Devdutt Padikkal Century: કર્ણાટકના સ્ટાર ઓપનિંગ બેટ્સમેન દેવદત્ત પડિક્કલે વિજય હજારે ટ્રોફી 2025-26માં પોતાનું શાનદાર ફોર્મ ચાલુ રાખતા ત્રિપુરા સામે ધમાકેદાર સદી ફટકારી છે. અમદાવાદના નરેન્દ્ર મોદી સ્ટેડિયમમાં 3 જાન્યુઆરી 2026ના રોજ રમાયેલી આ મેચમાં પડિક્કલે 120 બોલમાં 108 રન બનાવ્યા હતા, જેમાં 8 ચોગ્ગા અને 3 છગ્ગાનો સમાવેશ થાય છે. તેની આ સદીના જોરે કર્ણાટકે નિર્ધારિત 50 ઓવરમાં 7 વિકેટ ગુમાવીને 332 રનનો મજબૂત સ્કોર બનાવ્યો હતો.
આ સીઝનમાં દેવદત્ત પડિક્કલનું પ્રદર્શન
આ ટૂર્નામેન્ટમાં દેવદત્ત પડિક્કલે અત્યાર સુધી રમાયેલી પાંચ ઇનિંગ્સમાંથી ચારમાં સદી ફટકારી છે. આ સીઝનમાં તેણે 102.80ની સરેરાશથી કુલ 514 રન બનાવ્યા છે, જેના કારણે તે વર્તમાન સીઝનમાં સૌથી વધુ રન બનાવનાર બેટ્સમેન બની ગયો છે. આ અગાઉ તેણે ઝારખંડ સામે 147, કેરળ સામે 124 અને પુડુચેરી સામે 113 રનની ઇનિંગ્સ રમી હતી.
મયંક અગ્રવાલનો રેકોર્ડ તોડ્યો
લિસ્ટ-એ ક્રિકેટમાં પડિક્કલની આ 13મી સદી છે અને નોંધપાત્ર વાત એ છે કે આ તમામ 13 સદીઓ તેણે વિજય હજારે ટ્રોફીમાં જ ફટકારી છે. આ સાથે જ તે આ ટૂર્નામેન્ટના ઇતિહાસમાં સૌથી વધુ સદી ફટકારનારા ખેલાડીઓની યાદીમાં ત્રીજા સ્થાને પહોંચી ગયો છે. તેણે કર્ણાટકના કેપ્ટન મયંક અગ્રવાલ (12 સદી) ને પાછળ છોડી દીધા છે. હવે આ યાદીમાં તેની આગળ માત્ર અંકિત બાવને (15 સદી) અને ઋતુરાજ ગાયકવાડ (14 સદી) છે.
ટીમ ઇન્ડિયામાં વાપસીના સંકેતો
25 વર્ષીય પડિક્કલ ભારત માટે અત્યાર સુધીમાં 2 ટેસ્ટ અને 2 ટી20 આંતરરાષ્ટ્રીય મેચ રમી ચૂક્યો છે, જેમાં તેણે ટેસ્ટમાં 90 રન અને ટી20માં 38 રન બનાવ્યા છે. વિજય હજારે ટ્રોફીમાં તેના આ સાતત્યપૂર્ણ પ્રદર્શનને જોતા પસંદગીકારોનું ધ્યાન ફરી એકવાર તેની તરફ ખેંચાયું છે અને ટીમ ઇન્ડિયામાં તેની વાપસીની પ્રબળ શક્યતાઓ દેખાઈ રહી છે.