India vs Sri Lanka Asian Games Final: એશિયન ગેમ્સ 2026 ના વિમેન્સ ક્રિકેટ ટૂર્નામેન્ટમાં ભારતીય મહિલા ટીમનું શ્રેષ્ઠ વર્ચસ્વ જળવાઈ રહ્યું છે. કેપ્ટન હરમનપ્રીત કૌરના નેતૃત્વ હેઠળની ભારતીય ટીમ જાપાન અને બાંગ્લાદેશને એકતરફી મુકાબલામાં હરાવીને ફાઇનલમાં પહોંચી ગઈ છે, જ્યાં મંગળવારે તેનો સામનો શ્રીલંકા સામે થશે. ભારત અને શ્રીલંકા વચ્ચેનો આ ગોલ્ડ મેડલ મુકાબલો જાપાનના નિશિન ખાતે સવારે 10:30 વાગ્યાથી રમાશે. ભારતીય ટીમ આ મેચમાં ગોલ્ડ મેડલ જીતવા માટે સૌથી પ્રબળ દાવેદાર માનવામાં આવે છે.
ભારતીય બેટિંગ અને બોલિંગ લાઇનઅપ મજબૂત
ભારતીય ટીમ અત્યારે તમામ વિભાગોમાં ઉત્કૃષ્ટ ફોર્મમાં છે. ઓપનર શેફાલી વર્મા અને સ્મૃતિ મંધાના શાનદાર ફોર્મમાં છે, જ્યારે ટીમ મેનેજમેન્ટ નંબર-3 માટે જી. કમલિની અને ભારતી ફુલમાલી પર પ્રયોગ કરી રહ્યું છે. કેપ્ટન હરમનપ્રીત કૌર અને વિકેટકીપર રિચા ઘોષ મિડલ ઓર્ડરને મજબૂતી પૂરી પાડે છે. બોલિંગ વિભાગમાં ભારતીય સ્પિનરોનું વર્ચસ્વ રહ્યું છે; અનુભવી દીપ્તિ શર્મા અને શ્રી ચરાણીએ મોટાભાગની વિકેટો ઝડપી છે, જ્યારે ફાસ્ટ બોલિંગમાં નંદિની શર્માએ પ્રભાવશાળી દેખાવ કર્યો છે.
શ્રીલંકા તરફથી કઠિન પડકારની અપેક્ષા
બીજી તરફ, શ્રીલંકાની ટીમ પણ ભારતને કઠિન પડકાર આપવાના ઈરાદા સાથે મેદાનમાં ઉતરશે. સેમીફાઇનલમાં પાકિસ્તાન સામેના લક્ષ્યાંકનો પીછો કરતા શ્રીલંકન કેપ્ટન ચમારી અથાપથ્થુએ 50 બોલમાં 82 રનની તોફાની ઇનિંગ્સ રમીને ટીમને ફાઇનલમાં પહોંચાડી હતી. જોકે, આ જ મહિનાની શરૂઆતમાં યોજાયેલા એશિયા કપની ફાઇનલમાં પણ ભારતે શ્રીલંકાને માત આપી હતી, જેથી ભારતીય ટીમનો આત્મવિશ્વાસ બેવડો થયેલો છે.
ભારતીય ટીમ: હરમનપ્રીત કૌર (કેપ્ટન), સ્મૃતિ મંધાના, શેફાલી વર્મા, જી. કમલિની, રિચા ઘોષ, ભારતી ફુલમાલી, દીપ્તિ શર્મા, શ્રેયંકા પાટિલ, શ્રી ચરાણી, નંદિની શર્મા, ક્રાંતિ ગૌડ, રેણુકા સિંહ ઠાકુર, અરુંધતી રેડ્ડી, રાધા યાદવ.
શ્રીલંકા ટીમ: ચમારી અથાપથુ (કેપ્ટન), ઈમેશા દુલાની, હસિની પરેરા, હર્ષિતા સમરવિક્રમા, કવિશા દિલહારી, હંસિમા કરુણારત્ને, સુગંદિકા કુમારી, નિલાક્ષી દ સિલવા, અનુષ્કા સંજીવની, ચામુડી પ્રબોદા અને સાથી ખેલાડીઓ.