Glenn Maxwell Retirement: વિશ્વ ક્રિકેટના સૌથી આક્રમક અને મેચ-વિનર ઓલરાઉન્ડરોમાંના એક એવા ઓસ્ટ્રેલિયાના ગ્લેન મેક્સવેલે આંતરરાષ્ટ્રીય ક્રિકેટમાંથી નિવૃત્તિની સત્તાવાર જાહેરાત કરી દીધી છે. 'ધ ફાઈનલ વર્ડ પોડકાસ્ટ' પર વાત કરતી વખતે મેક્સવેલે સ્વીકાર્યું હતું કે આ નિર્ણય થોડો ભાવુક અને દુઃખદ છે, પરંતુ અનપેક્ષિત નથી. આંતરરાષ્ટ્રીય સ્તરની સાથે તેમણે વિક્ટોરિયા માટે 50-ઓવર અને ચાર દિવસીય સ્થાનિક ક્રિકેટને પણ અલવિદા કહી દીધું છે.
અદ્ભુત કારકિર્દી અને 3 વર્લ્ડ કપ વિજયનો હિસ્સો
ગ્લેન મેક્સવેલે ઓસ્ટ્રેલિયા માટે કુલ 286 આંતરરાષ્ટ્રીય મેચોમાં પ્રતિનિધિત્વ કરતા 7,226 રન બનાવ્યા છે અને 136 વિકેટો ઝડપી છે. પોતાની આક્રમક બેટિંગ, અસરકારક ઓફ-સ્પિન અને ચપળ ફિલ્ડિંગ માટે જાણીતા મેક્સવેલ ઓસ્ટ્રેલિયાની તે સુવર્ણ ટીમનો મહત્વનો ભાગ હતા જેણે 2015 અને 2023માં વન-ડે (ODI) વર્લ્ડ કપ તેમજ 2021માં T20 વર્લ્ડ કપનો ખિતાબ જીત્યો હતો.
તાજેતરમાં જ જૂન 2025માં તેમણે વન-ડે ક્રિકેટમાંથી નિવૃત્તિ લીધી હતી, જ્યાં તેમની છેલ્લી મેચ ભારત સામે ચેમ્પિયન્સ ટ્રોફીની સેમીફાઈનલ રહી હતી. ત્યારબાદ ક્રિકેટ ઓસ્ટ્રેલિયાની સેન્ટ્રલ કોન્ટ્રાક્ટ યાદીમાંથી બાકાત રહ્યા બાદ અને ટીમ મેનેજમેન્ટ યુવા ખેલાડીઓને તકો આપી રહ્યું હોવાથી તેમણે આખરે આંતરરાષ્ટ્રીય ક્રિકેટમાંથી સંપૂર્ણ વિદાય લેવાનો નિર્ણય કર્યો.
અફઘાનિસ્તાન સામે 201* રનની ઐતિહાસિક ઇનિંગ્સ ક્રિકેટ ઇતિહાસમાં અમર
મેક્સવેલની કારકિર્દીનો સૌથી અવિસ્મરણીય અને અદ્ભુત ક્ષણ 2023ના વન-ડે વર્લ્ડ કપ દરમિયાન વાનખેડે સ્ટેડિયમ ખાતે અફઘાનિસ્તાન સામે જોવા મળ્યો હતો. 292 રનના લક્ષ્યાંકનો પીછો કરતા ઓસ્ટ્રેલિયાએ માત્ર 91 રનમાં 7 વિકેટ ગુમાવી દીધી હતી અને હાર લગભગ નિશ્ચિત જણાતી હતી.
તે સમયે અત્યંત ગંભીર સ્નાયુઓના ખેંચાણ (cramps) છતાં દોડવામાં અસમર્થ હોવા છતાં મેક્સવેલે 128 બોલમાં 21 ચોગ્ગા અને 10 છગ્ગાની મદદથી અણનમ 201 રન ફટકાર્યા હતા. તેમણે કેપ્ટન પેટ કમિન્સ (12*) સાથે આઠમી વિકેટ માટે 202 રનની અજેય ભાગીદારી નોંધાવી ઓસ્ટ્રેલિયાને 3 વિકેટથી ઐતિહાસિક વિજય અપાવ્યો હતો, જેને વન-ડે ઇતિહાસનું શ્રેષ્ઠ પ્રદર્શન ગણવામાં આવે છે.
ફ્રેન્ચાઇઝી લીગમાં રમવાનું ચાલુ રાખશે
સ્થાનિક અને આંતરરાષ્ટ્રીય રેડ-બોલ અને 50-ઓવર ક્રિકેટને અલવિદા કહ્યા બાદ મેક્સવેલે સ્પષ્ટ કર્યું છે કે તેઓ ફ્રેન્ચાઇઝી T20 લીગમાં રમવાનું ચાલુ રાખશે. પોતાના શારીરિક સ્વાસ્થ્ય અને ફિટનેસ પર વધુ ધ્યાન આપીને તેઓ દુનિયાભરની T20 લીગમાં પોતાનો જાદુ વિખેરતા રહેશે. તેમની આંતરરાષ્ટ્રીય નિવૃત્તિથી વિશ્વભરના ક્રિકેટ ચાહકોમાં એક યુગના અંતની લાગણી છવાઈ ગઈ છે.