WPL 2026 Harmanpreet Kaur: મુંબઈ ઈન્ડિયન્સની કેપ્ટન હરમનપ્રીત કૌરે મહિલા પ્રીમિયર લીગ (WPL)માં નવો ઈતિહાસ રચ્યો છે. તે આ લીગમાં 1000 કે તેથી વધુ રન બનાવનારી એકમાત્ર ભારતીય બેટ્સમેન બની ગઈ છે. અત્યાર સુધી અન્ય કોઈ ભારતીય બેટ્સમેન આ સિદ્ધિ મેળવી શક્યા નથી. એકંદરે (ભારતીય અને વિદેશી બંને મળીને) તે 1000 પ્લસ રન બનાવનારી બીજી ક્રિકેટર બની છે.
ગુજરાત જાયન્ટ્સ સામે રમી તોફાની ઈનિંગ
13 જાન્યુઆરીના રોજ ગુજરાત જાયન્ટ્સ સામે રમાયેલી મેચમાં હરમનપ્રીત કૌરે શાનદાર પ્રદર્શન કર્યું હતું. તેણે માત્ર 43 બોલમાં 71 રનની આક્રમક ઈનિંગ રમી હતી. આ ઈનિંગ દરમિયાન જ તે ભારતની પ્રથમ એવી ક્રિકેટર બની ગઈ જેણે WPLમાં 1000 રન પૂરા કર્યા હોય. આ મેચ પહેલા તે રનના મામલે ટોપ 3ની યાદીમાં બહાર હતી, પરંતુ 71 રનની ઈનિંગને કારણે તે ચોથા સ્થાનેથી સીધી બીજા સ્થાને પહોંચી ગઈ છે.
આ પણ વાંચો
દિગ્ગજ ખેલાડીઓને પછાડી આગળ નીકળી
પોતાના શાનદાર પ્રદર્શનથી હરમનપ્રીતે એક જ દિવસમાં ઓસ્ટ્રેલિયાની બે મહાન ખેલાડીઓ મેગ લેનિંગ અને એલિસ પેરીને પાછળ છોડી દીધી છે. અત્યારે WPLના ઈતિહાસમાં સૌથી વધુ રન નેટ સાયવર બ્રન્ટના નામે છે, જેમણે 1101 રન બનાવ્યા છે. હરમનપ્રીત કૌર 1016 રન સાથે બીજા સ્થાને છે, જ્યારે મેગ લેનિંગ (996 રન) ત્રીજા અને એલિસ પેરી (972 રન) ચોથા સ્થાને છે.
શાનદાર એવરેજ અને સ્ટ્રાઈક રેટ આંકડાઓની વાત કરીએ તો હરમનપ્રીત કૌરે 30 મેચોની 29 ઈનિંગ્સમાં 46.18ની એવરેજ અને 146.18ના સ્ટ્રાઈક રેટથી કુલ 1016 રન બનાવ્યા છે. ટોપ 4 બેટ્સમેનોમાં હરમનપ્રીતનો સ્ટ્રાઈક રેટ સૌથી વધુ છે. આ યાદીમાં શેફાલી વર્મા 887 રન સાથે પાંચમા નંબરે છે, જે આ લિસ્ટમાં બીજી સૌથી વધુ રન બનાવનારી ભારતીય ખેલાડી છે.