India vs Afghanistan T20 Series: દિલ્હીના અરુણ જેટલી સ્ટેડિયમ ખાતે રમાયેલી બીજી T20 મેચમાં ભારતીય ટીમે અફઘાનિસ્તાન સામે 7 વિકેટથી જીત મેળવીને ત્રણ મેચની આંતરરાષ્ટ્રીય T20 શ્રેણીમાં 2-0 થી અજેય સરસાઈ પ્રાપ્ત કરી લીધી છે. નીતિશ કુમાર રેડ્ડીની ધારદાર બોલિંગ અને સંજુ સેમસનની તોફાની બેટિંગના બળે ભારત આ શ્રેણી કબજે કરવામાં સફળ રહ્યું છે. હવે શ્રેણીની અંતિમ મેચ ગુરુવારે રમાશે.
ત્રીજી મેચમાં બેન્ચ સ્ટ્રેન્થ અજમાવાશે
આ પણ વાંચો
શ્રેણી પર કબજો મેળવ્યા બાદ ભારતીય કેપ્ટન શ્રેયસ અય્યરે સ્પષ્ટ સંકેત આપ્યા છે કે અંતિમ T20 મેચમાં બેન્ચ પર રહેલા યુવા ખેલાડીઓને અજમાવવામાં આવશે. પ્લેઇંગ-11માં સંભવિત ત્રણ મોટા ફેરફાર જોવા મળી શકે છે. જેમાં વૈભવ સૂર્યવંશી, યશ ઠાકુર અને વોશિંગ્ટન સુંદરને તક મળવાની પ્રબળ શક્યતાઓ છે. વૈભવ સૂર્યવંશીએ ઈંગ્લેન્ડ પ્રવાસ પર જ આંતરરાષ્ટ્રીય ડેબ્યૂ કર્યું હતું, પરંતુ ભારતીય ધરતી પર હોમગ્રાઉન્ડ પર રમવાની તેની આ પ્રથમ તક હશે.
ટીમના પ્રદર્શન પર કેપ્ટન શ્રેયસ અય્યરનું નિવેદન
બીજી T20 માં મોટી જીત મેળવ્યા બાદ ખુશી વ્યક્ત કરતા કેપ્ટન શ્રેયસ અય્યરે જણાવ્યું હતું કે, "અમે શ્રેણીમાં પ્રવેશતી વખતે જ પ્રભાવશાળી જીત મેળવવા માગતા હતા અને બીજી T20 મેચ તેનું ઉત્તમ ઉદાહરણ છે. સુકાની પદની શરૂઆતમાં કેટલાક ચડાવ-ઉતાર આવ્યા હતા, પરંતુ ભૂતકાળને ભૂલીને વર્તમાનમાં રહેવું અત્યંત જરૂરી છે. તમે પરિસ્થિતિઓને જેટલી ઝડપથી અપનાવો છો, પરિણામો તેટલા જ સકારાત્મક આવે છે."
મેચ કન્ડીશન્સથી પરિચિત કરવાનો હેતુ
આગામી મેચમાં ફેરફારો અંગે ચર્ચા કરતા સુકાનીએ ઉમેર્યું કે, ટીમ મેનેજમેન્ટ ઈચ્છે છે કે બહાર બેઠેલા તમામ ખેલાડીઓને મેદાનની પરિસ્થિતિઓથી પરિચિત થવાની અને પૂરતી પ્રેક્ટિસ કરવાની તક મળે. આથી ત્રીજી મેચમાં ટીમ કોમ્બિનેશનમાં ફેરફારો કરીને નવા ખેલાડીઓને તક આપવામાં આવશે.