Richard Marles on Virat Kohli: ઇન્ડિયન પ્રીમિયર લીગ (IPL) 2026 માં રોયલ ચેલેન્જર્સ બેંગ્લુરુ (RCB) એ સતત બીજી વખત ટ્રોફી જીતીને નવો ઇતિહાસ રચ્યો છે. આ શાનદાર વિજય બાદ દેશ-વિદેશમાંથી અભિનંદનનો વરસાદ થઈ રહ્યો છે, જેમાં હવે ઓસ્ટ્રેલિયાના નાયબ વડાપ્રધાન રિચાર્ડ માર્લ્સ પણ જોડાયા છે. તેમણે બેંગ્લુરુની જીત પર ખુશી વ્યક્ત કરતા દિગ્ગજ બેટ્સમેન વિરાટ કોહલીના ભારોભાર વખાણ કર્યા છે અને ભારત-ઓસ્ટ્રેલિયા વચ્ચેના મજબૂત ક્રિકેટ સંબંધો પર વિશેષ ભાર મૂક્યો છે.
અમદાવાદના નરેન્દ્ર મોદી સ્ટેડિયમમાં રમાયેલી હાઇ-વોલ્ટેજ ફાઇનલ મેચમાં રોયલ ચેલેન્જર્સ બેંગ્લુરુએ ગુજરાત ટાઇટન્સને હરાવીને સતત બીજી વખત IPL ટાઈટલ જીત્યું હતું. આ મેચમાં પ્રથમ બોલરોએ શાનદાર પ્રદર્શન કરીને ગુજરાતને રોક્યું હતું અને ત્યારબાદ લક્ષ્યનો પીછો કરતા વિરાટ કોહલીએ 75 રનની અણનમ અને મેચ વિનિંગ ઇનિંગ રમીને ટીમને જીતના શિખરે પહોંચાડી હતી. આ દમદાર પ્રદર્શન માટે કોહલીને 'મેન ઓફ ધ મેચ' જાહેર કરવામાં આવ્યો હતો.
કોહલી, હેઝલવુડ અને ડેવિડની ત્રિપુટી
નવી દિલ્હીમાં આયોજિત એક વિશેષ કાર્યક્રમ દરમિયાન ઓસ્ટ્રેલિયાના નાયબ વડાપ્રધાન રિચાર્ડ માર્લ્સે આ ઐતિહાસિક મેચ અને બંને દેશો વચ્ચેની ભાગીદારીનો ઉલ્લેખ કર્યો હતો. તેમણે જણાવ્યું કે, આ જીતમાં માત્ર ભારતીય ખેલાડીઓ જ નહીં, પરંતુ ઓસ્ટ્રેલિયન સ્ટાર્સ જોશ હેઝલવુડ અને ટિમ ડેવિડે પણ ખૂબ જ મહત્વપૂર્ણ ભૂમિકા ભજવી છે. નાયબ વડાપ્રધાને આ જીતને ભારત અને ઓસ્ટ્રેલિયા વચ્ચેના મજબૂત સમન્વયનું ઉત્તમ ઉદાહરણ ગણાવ્યું હતું.
તેમણે જણાવ્યું હતું કે, 'ગયા વર્ષે પણ હું IPL ફાઇનલના બીજા જ દિવસે ભારતમાં હતો અને આ વર્ષે પણ સંયોગ એવો જ રહ્યો છે. ગઈકાલે રાત્રે RCB એ શાનદાર વિજય મેળવીને સતત બીજી ટ્રોફી પોતાના નામે કરી. વિરાટ કોહલીને મેન ઓફ ધ મેચ તરીકે જોવો અદ્ભુત હતો, પરંતુ તેની સાથે જોશ હેઝલવુડ અને ટિમ ડેવિડનું યોગદાન પણ એટલું જ મહત્વનું રહ્યું. આ મેચ ખરા અર્થમાં ભારત અને ઓસ્ટ્રેલિયાના સંયુક્ત ખેલ મિજાજનું પ્રતીક હતી.'
'આજે ઓસ્ટ્રેલિયાના ઘરે-ઘરે જાણીતું નામ છે વિરાટ કોહલી'
રિચાર્ડ માર્લ્સે ઓસ્ટ્રેલિયામાં વિરાટ કોહલીની અસાધારણ લોકપ્રિયતા અંગે વાત કરતા કહ્યું કે, 'વર્તમાન સમયમાં વિરાટ કોહલી ઓસ્ટ્રેલિયામાં એક ઘણું મોટું નામ બની ચૂક્યો છે.' તેમણે પોતાના બાળપણના દિવસોને યાદ કરતા ઉમેર્યું કે, 'જ્યારે હું નાનો હતો ત્યારે મને ભારતીય ક્રિકેટ ટીમના પ્રથમ કેપ્ટન બિશન સિંહ બેદી બરાબર યાદ છે. તે સમયના મહાન ખેલાડીઓની એક અલગ ઓળખ હતી, પરંતુ આજે વિરાટ કોહલીનું નામ ઓસ્ટ્રેલિયાના દરેક ખૂણે ગુંજી રહ્યું છે.'
બંને દેશોના હૃદયને જોડતો મજબૂત સેતુ 'ક્રિકેટ'
ઓસ્ટ્રેલિયન નાયબ વડાપ્રધાને સ્પષ્ટ કર્યું હતું કે ક્રિકેટ એ માત્ર રમતની સરહદો પૂરતું સીમિત નથી, પરંતુ તે ભારત અને ઓસ્ટ્રેલિયાને પરસ્પર જોડતું એક અત્યંત મજબૂત બંધન છે. આ રમત બંને દેશોના નાગરિકોને ભાવનાત્મક રીતે નજીક લાવે છે.
આ કાર્યક્રમ દરમિયાન રિચાર્ડ માર્લ્સે ભારતના 1983ના વર્લ્ડ કપ વિજેતા સુકાની અને દિગ્ગજ ઓલરાઉન્ડર કપિલ દેવ સાથે મુલાકાત કરી હતી, જેના વિશે તેમણે ખુશી વ્યક્ત કરતા કહ્યું, 'કપિલ દેવ જેવા મહાન ખેલાડી સાથે મંચ શેર કરવો એ મારા માટે ખૂબ જ ગર્વ અને રોમાંચની ક્ષણ છે. ભારત અને ઓસ્ટ્રેલિયા વચ્ચેના દ્વિપક્ષીય સંબંધો હાલમાં સર્વોચ્ચ સ્તરે છે. જીવન પ્રત્યેનો આપણો જુસ્સો અને ક્રિકેટ પ્રત્યેનો અમારો પરસ્પર પ્રેમ જ આ સંબંધોને વધુ ગાઢ બનાવે છે.'