Asian Games 2026: આઈચી-નાગોયા એશિયન ગેમ્સના પહેલા જ દિવસે ભારતીય શૂટર્સે પોતાની સચોટ નિશાનબાજીથી સૌનું ધ્યાન ખેંચ્યું હતું. ભારતની સ્ટાર શૂટર એલાવેનિલ વલારિવને શાનદાર પ્રદર્શન કરતા બે સિલ્વર મેડલ પોતાના નામે કર્યા છે.
ટીમ ઈવેન્ટમાં પહેલું પદક અને વ્યક્તિગત સફળતા
સ્પર્ધાની શરૂઆતમાં એલાવેનિલ વલારિવને સોનમ ઉત્તમ મસ્કર અને વિદર્શા વિનોદ સાથે મળીને મહિલાઓની 10 મીટર એર રાઇફલ ટીમ ઇવેન્ટમાં કમાલ કરી હતી અને ભારત માટે દેશનું ખાતું ખોલાવતા સિલ્વર મેડલ જીત્યો હતો. આ પ્રદર્શન બાદ એલાવેનિલ અટકી ન હતી અને તેમણે વ્યક્તિગત (Individual) 10 મીટર એર રાઇફલ સ્પર્ધામાં પણ પોતાની શ્રેષ્ઠતા સાબિત કરતા વધુ એક સિલ્વર મેડલ દેશની ઝોલીમાં નાખ્યો હતો.
વ્યક્તિગત ફાઈનલ મુકાબલો અત્યંત રોમાંચક રહ્યો હતો, જ્યાં એલાવેનિલે 252.4 પોઈન્ટ્સ મેળવ્યા હતા. ગોલ્ડ મેડલ માટે જાપાનની હિનાતા તાઈચી સાથે તેમની ભારે ટક્કર થઈ હતી. તાઈચીએ 253.0 પોઈન્ટ્સના રેકોર્ડ સ્કોર સાથે ગોલ્ડ જીતી લીધો હતો, જ્યારે દક્ષિણ કોરિયાની હ્યોજિન બાને બ્રોન્ઝ મેડલ પ્રાપ્ત કર્યો હતો. અંતિમ ક્ષણો સુધી બંને ખેલાડીઓ વચ્ચે કાંટાની ટક્કર જોવા મળી હતી.
હૉકી અને ક્રિકેટમાં પણ ભારતનો દબદબો
શૂટિંગ ઉપરાંત અન્ય રમતોમાં પણ ભારતીય ખેલાડીઓએ રવિવારે શાનદાર પર્ફોર્મન્સ આપ્યું હતું:
મહિલા હોકી ટીમ: ભારતીય મહિલા હોકી ટીમે પોતાના પ્રથમ મુકાબલામાં ઉઝ્બેકિસ્તાનની ટીમને 19-01ના સ્કોરથી હરાવીને ટૂર્નામેન્ટમાં ભવ્ય શંખનાદ કર્યો છે.
પુરુષ હૉકી ટીમ: પુરુષ હૉકી ટીમ પણ ઇન્ડોનેશિયા સામે 13-1ના મોટા માર્જિનથી વિજયી રહી હતી.
મહિલા ક્રિકેટ ટીમ: ક્રિકેટના મેદાન પર ભારતીય મહિલાઓએ સેમિફાઇનલ મુકાબલામાં બાંગ્લાદેશને 114 રનોના વિશાળ અંતરથી હરાવીને ગોલ્ડ મેડલ મેચમાં પ્રવેશ કરી લીધો છે, જ્યાં હવે તેમનો મુકાબલો શ્રીલંકા સામે થશે.
બેડમિન્ટન અને ટેબલ ટેનિસ: પી.વી. સિંધુ, ઉન્નતિ હુડા અને તન્વી શર્માની સચોટ રમતને કારણે ભારતીય મહિલા બેડમિન્ટન ટીમે કઝાકિસ્તાનને 3-0થી હરાવ્યું હતું. આ ઉપરાંત, ટેબલ ટેનિસમાં પણ પુરુષ અને મહિલા બંને વર્ગોમાં ઇન્ડોનેશિયા સામે શાનદાર વિજયો નોંધાયા હતા.
મિક્સડ માર્શલ આર્ટ્સ (MMA): સુચિકા તરિયાલે મહિલાઓની 60 કિગ્રા વર્ગની સેમિફાઇનલમાં પહોંચીને ભારત માટે વધુ એક મેડલ પક્કો કરી લીધો છે.
પ્રથમ જ દિવસે શૂટિંગ, હૉકી, ક્રિકેટ અને અન્ય ઇવેન્ટ્સમાં ભારતીય ખેલાડીઓના આક્રમક દેખાવને કારણે આખી ટૂર્નામેન્ટ દરમિયાન ભારતીય છાવણીમાં જોશ અને ઉત્સાહનો માહોલ જોવા મળી રહ્યો છે.