Who is Anil Pandit? મુંબઈમાં બોલીવુડ અભિનેતા ટાઈગર શ્રોફ પર થયેલા ગોળીબારની જવાબદારી અમેરિકાથી ગેંગસ્ટર અનિલ પંડિતે લીધી છે. વાયરલ થયેલા એક ઓડિયોમાં પોતે અનિલ પંડિત હોવાની ઓળખ આપતા એક શખ્સે સલમાન ખાન સાથે કામ કરનારા દરેક શખ્સને નિશાન બનાવવાની ચેતવણી આપી છે.
મુંબઈના જુહુ વિસ્તારમાં રવિવારે સાંજે બોલીવુડ અભિનેતા ટાઇગર શ્રોફની કાર પર અજાણ્યા હુમલાખોરોએ ફાયરિંગ કર્યું હતું. આ ઘટના પછી તુરંત જ અમેરિકામાં સ્થિત ગેંગસ્ટર અનિલ પંડિતે હુમલાની જવાબદારી લીધી છે. વાયરલ થયેલા આ ઓડિયો ક્લિપમાં તેણે પોતાના સાથી હરમન સંધુનું નામ લીધું અને આખી ફિલ્મ ઈન્ડસ્ટ્રીને સીધી ધમકી આપી હતી.
અનિલ પંડિતે માંગ મૂકી કે અભિનેતા સલમાન ખાન લોરેન્સ બિશ્નોઈ અને આખા બિશ્નોઈ સમાજની જાહેરમાં માફી માંગે. તેણે કહ્યું કે, ટાઈગર શ્રોફને પહેલાં પણ ચેતવણી આપવામાં આવી હતી, પરંતુ તેમણે ધ્યાન આપ્યું નહોતું. હવે સલમાન ખાન સાથે કામ કરનારા દરેક શખ્સને નિશાન બનાવવામાં આવશે. આ પહેલી અને આખરી ચેતવણી ગણાવી હતી.
કોણ છે ગેંગસ્ટર અનિલ પંડિત?
મૂળ રૂપે હરિયાણાના પાનીપતનો રહેવાસી અનિલ પંડિત ભારતમાં રહેતા કોઈ મોટા ગુનામાં સામેલ નહોતો અને તેની સામે કોઈ કેસ નોંધાયેલો નહોતો. માહિતી મુજબ, તે 2024માં ડંકી રૂટ દ્વારા અમેરિકા પહોંચ્યો હતો. ત્યાં પહોંચ્યા પછી તે લોરેન્સ બિશ્નોઈ ગેંગ સાથે જોડાયો અને આશરે આઠ મહિના પહેલાં તેણે ગેંગના જૂના સભ્ય રણદીપ મલિકની જગ્યા સંભાળી.
જોકે, તે લોરેન્સ બિશ્નોઈના નામે ધમકી જારી કરી રહ્યો છે, પરંતુ સૂત્રોના જણાવ્યા અનુસાર તેને નિર્દેશો સીધા બિશ્નોઈ પાસેથી મળતા નથી. તેનો મુખ્ય સંચાલક હરી ચંદ જાટ ઉર્ફે હેરી બોક્સર છે, જે 2022થી અમેરિકામાં રહીને કામ કરી રહ્યો છે. તેના પર ભારતમાં ખંડણી તથા જાનલેવા હુમલાના અનેક કેસો નોંધાયેલા છે.
બોલીવુડ પર વધતા હુમલા અને ધમકી
ફિલ્મ ઉદ્યોગ સાથે જોડાયેલી હસ્તીઓને નિશાન બનાવવાની આ કોઈ પહેલી ઘટના નથી. આ અગાઉ 11 જૂને પશ્ચિમ દિલ્હીના પશ્ચિમ વિહારમાં પંજાબી ગાયક ગુરુ રંધાવાના જીમ બહાર વહેલી સવારે બે બાઇક સવાર હુમલાખોરોએ ફાયરિંગ કર્યું હતું, જ્યાંથી પોલીસે સાત ખાલી કારતૂસ બરામદ કર્યા હતા.
આ જ રીતે 1 ફેબ્રુઆરીએ મુંબઈમાં ફિલ્મ નિર્દેશક રોહિત શેટ્ટીના ઘર બહાર ગોળી છોડવામાં આવી, જેના પછી અભિનેતા રણવીર સિંહ અને સલમાન ખાનના સંબંધી આયુષ શર્માને પણ ધમકી મોકલવામાં આવી હતી. આ તમામ કેસોમાં લોરેન્સ બિશ્નોઈ ગેંગનું જ નામ સામે આવ્યું હતું. હવે પોલીસ ટાઇગર શ્રોફની કાર પર થયેલા હુમલામાં અનિલ પંડિતની વાસ્તવિક ભૂમિકાની તપાસ કરી રહી છે.