Weather Today (September 16, 2026) | આજનું હવામાન: ભારતીય હવામાન વિભાગ (IMD) દ્વારા દેશભરના હવામાનને લઈને એક મોટી અને મહત્વપૂર્ણ ચેતવણી જાહેર કરવામાં આવી છે. હવામાન વિભાગના લેટેસ્ટ અપડેટ અનુસાર, આગામી 6 કલાકમાં દેશના 18 રાજ્યોમાં ભારે વરસાદ પડવાની સંભાવના છે. આ સમયગાળા દરમિયાન 75 કિલોમીટર પ્રતિ કલાકની ઝડપે તોફાની પવન ફૂંકાઈ શકે છે.
આજે 18 રાજ્યોમાં ભારે વરસાદનું એલર્ટ
હવામાન વિભાગની આગાહી મુજબ, ગુજરાત, મહારાષ્ટ્ર, મધ્ય પ્રદેશ, છત્તીસગઢ, દિલ્હી, ઉત્તર પ્રદેશ, બિહાર, રાજસ્થાન, હરિયાણા, પંજાબ, ઉત્તરાખંડ, હિમાચલ પ્રદેશ, જમ્મુ-કાશ્મીર, લદ્દાખ, ઝારખંડ, પશ્ચિમ બંગાળ, સિક્કિમ અને ઓડિશામાં 75 કિલોમીટર પ્રતિ કલાકની ઝડપે પવન ફૂંકાવાની શક્યતા છે.
ગુજરાતમાં આજે કેવું રહેશે હવામાન?
16 સપ્ટેમ્બરના રોજ ગુજરાતના પંચમહાલ, દાહોદ, અરવલ્લી, ખેડા, આણંદ, મહિસાગર અને સાબરકાંઠા જિલ્લાઓમાં આંધી અને વરસાદ સાથે તોફાની પવન ફૂંકાવાની સંભાવના છે. આ વિસ્તારોમાં પવનની ઝડપ 50 કિલોમીટર પ્રતિ કલાક સુધી રહી શકે છે. પાટનગર ગાંધીનગરમાં આજે મહત્તમ તાપમાન 32 ડિગ્રી સેલ્સિયસ અને લઘુત્તમ તાપમાન 26 ડિગ્રી સેલ્સિયસ રહેવાની આગાહી છે.
દિલ્હી અને રાજસ્થાન માટે શું છે આગાહી?
દિલ્હીમાં આગામી કેટલાક દિવસોમાં હવામાનમાં મોટો ફેરફાર જોવા મળી શકે છે. આજે આકાશ વાદળછાયું રહેશે અને હળવો કે ઝરમર વરસાદ પડી શકે છે. પવનની ઝડપ 40 થી 50 કિલોમીટર પ્રતિ કલાક રહી શકે છે. મહત્તમ તાપમાન 34 ડિગ્રી અને લઘુત્તમ 24 ડિગ્રી સેલ્સિયસ રહેવાની શક્યતા છે.
રાજસ્થાનના જયપુર, ઉદયપુર, અજમેર, કોટા, ભરતપુર, શ્રીગંગાનગર, હનુમાનગઢ, ચુરુ અને શેખાવાટીમાં આગામી 3 થી 4 દિવસ હળવાથી મધ્યમ વરસાદ ચાલુ રહી શકે છે. 40 થી 45 કિલોમીટર પ્રતિ કલાકની ઝડપે પવન ફૂંકાશે. જયપુરમાં મહત્તમ તાપમાન 33 ડિગ્રી અને લઘુત્તમ તાપમાન 25 ડિગ્રી નોંધાઈ શકે છે.
મહારાષ્ટ્ર અને મધ્ય પ્રદેશની સ્થિતિ શું છે?
મહારાષ્ટ્રના ગઢચિરોલી, નંદુરબાર, ધુળે, થાણે અને નાશિકમાં ભારે વરસાદનું એલર્ટ છે, જ્યાં 70 કિલોમીટર પ્રતિ કલાકની ઝડપે પવન ફૂંકાઈ શકે છે. મુંબઈમાં મહત્તમ તાપમાન 29 ડિગ્રી અને લઘુત્તમ તાપમાન 26 ડિગ્રી સેલ્સિયસ આસપાસ રહેવાનું અનુમાન છે.
મધ્ય પ્રદેશના દેવાસ, બેતુલ, હરદા, ધાર, વિદિશા, છિંદવાડા, બાલાઘાટ, ગુના, ઉજ્જૈન, ઉમરિયા, સિવની, મંડલા, હોશંગાબાદ અને જબલપુરમાં મધ્યમથી ભારે વરસાદની આગાહી છે. અહીં 60 કિલોમીટરની ઝડપે તોફાન આવી શકે છે. ભોપાલમાં તાપમાન 27 ડિગ્રી (મહત્તમ) અને 24 ડિગ્રી (લઘુત્તમ) સુધી રહી શકે છે.
દક્ષિણ ભારતમાં તમિલનાડુ પર શું થશે અસર?
તમિલનાડુના નીલગિરી, કોઈમ્બતૂર, ઈરોડ, સેલમ, કૃષ્ણાગિરી, ધર્મપુરી, વેલ્લોર, તિરુપત્તુર સહિતના વિસ્તારોમાં (રાનીપેટ, મદુરાઈ, ડિંડિગુલ, વિરુધુનગર, શિવગંગા, તિરુવન્નામલાઈ, તંજાવુર) ભારે વરસાદની ચેતવણી આપવામાં આવી છે. પવનની ઝડપ 30 થી 40 કિલોમીટર પ્રતિ કલાક રહેવાની સંભાવના છે. ચેન્નાઈ શહેરમાં મહત્તમ તાપમાન 33 ડિગ્રી અને લઘુત્તમ તાપમાન 28 ડિગ્રી સેલ્સિયસ રહી શકે છે.