Weather Today (September 19, 2026) | આજનું હવામાન: ચોમાસાની વિદાય પહેલા ભારતીય હવામાન વિભાગ (IMD) દ્વારા દેશના અનેક રાજ્યો માટે ફરી એકવાર હવામાન બગડવાની ચેતવણી જાહેર કરવામાં આવી છે. આજે 19 સપ્ટેમ્બરના રોજ ઉત્તર પ્રદેશ અને બિહાર સહિત દેશના 20 રાજ્યોમાં ભારે વરસાદની આગાહી છે. આ સાથે જ 70 થી 75 કિમી પ્રતિ કલાકની ઝડપે પવન ફૂંકાવાની અને ગાજવીજ સાથે વાવાઝોડાની ચેતવણી આપવામાં આવી છે.
પશ્ચિમ બંગાળના દરિયાકાંઠે ભારે પવનને કારણે પૂર્વ ભારતના રાજ્યોમાં સ્થિતિ મુશ્કેલ બની શકે છે. દક્ષિણ ગુજરાતથી લઈને ઝારખંડ સુધી એક 'લો પ્રેશર સિસ્ટમ' સક્રિય થઈ છે, જ્યારે સિક્કિમ અને તેની આસપાસના વિસ્તારોમાં સાયક્લોનિક સર્ક્યુલેશન સર્જાયું છે.
કયા 20 રાજ્યોમાં આપવામાં આવ્યું છે વરસાદનું એલર્ટ?
હવામાન વિભાગની આગાહી અનુસાર 19 સપ્ટેમ્બરે ઉત્તર પ્રદેશ, દિલ્હી, બિહાર, રાજસ્થાન, હરિયાણા, પંજાબ, ઉત્તરાખંડ, હિમાચલ પ્રદેશ, જમ્મુ-કાશ્મીર, ઝારખંડ, પશ્ચિમ બંગાળ, મધ્ય પ્રદેશ, છત્તીસગઢ, ઓડિશા, ગુજરાત, મહારાષ્ટ્ર, તમિલનાડુ, તેલંગાણા, આંધ્ર પ્રદેશ અને કેરળમાં ભારે વરસાદની ચેતવણી આપવામાં આવી છે. પૂર્વ ભારતના રાજ્યોમાં વજ્રપાતનું એલર્ટ છે અને પવનની ઝડપ 75 કિમી પ્રતિ કલાક સુધી પહોંચી શકે છે.
આજે 19 સપ્ટેમ્બરે ગુજરાતમાં રહેશે વરસાદી માહોલ
19 સપ્ટેમ્બરના રોજ રાજ્યના મોટાભાગના વિસ્તારોમાં ગાજવીજ સાથે વરસાદની શક્યતા છે. મધ્ય અને દક્ષિણ ગુજરાતના પંચમહાલ, દાહોદ, મહિસાગર, વડોદરા, છોટાઉદેપુર, નર્મદા, ભરૂચ, સુરત, તાપી, ડાંગ, નવસારી અને વલસાડમાં 30થી 40 કિમી પ્રતિ કલાકની ઝડપે પવન સાથે હળવાથી મધ્યમ વરસાદ પડી શકે છે.
ઉત્તર ગુજરાતમાં આણંદના અનેક વિસ્તારોમાં તેમજ બનાસકાંઠા, વાવ-થરાદ, સાબરકાંઠા, ગાંધીનગર, અરવલ્લી, ખેડા, અમદાવાદ, પાટણ અને મહેસાણાના કેટલાક વિસ્તારોમાં ગાજવીજ સાથે વરસાદની શક્યતા છે. સૌરાષ્ટ્ર-કચ્છમાં સુરેન્દ્રનગર, રાજકોટ, જામનગર, પોરબંદર, જૂનાગઢ, અમરેલી, ભાવનગર, મોરબી, દ્વારકા, ગીર સોમનાથ, બોટાદ, કચ્છ તેમજ દીવ, દમણ અને દાદરા-નગર હવેલીમાં હળવાથી મધ્યમ વરસાદ પડી શકે છે.
દિલ્હી અને ઉત્તર પ્રદેશમાં કેવું રહેશે હવામાન?
દેશની રાજધાની દિલ્હીમાં આજે હળવા વરસાદ અને 20 થી 30 કિમી પ્રતિ કલાકની ઝડપે પવન ફૂંકાવા સાથે 'યલો એલર્ટ' જાહેર કરાયું છે. દિલ્હીમાં મહત્તમ તાપમાન 34 ડિગ્રી અને લઘુત્તમ તાપમાન 24 ડિગ્રી સેલ્સિયસ રહેવાની શક્યતા છે.
ઉત્તર પ્રદેશના મુઝફ્ફરનગર, મેરઠ, ગૌતમ બુદ્ધ નગર, આગ્રા, કાનપુર અને ગોરખપુર સહિતના અનેક જિલ્લાઓમાં ભારે વરસાદ અને વાવાઝોડાનું યલો એલર્ટ છે. લખનઉમાં મહત્તમ તાપમાન 32 ડિગ્રી અને લઘુત્તમ તાપમાન 26 ડિગ્રી સેલ્સિયસ રહી શકે છે.
બિહાર અને ઝારખંડમાં વરસાદની શું છે આગાહી?
બિહારના પટના, ગયા, મુઝફ્ફરપુર, ભાગલપુર સહિતના જિલ્લાઓમાં 50 કિમી પ્રતિ કલાકની ઝડપે પવનના ઝાપટા સાથે ભારે વરસાદનું એલર્ટ છે. પટનાનું તાપમાન 33 ડિગ્રી (મહત્તમ) અને 27 ડિગ્રી (લઘુત્તમ) વચ્ચે રહી શકે છે.
ઝારખંડના રાંચી, બોકારો, દેવઘર અને ગુમલા સહિતના વિસ્તારોમાં 35 થી 40 કિમી પ્રતિ કલાકની ઝડપે વાવાઝોડા સાથે ભારે વરસાદની ચેતવણી છે. રાંચીનું મહત્તમ તાપમાન 30 ડિગ્રી સેલ્સિયસ રહેશે.
પહાડી રાજ્યોમાં પ્રવાસીઓ માટે શું છે અપડેટ?
ઉત્તરાખંડના દેહરાદૂન, નૈનીતાલ અને રુદ્રપ્રયાગ સહિતના વિસ્તારોમાં 40 થી 50 કિમી પ્રતિ કલાકની ઝડપે પવન ફૂંકાઈ શકે છે. દેહરાદૂનમાં તાપમાન 29 થી 19 ડિગ્રી સેલ્સિયસ વચ્ચે રહેશે.
હિમાચલ પ્રદેશના શિમલા, મંડી અને કાંગડામાં ભારે વરસાદ અને તેજ પવનનું એલર્ટ છે. મનાલીમાં તાપમાન ગગડીને 12 ડિગ્રી (મહત્તમ) અને 3 ડિગ્રી (લઘુત્તમ) સુધી પહોંચવાની શક્યતા છે.
જમ્મુ-કાશ્મીરના જમ્મુ, શ્રીનગર અને બારામુલામાં 60 થી 65 કિમી પ્રતિ કલાકની ઝડપે પવન ફૂંકાવાની ચેતવણી છે અને વરસાદનું યલો એલર્ટ અપાયું છે.
પંજાબ, રાજસ્થાન અને મધ્ય પ્રદેશમાં કેવો રહેશે માહોલ?
પંજાબના અમૃતસર, લુધિયાણા અને ભટિંડા સહિતના શહેરોમાં 65 થી 70 કિમી પ્રતિ કલાકની ઝડપે પવન અને હળવાથી મધ્યમ વરસાદની શક્યતા છે.
રાજસ્થાનના કોટા, અજમેર, જોધપુર અને જયપુરમાં ભારે વરસાદ અને 60 કિમી પ્રતિ કલાકની ઝડપે પવન ફૂંકાઈ શકે છે. જયપુરમાં મહત્તમ તાપમાન 33 ડિગ્રી નોંધાઈ શકે છે.
મધ્ય પ્રદેશના ભોપાલ, ઇન્દોર, રતલામ અને બાલાઘાટ સહિતના જિલ્લાઓમાં વરસાદ અને વાવાઝોડાની ચેતવણી આપવામાં આવી છે. ભોપાલમાં લઘુત્તમ તાપમાન 22 ડિગ્રી સુધી પહોંચવાની સંભાવના છે.