Gurnoor Brar Tim Seifert Fight: ભારત અને ન્યૂઝીલેન્ડ વચ્ચે શુક્રવારે (13 નવેમ્બર) માઉન્ટ મૌંગાનુઈના 'બે ઓવલ' (Bay Oval) મેદાન ખાતે રમાઈ રહેલી પાંચ મેચોની વન-ડે સિરીઝની ચોથી મેચમાં મેદાન પર ભારે તણાવપૂર્ણ અને ગરમાગરમીભર્યું દ્રશ્ય જોવા મળ્યું હતું. ન્યૂઝીલેન્ડની ઈનિંગ્સ દરમિયાન ભારતીય ઝડપી બોલર ગુરનૂર બ્રાર અને કિવિ વિકેટકીપર-બેટ્સમેન ટિમ સીફર્ટ વચ્ચે ઉગ્ર બોલાચાલી થઈ હતી, જેમાં પૂર્વ કેપ્ટન વિરાટ કોહલીને તાત્કાલિક વચ્ચે પડીને મામલો શાંત પાડવો પડ્યો હતો.
12મી ઓવરમાં વિકેટ બાદ સર્જાયો વિવાદ
આ સમગ્ર ઘટના ન્યૂઝીલેન્ડની ઈનિંગ્સની 12મી ઓવરના અંતિમ બોલ પર બની હતી. ઝડપી બોલર ગુરનૂર બ્રારે એક શોર્ટ બોલ ફેંક્યો હતો, જેના પર ટિમ સીફર્ટે પુલ શોટ રમવાનો પ્રયાસ કર્યો હતો. જોકે, બોલની ગતિ સાથે યોગ્ય તાલમેલ ન બેસતાં બોલ બેટના ઉપરના ભાગમાં અડીને હવામાં ઊંચો ચડ્યો હતો. વિકેટની પાછળ ઉભેલા વિકેટકીપર ઈશાન કિશને પોતાની ડાબી તરફ દોટ લગાવીને આગળની તરફ શાનદાર ડાઈવ મારીને કેચ ઝડપી લીધો હતો.
વિકેટ મળતાની સાથે જ ગુરનૂર બ્રાર અત્યંત આક્રમક અંદાજમાં આવી ગયો હતો અને તેણે સીધા જ ટિમ સીફર્ટની નજીક જઈને જોરદાર ઉજવણી કરી હતી. આ દરમિયાન બંને ખેલાડીઓ વચ્ચે તીખા શબ્દોની આપ-લે થઈ હતી અને માહોલ ગરમાયો હતો. પરિસ્થિતિ વણસે તે પહેલાં જ વિરાટ કોહલીએ તરત જ હસ્તક્ષેપ કર્યો હતો અને ગુરનૂર બ્રારને સીફર્ટથી દૂર ખસેડ્યો હતો. જોકે, આ દરમિયાન કોહલી પણ પૂરા જોશમાં જોવા મળ્યો હતો અને તેણે સીફર્ટ તરફ જોઈને પોતાની પ્રતિક્રિયા આપી હતી.
સુનીલ ગાવસ્કરે વ્યક્ત કરી નારાજગી
આઉટ થતાં પહેલાં ટિમ સીફર્ટે શાનદાર બેટિંગ કરતા 48 બોલમાં 6 ચોગ્ગા અને 3 છગ્ગાની મદદથી 58 રન બનાવ્યા હતા. તેણે વિલ યંગ સાથે મળીને પ્રથમ વિકેટ માટે 85 રનની મજબૂત ભાગીદારી નોંધાવી હતી.
બીજી તરફ, કોમેન્ટ્રી કરી રહેલા ટીમ ઈન્ડિયાના પૂર્વ દિગ્ગજ કેપ્ટન સુનીલ ગાવસ્કરે ગુરનૂર બ્રારના આ આક્રમક વર્તન સામે સખત નારાજગી વ્યક્ત કરી હતી. ગાવસ્કરે સ્પષ્ટ શબ્દોમાં જણાવ્યું હતું કે, જ્યારે બેટ્સમેન આઉટ થઈ ચૂક્યો હોય, ત્યારે તેની પાસે જઈને ઉશ્કેરવાની કે બિનજરૂરી દલીલ કરવાની કોઈ જરૂર નથી.