IND vs USA, T20 World Cup 2026: આજથી શરૂ થઈ રહેલા T20 વર્લ્ડ કપ 2026ના પ્રારંભિક જંગમાં ભારત અને યુનાઇટેડ સ્ટેટ્સ ઓફ અમેરિકા (USA) વચ્ચે મુકાબલો થવા જઈ રહ્યો છે. જોકે, આ મહત્વની મેચ પહેલા ભારતીય કેમ્પમાંથી ચિંતાજનક સમાચાર સામે આવ્યા છે. ટીમ ઈન્ડિયાના મુખ્ય ફાસ્ટ બોલર જસપ્રીત બુમરાહ વાયરલ ફીવરની ઝપેટમાં આવતા આજની મેચમાં રમે તેવી શક્યતા નહિવત છે.
બુમરાહને આરામ, મોહમ્મદ સિરાજની એન્ટ્રી
આ પણ વાંચો
અહેવાલો અનુસાર, ટીમ મેનેજમેન્ટ જસપ્રીત બુમરાહની તબિયતને લઈને કોઈ જોખમ લેવા માંગતું નથી. વાનખેડે સ્ટેડિયમ ખાતે રમાનારી આ મેચની પૂર્વસંધ્યાએ બુમરાહ મેદાન પર દેખાયો હતો, પરંતુ તેણે પ્રેક્ટિસ સત્રમાં ભાગ લીધો ન હતો. સાવચેતીના ભાગરૂપે તેમને આરામ આપવામાં આવશે અને તેમના સ્થાને મોહમ્મદ સિરાજ પ્લેઈંગ ઈલેવનમાં સામેલ થાય તેવી પ્રબળ શક્યતા છે. નોંધનીય છે કે, હર્ષિત રાણા ઈજાગ્રસ્ત થતા સિરાજને છેલ્લી ઘડીએ ટીમમાં સ્થાન મળ્યું છે.
માત્ર 13 ખેલાડીઓ ફિટ, પસંદગીનો પેચ ફસાયો
ભારતીય ટીમ હાલમાં ખેલાડીઓની ફિટનેસને લઈને સંઘર્ષ કરી રહી છે. હાલના તબક્કે ટીમ પાસે પસંદગી માટે માત્ર 13 ફિટ ખેલાડીઓ ઉપલબ્ધ છે. ઓલરાઉન્ડર વોશિંગ્ટન સુંદર હજુ પણ સંપૂર્ણ ફિટ નથી અને બેંગલુરુમાં ક્લિયરન્સની રાહ જોઈ રહ્યો છે. આ સંજોગોમાં કેપ્ટન અને કોચ માટે સંતુલિત પ્લેઈંગ ઈલેવન તૈયાર કરવી એક મોટો પડકાર બની રહેશે.
ઈશાન કિશનને મોટી જવાબદારી
બેટિંગ વિભાગમાં ઈશાન કિશન અને અભિષેક શર્માની જોડી ઈનિંગની શરૂઆત કરે તેવી શક્યતા છે. સંજુ સેમસન અત્યારે ખરાબ ફોર્મ સામે ઝઝૂમી રહ્યો છે, ત્યારે ટીમ મેનેજમેન્ટે ઈશાન કિશન પર ભરોસો મૂક્યો છે. કિશને દક્ષિણ આફ્રિકા સામેની પ્રેક્ટિસ મેચમાં 53 રન અને ન્યુઝીલેન્ડ સામે 103 રન ફટકારીને શાનદાર ફોર્મનું પ્રદર્શન કર્યું છે.
યુએસએ સામે ભારતની સંભવિત પ્લેઈંગ ઈલેવન (India Playing XI Against USA)
અભિષેક શર્મા, ઈશાન કિશન (વિકેટકીપર), તિલક વર્મા, સૂર્યકુમાર યાદવ (કેપ્ટન), હાર્દિક પંડ્યા, શિવમ દુબે, રિંકુ સિંહ, અક્ષર પટેલ, વરુણ ચક્રવર્તી, મોહમ્મદ સિરાજ, અર્શદીપ સિંહ.