IND vs NZ: ભારત અને ન્યૂઝીલેન્ડ વચ્ચે રમાયેલી ત્રણ મેચની વનડે શ્રેણીમાં ભારતનો 2-1 થી પરાજય થયો છે. ઈન્દોરના હોલકર સ્ટેડિયમમાં રમાયેલી અંતિમ અને નિર્ણાયક મેચમાં ન્યૂઝીલેન્ડે ઐતિહાસિક વિજય મેળવી ભારતમાં પ્રથમવાર વનડે શ્રેણી જીતી લીધી હતી. જોકે, ટીમ ઈન્ડિયાની આ હાર બાદ સ્ટેડિયમમાં જે દ્રશ્યો જોવા મળ્યા તેણે ક્રિકેટ જગતમાં ચર્ચા જગાવી છે.
ગૌતમ ગંભીર વિરુદ્ધ નારેબાજી
ટીમ ઈન્ડિયાની હારથી નિરાશ થયેલા ઈન્દોરના ચાહકોએ મુખ્ય કોચ ગૌતમ ગંભીર પર પોતાનો રોષ ઠાલવ્યો હતો. સ્ટેડિયમમાં હાજર મેદનીએ "ગૌતમ ગંભીર હાય-હાય" ના નારા લગાવવાનું શરૂ કર્યું હતું. જ્યારે આ ઘટના બની ત્યારે તમામ ખેલાડીઓ અને સપોર્ટ સ્ટાફ મેદાન પર જ હાજર હતા. પોતાના જ દેશના કોચ વિરુદ્ધ થતી આ નારેબાજીથી ખેલાડીઓ પણ ચોંકી ગયા હતા.
વિરાટ કોહલીએ સંભાળી બાજી
મુખ્ય કોચ વિરુદ્ધ થઈ રહેલી આ અપમાનજનક નારેબાજી જોઈને પૂર્વ કેપ્ટન વિરાટ કોહલીથી રહેવાયું નહોતું. ભૂતકાળમાં ગંભીર અને કોહલી વચ્ચેના મેદાન પરના વિવાદો જગજાહેર છે, પરંતુ આજે વિરાટે ખેલદિલીનું ઉત્તમ ઉદાહરણ પૂરું પાડ્યું હતું. વિરાટ કોહલીએ તુરંત જ ભીડ તરફ ઈશારો કર્યો અને ચાહકોને ચૂપ રહેવા (Quiet signal) સંકેત આપ્યો હતો. તેણે હાથના ઈશારાથી સમજાવ્યું હતું કે આ રીતે કોચનું અપમાન કરવું યોગ્ય નથી. વિરાટની આ હૃદયસ્પર્શી પ્રતિક્રિયાનો વીડિયો સોશિયલ મીડિયા પર વાયુવેગે વાયરલ થઈ રહ્યો છે અને લોકો તેના બદલાયેલા અંદાજની પ્રશંસા કરી રહ્યા છે.
ન્યૂઝીલેન્ડનો ઐતિહાસિક વિજય
આ શ્રેણી ભારત માટે ઘણી રીતે નિરાશાજનક રહી છે:
- ન્યૂઝીલેન્ડે પ્રથમવાર ભારતમાં દ્વિપક્ષીય વનડે શ્રેણી જીતી છે.
- શ્રેણી 2-1થી કિવિઝ ટીમના નામે રહી.
- ઘરઆંગણે ભારતનો આ પરાજય આગામી ટુર્નામેન્ટ પહેલા ચિંતાનો વિષય બન્યો છે.