IND W vs ZIM W T20: ભારતીય મહિલા ક્રિકેટ ટીમની પૂર્વ કેપ્ટન હરમનપ્રીત કૌરે ઝિમ્બાબ્વે સામેની ત્રીજી અને અંતિમ T20 મેચમાં 41 બોલમાં 91 રનની અસાધારણ ઇનિંગ રમી હતી. આ દમદાર ઈનિંગ બાદ બ્રોડકાસ્ટર સાથે વાતચીત કરતી વખતે હરમનપ્રીત અત્યંત ભાવુક થઈ ગઈ અને આંસુ સારીને રડી પડી હતી. ભારતે ઝિમ્બાબ્વેને ત્રીજી T20 મેચમાં 92 રને હરાવીને T20 સિરીઝ 3-0 થી પોતાના નામે કરી લીધી છે.
આ મેચ પહેલા હરમનપ્રીતનું પ્રદર્શન સતત નિરાશાજનક રહ્યું હતું, કારણ કે તેણે અગાઉની 10 મેચમાં એક પણ ફિફ્ટી ફટકારી નહોતી. એશિયા કપ અને એશિયન ગેમ્સ બંનેમાં તેનું ફોર્મ નબળું રહ્યું અને તેણે તાજેતરમાં જ ટીમની કેપ્ટનશીપ પણ છોડી દીધી હતી. જોકે, રાયપુરમાં રમાયેલી આ મેચમાં તેણે ભવ્ય પુનરાગમન કરતા 10 ચોગ્ગા અને 5 છગ્ગાની મદદથી 91 રન બનાવી મેદાનમાં વિતાવેલા સમયનો આનંદ માણ્યો હતો.
મેચ જીત્યા બાદ કોમેન્ટેટર સાથે વાત કરતી વખતે હરમનપ્રીત પોતાના લાગણી પર કાબૂ રાખી શકી નહોતી અને ભાવુક બની ગઈ હતી. ઇન્ટરવ્યુ દરમિયાન ભારતીય મહિલા ટીમના પૂર્વ હેડ કોચ ડબલ્યુવી રમન તેની સાથે વાત કરી રહ્યા હતા, ત્યારે હરમનપ્રીતે પોતાની આ ઇનિંગનો શ્રેય રમનના પ્રોત્સાહક શબ્દોને આપ્યો હતો.
આ ઉપરાંત હરમનપ્રીતે પોતાના બેટિંગ કોચ હિમાંશુનો પણ વિશેષ આભાર માન્યો હતો, જેમણે એશિયન ગેમ્સ પછી નેટ સેશનમાં તેની સાથે સખત મહેનત કરી હતી. ઝિમ્બાબ્વે સામે ટી20 સિરીઝ 3-0 થી ક્લીન સ્વીપ કર્યા બાદ હવે બંને ટીમો વચ્ચે 23 ઓક્ટોબરથી ત્રણ મેચોની વનડે શ્રેણીનો પ્રારંભ થશે.