GT vs RR Live Streaming, IPL 2026 Qualifier 2: IPL 2026 હવે તેના અંતિમ પડાવ પર પહોંચી ગયું છે. ફાઇનલમાં રોયલ ચેલેન્જર્સ બેંગ્લુરુ (RCB) સામે ટકરાવા માટે આજે શુક્રવારે ક્વોલિફાયર 2 મેચમાં ગુજરાત ટાઇટન્સ (GT) અને રાજસ્થાન રોયલ્સ (RR) સામસામે ટકરાશે. બંને ટીમો માટે આ 'કરો કે મરો' જેવો મુકાબલો છે, કારણ કે આ મેચનો વિજેતા સીધો 31 મેના રોજ રમાનારી ગ્રાન્ડ ફિનાલેમાં પ્રવેશ કરશે. ગુજરાતને ક્વોલિફાયર 1 માં હારનો સામનો કરવો પડ્યો હતો, જ્યારે રાજસ્થાન એલિમિનેટર મેચ જીતીને પ્રચંડ આત્મવિશ્વાસ સાથે મેદાનમાં ઉતરશે.
GT vs RR, IPL 2026 Qualifier 2 લાઇવ સ્ટ્રીમિંગ ડિટેલ્સ
GT vs RR વચ્ચેની IPL 2026 મેચ ક્યારે રમાશે?
GT vs RR વચ્ચેની IPL 2026 મેચ શુક્રવાર, 29 મે ના રોજ રમાશે.
GT vs RR વચ્ચેની IPL 2026 મેચ ક્યાં રમાશે?
GT vs RR વચ્ચેની IPL 2026 મેચ મુલ્લાનપુરના મહારાજા યાદવિન્દ્ર સિંહ ઇન્ટરનેશનલ ક્રિકેટ સ્ટેડિયમ ખાતે રમાશે.
GT vs RR વચ્ચેની IPL 2026 મેચ કયા સમયે શરૂ થશે?
GT vs RR વચ્ચેની IPL 2026 મેચ ભારતીય સમય મુજબ સાંજે 7:30 વાગ્યે શરૂ થશે. ટોસ તેના અડધા કલાક પહેલા, સાંજે 7:00 વાગ્યે થશે.
GT vs RR વચ્ચેની IPL 2026 મેચ ક્યાં જોઈ શકાશે?
GT vs RR વચ્ચેની IPL 2026 મેચ દર્શકો સ્ટાર સ્પોર્ટ્સ ચેનલો પર જોઈ શકશે. મેચનું લાઇવ-સ્ટ્રીમિંગ JioHotstar એપ પર કરવામાં આવશે.
ગુજરાત સામે 15 વર્ષના વૈભવ સૂર્યવંશીનો મોટો પડકાર
આ મેચમાં ગુજરાત ટાઇટન્સ માટે સૌથી મોટો પડકાર રાજસ્થાનના યુવા ઓપનર વૈભવ સૂર્યવંશીને રોકવાનો રહેશે. 15 વર્ષીય વૈભવ આ આખી સીઝનમાં વિરોધી બોલરો માટે એક વણઉકેલાયેલો કોયડો સાબિત થયો છે. સનરાઇઝર્સ હૈદરાબાદ સામેની એલિમિનેટર મેચમાં વૈભવે માત્ર 29 બોલમાં 97 રનની વિસ્ફોટક ઇનિંગ રમીને ખળભળાટ મચાવી દીધો હતો.
બેટિંગ માટે અનુકૂળ આ પિચ પર વૈભવ ફરી એકવાર આક્રમક વલણ અપનાવશે તે નક્કી છે. તેણે આ સીઝનમાં જસપ્રીત બુમરાહથી લઈને પેટ કમિન્સ જેવા દિગ્ગજો સામે સિક્સર ફટકારી છે. જો કે, અગાઉની મેચમાં મોહમ્મદ સિરાજે તેને શોર્ટ-પિચ બોલિંગ પર આઉટ કર્યો હતો. આવી સ્થિતિમાં કાગીસો રબાડા અને મોહમ્મદ સિરાજ જેવા ગુજરાતના ઝડપી બોલરો વૈભવની આ નબળાઈનો લાભ ઉઠાવવાનો પ્રયાસ કરશે.
રાજસ્થાનની મજબૂત કડી: જયસ્વાલ, જુરેલ અને આર્ચર
રાજસ્થાન રોયલ્સની ટીમમાં હાલ વૈભવ સૂર્યવંશી અને ફાસ્ટ બોલર જોફ્રા આર્ચર સૌથી મહત્વના સ્તંભ સાબિત થયા છે. જો કે, વૈભવના શાનદાર ફોર્મને કારણે યશસ્વી જયસ્વાલનું પ્રદર્શન થોડું ઢંકાઈ ગયું છે, પરંતુ તે ગમે ત્યારે મોટી ઇનિંગ રમવા સક્ષમ છે. ત્રીજા નંબર પર ધ્રુવ જુરેલ પણ શાનદાર બેટિંગ કરી રહ્યો છે. વિજેતા લય જાળવી રાખવા માટે રાજસ્થાન પોતાની પ્લેઇંગ ઇલેવનમાં કોઈ ફેરફાર કરે તેવી શક્યતા નહિવત છે.
ગુજરાતના ટોપ ઓર્ડરે જવાબદારી લેવી પડશે
બીજી તરફ, ગુજરાત ટાઇટન્સ પાસે સતત વધુ એક ફાઇનલમાં પહોંચવાની સુવર્ણ તક છે. ગુજરાતની બેટિંગનો મુખ્ય આધાર તેમના ટોપ ઓર્ડર એટલે કે શુભમન ગિલ, સાઇ સુદર્શન અને જોસ બટલર પર રહેશે. જો રાજસ્થાનની ટીમ પ્રથમ બેટિંગ કરીને 250 થી વધુ રન બનાવશે, તો ગિલ અને સુદર્શન પર દબાણ વધી શકે છે. સુદર્શન સાતત્યપૂર્ણ રમત રમે છે, પરંતુ તે ઇનિંગની શરૂઆતથી જ મોટો એટેક કરવા માટે જાણીતો નથી.
ગુજરાત માટે તેમની ડેથ ઓવર્સની બોલિંગ અને ફિલ્ડિંગ ચિંતાનો વિષય છે. છેલ્લી મેચમાં આરસીબી સામે ધર્મશાલામાં કેપ્ટન રજત પાટીદાર સામે ગુજરાતના બોલરોએ ઘણા રન લૂંટાવ્યા હતા. જો કે, રાહુલ તેવતિયાનું 'ઇમ્પેક્ટ પ્લેયર' તરીકે આવીને સૌથી વધુ રન બનાવવું એ ટીમ માટે મોટી રાહત છે. હવે જોવાનું એ રહેશે કે શું ગુજરાત પ્લેઇંગ ઇલેવનમાં કોઈ મોટો ફેરફાર કરવાનું જોખમ લે છે કે નહીં.
બંને ટીમોની સંભવિત પ્લેઇંગ ઇલેવન
ગુજરાત ટાઇટન્સ (GT): સાઇ સુદર્શન, શુભમન ગિલ (કેપ્ટન), જોસ બટલર (વિકેટકીપર), વોશિંગ્ટન સુંદર, નિશાંત સિંધુ, જેસન હોલ્ડર, રાશિદ ખાન, કુલવંત ખેજરોલિયા, કાગીસો રબાડા, મોહમ્મદ સિરાજ, પ્રસિદ્ધ ક્રિષ્ના.
રાજસ્થાન રોયલ્સ (RR): યશસ્વી જયસ્વાલ, વૈભવ સૂર્યવંશી, ધ્રુવ જુરેલ (વિકેટકીપર), રિયાન પરાગ (કેપ્ટન), ડોનોવન ફરેરા, દાસુન શનાકા, રવિન્દ્ર જાડેજા, જોફ્રા આર્ચર, નાન્દ્રે બર્ગર, બ્રિજેશ શર્મા, યશ રાજ પુંજા.