોંચાડ્યું હતું.
દીપ્તિ અને નંદિનીનો કિલર સ્પેલ: થાઇલેન્ડ 65 રનમાં ઓલઆઉટ
160 રનના લક્ષ્યાંકનો પીછો કરવા ઉતરેલી થાઇલેન્ડની ટીમ ભારતીય બોલિંગ આક્રમણ સામે ટકી શકી નહોતી. ક્રાંતિ ગૌડે પ્રથમ ઓવરમાં જ સફળતા અપાવી હતી, જ્યારે નંદિની શર્માએ ફન્નીતા માયાને ક્લીન બોલ્ડ કરીને થાઇલેન્ડનો સ્કોર 6 રને 2 વિકેટ કરી દીધો હતો.
ત્યારબાદ દીપ્તિ શર્મા અને નંદિની શર્માએ થાઇલેન્ડના મિડલ ઓર્ડરને સંપૂર્ણપણે ધ્વસ્ત કરી નાખ્યો હતો.
દીપ્તિ શર્મા: દીપ્તિએ પોતાની ધારદાર બોલિંગથી એક મેડન ઓવર નાખીને એક જ ઓવરમાં નાઓમી હેમિલ્ટન અને નન્નાફાત ચાઈહાનને પેવેલિયન ભેગા કર્યા હતા. તેણે 3 વિકેટ ઝડપી હતી.
નંદિની શર્મા: નંદિનીએ પણ કંટ્રોલ્ડ બોલિંગ કરીને 3 વિકેટો પોતાના નામે કરી હતી.
શ્રી ચરણી: ચરણીએ પણ શ્રેષ્ઠ સ્પેલ ફેંકીને 2 મહત્ત્વની વિકેટો લીધી હતી.
ભારતીય બોલરોના ખાતમના કારણે થાઇલેન્ડની આખી ટીમ સસ્તામાં સમેટાઈ ગઈ હતી અને ભારતે 94 રને વિશાળ વિજય નોંધાવીને એશિયા કપમાં પોતાના પોઈન્ટ્સ ટેબલનું ખાતું ખોલાવ્યું હતું.