India vs Afghanistan: ભારતીય ક્રિકેટ ટીમની આગામી અફઘાનિસ્તાન સિરીઝ માટે મોટા ફેરફારો થવાના અહેવાલો પ્રાપ્ત થઈ રહ્યા છે. ખાસ કરીને વિકેટકીપર-બેટ્સમેનની પસંદગીને લઈને પસંદગીકારો મુશ્કેલ સ્થિતિમાં હોય તેવું જણાય છે. અહેવાલો મુજબ, શાનદાર ફોર્મમાં હોવા છતાં સંજુ સેમસનને ફરી એકવાર ODI ટીમમાં સ્થાન ન મળે તેવી શક્યતા છે, જ્યારે ખરાબ ફોર્મ સામે ઝઝૂમી રહેલા ઋષભ પંતને ટીમની બહારનો રસ્તો દેખાડવામાં આવી શકે છે.
શુભમન ગિલના નેતૃત્વમાં મેદાને ઉતરશે ભારત
વર્ષ 2026 ની IPL સીઝન પૂર્ણ થયા બાદ તરત જ ભારતીય ટીમ અફઘાનિસ્તાન સામે એક ટેસ્ટ અને ત્રણ મેચની ODI શ્રેણી રમવાની છે. આ શ્રેણીમાં ભારત શુભમન ગિલની કેપ્ટનશીપ હેઠળ મેદાને ઉતરે તેવી પ્રબળ શક્યતા છે. પ્રાપ્ત વિગતો અનુસાર, સ્ટાર બોલર જસપ્રીત બુમરાહને આ શ્રેણીમાં આરામ આપવામાં આવી શકે છે.
વિકેટકીપરની રેસમાં કોણ આગળ?
સૌથી વધુ ચર્ચા વિકેટકીપરની ભૂમિકાને લઈને થઈ રહી છે. 'ધ ટાઇમ્સ ઓફ ઇન્ડિયા' ના અહેવાલ મુજબ, પસંદગીકારો કેએલ રાહુલને પ્રથમ પસંદગીના વિકેટકીપર તરીકે જોઈ રહ્યા છે. આશ્ચર્યજનક બાબત એ છે કે, 2026 T20 વર્લ્ડ કપમાં 'પ્લેયર ઓફ ધ ટુર્નામેન્ટ' બનેલા અને IPL માં પ્રભાવશાળી દેખાવ કરનાર સંજુ સેમસનની અવગણના થઈ શકે છે. તેની જગ્યાએ બેકઅપ વિકેટકીપર તરીકે ઇશાન કિશનને પ્રાધાન્ય આપવામાં આવે તેવી શક્યતા છે.
ઇશાન કિશને તાજેતરમાં સ્થાનિક ક્રિકેટમાં શાનદાર પ્રદર્શન કર્યું છે, જેના કારણે તેને T20 બાદ હવે ODI ટીમમાં પણ વાપસી કરવાની તક મળી શકે છે. બીજી તરફ, ઋષભ પંતનું 2026 ની IPL માં નબળું પ્રદર્શન તેની બાદબાકીનું મુખ્ય કારણ બની શકે છે.
ભારત vs અફઘાનિસ્તાન શ્રેણીનું સમયપત્રક
- 6 જૂન: એકમાત્ર ટેસ્ટ મેચ (નવા ચંદીગઢ)
- 14 જૂન: પ્રથમ ODI (ધર્મશાલા)
- 17 જૂન: બીજી ODI (લખનૌ)
- 20 જૂન: ત્રીજી ODI (ચેન્નાઈ)
અફઘાનિસ્તાન સામેની આ શ્રેણી ભારત માટે 2027 ના વર્લ્ડ કપની તૈયારીઓ અને વર્લ્ડ ટેસ્ટ ચેમ્પિયનશિપ (WTC) ની ફાઈનલમાં સ્થાન મેળવવા માટે અત્યંત મહત્વની છે.
ટીમની પસંદગીની તારીખ
ભારતીય ટીમની સત્તાવાર જાહેરાત 19 મેના રોજ થવાની અપેક્ષા છે. બોર્ડે ટેસ્ટ મેચ માટે સંભવિત ખેલાડીઓને અત્યારથી જ તૈયારીઓ શરૂ કરવા સૂચના આપી દીધી છે. પસંદગીકારોનું પ્રાથમિક લક્ષ્ય જૂન મહિનામાં યોજાનારી WTC ફાઇનલ અને ત્યારબાદ વર્ષના અંતમાં યોજાનારા અન્ય મોટા ટૂર્નામેન્ટો માટે સંતુલિત ટીમ તૈયાર કરવાનું છે.