India vs England 2nd Test: ભારત અને ઇંગ્લેન્ડ વચ્ચે બર્મિંગહામમાં રમાયેલી ટેસ્ટ મેચના ત્રીજા દિવસે ટેસ્ટ ક્રિકેટના ઇતિહાસમાં એક અનોખો પણ શરમજનક રેકોર્ડ નોંધાયો છે. ટેસ્ટ ક્રિકેટના 148 વર્ષ, 3 મહિના અને 20 દિવસના ઈતિહાસ બાદ 10,000મો ડક નોંધાયો છે.
આ રેકોર્ડ ઇંગ્લેન્ડના બ્રાઇડન કાર્સના નામે નોંધાયો હતો, જે ટેસ્ટ ક્રિકેટના ઈતિહાસમાં 10000મો બેટ્સમેન બન્યો જે ખાતું ખોલ્યા વિના આઉટ થયો. તેની સાથે જ જોશ ટોંગ 10001મો અને શોએબ બશીર 10002મો ડકનો ભોગ બન્યો છે.
ટેસ્ટ મેચના ત્રીજા દિવસે ભારતીય બોલરોએ શાનદાર પ્રદર્શન કર્યું હતું. મોહમ્મદ સિરાજે 70 રનમાં 6 વિકેટ ઝડપી લીધી હતી. તેમની બોલિંગ સામે ઇંગ્લેન્ડના ચાર ખેલાડીઓ- બેન સ્ટોક્સ, બ્રાઇડન કાર્સ, જોશ ટોંગ અને શોએબ બશીર એક પણ રન બનાવ્યા વિના પેવેલિયન પરત ફર્યા હતા.
400 રન છતાં ઇંગ્લેન્ડના 6 બેટ્સમેન ડક પર આઉટ
ઇંગ્લેન્ડની પ્રથમ ઇનિંગમાં અનોખી ઘટના સામે આવી છે. ટીમે 400થી વધુ રન બનાવ્યા હોવા છતાં તેના 6 બેટ્સમેન ખાતું ખોલ્યા વિના પેવેલિયન પરત ફર્યા. આ બેટ્સમેન હતા - બેન ડકેટ, ઓલી પોપ, બેન સ્ટોક્સ, બ્રાઇડન કાર્સ, જોશ ટોંગ અને શોએબ બશીર. ટેસ્ટ ક્રિકેટના ઇતિહાસમાં આ પહેલીવાર બન્યું છે કે કોઈ ટીમે 400+ રન બનાવ્યા હોવા છતાં 6 બેટ્સમેન ડકનો ભોગ બન્યા હોય. ઇંગ્લેન્ડની આ અસામાન્ય સિદ્ધિએ રેકોર્ડબુકમાં પોતાનું અનોખું સ્થાન બનાવી લીધું છે.