Vande Bharat Sleeper Trial Run: ભારતીય રેલવેએ હાઇ-સ્પીડ ટ્રેનોના વિકાસમાં વધુ એક મોટો સીમાચિહ્ન હાંસલ કર્યો છે. નવી વંદે ભારત સ્લીપર ટ્રેને ટ્રાયલ રન દરમિયાન 180 કિલોમીટર પ્રતિ કલાકની મહત્તમ ગતિ હાંસલ કરીને ઇતિહાસ રચ્યો. આ સફળ પરીક્ષણ સવાઈ માધોપુર-કોટા-નાગદા સેક્શન પર કરવામાં આવ્યું હતું અને ટ્રેનનો એક વિડિયો સોશિયલ મીડિયા પર ઝડપથી વાયરલ થઈ રહ્યો છે. રેલવે મંત્રીએ તેને નવી પેઢીની ટ્રેન અને ભારતીય રેલવે માટે એક મોટું પગલું ગણાવ્યું છે.
રેલવે મંત્રીએ વિડિયો શેર કર્યો
મંગળવારે સાંજે રેલવે મંત્રીએ સોશિયલ મીડિયા પ્લેટફોર્મ X પર માહિતી શેર કરી, જેમાં જણાવ્યું હતું કે વંદે ભારત સ્લીપર ટ્રેનનું પરીક્ષણ રેલવે સેફ્ટી કમિશનરની દેખરેખ હેઠળ કરવામાં આવ્યું હતું. તેમણે કહ્યું કે કોટા-નાગદા સેક્શન પર 180 કિમી પ્રતિ કલાકની ઝડપે દોડતી આ ટ્રેન ભારતમાં વિકસિત નવી પેઢીની રેલ ટેકનોલોજીની તાકાત દર્શાવે છે. આ ટ્રાયલે માત્ર ટ્રેનની ગતિ ક્ષમતા જ સાબિત કરી નથી , પરંતુ તેની આધુનિક ડિઝાઇન અને સલામતી ધોરણોને પણ સમર્થન આપ્યું છે.
રેલવે મંત્રી દ્વારા શેર કરાયેલા એક વિડિયોમાં વંદે ભારત સ્લીપર ટ્રેનની ટેકનિકલ કુશળતા સ્પષ્ટપણે દેખાય છે. ટ્રાયલ રન દરમિયાન, જ્યારે ટ્રેન 180 કિલોમીટર પ્રતિ કલાકની ઝડપે પાટા પર દોડી રહી હતી ત્યારે કેબિનમાં એક કર્મચારી વિડિયો રેકોર્ડ કરતો જોવા મળે છે. વિડિયોમાં ટ્રેન કેબિનની અંદર સ્પીડોમીટરની સામે સીધા પાણીથી ભરેલા ચાર ગ્લાસ પણ બતાવવામાં આવ્યા છે.
Vande Bharat Sleeper tested today by Commissioner Railway Safety. It ran at 180 kmph between Kota Nagda section. And our own water test demonstrated the technological features of this new generation train. pic.twitter.com/w0tE0Jcp2h
— Ashwini Vaishnaw (@AshwiniVaishnaw) December 30, 2025
સૌથી મહત્વની વાત એ છે કે આટલી સ્પીડમાં હોવા છતાં, કોઈપણ ગ્લાસમાંથી પાણીનું એક ટીપું પણ ટપક્યું નહીં. વિડિયોમાં સ્પષ્ટપણે દેખાય છે કે સ્પીડોમીટર 180 કિમી પ્રતિ કલાકની ગતિ બતાવી રહ્યું છે છતાં ટ્રેન સંપૂર્ણપણે સ્થિર અને સંતુલિત દેખાય છે. આ દ્રશ્ય વંદે ભારત સ્લીપર ટ્રેનની અદ્યતન ટેકનોલોજી , સુધારેલ સસ્પેન્શન સિસ્ટમ અને સરળ દોડવાની ક્ષમતા દર્શાવે છે જે મુસાફરો માટે વધુ સુરક્ષિત અને વધુ આરામદાયક બનાવવા માટે ડિઝાઇન કરવામાં આવી છે.
0 થી 200 કિલોમીટર પ્રતિ કલાકની રેન્જ ધરાવે છે. રેકોર્ડિંગ દરમિયાન સ્પીડોમીટર 180 કિલોમીટર પ્રતિ કલાકની ઝડપે સ્થિર દેખાય છે. નોંધપાત્ર રીતે આટલી સ્પીડે પણ ટ્રેનની અંદરના ત્રણ ગ્લાસ પાણી સંપૂર્ણપણે સ્થિર રહે છે અને કોઈ હિલચાલ દેખાતી નથી. આ લગભગ 24 સેકન્ડની વિડિયો ક્લિપ પણ રેલવે મંત્રી દ્વારા શેર કરવામાં આવી હતી.
સિનિયર ડિવિઝનલ કોમર્શિયલ મેનેજર સૌરભ જૈને જણાવ્યું હતું કે, આ ટ્રાયલ વંદે ભારત સ્લીપર ટ્રેનના ભાવિ સંચાલન માટે એક મોટી તકનીકી સફળતા છે. આ ટ્રાયલથી ટ્રેનની ક્ષમતા અને વિશ્વસનીયતા સાબિત થઈ છે. આ સિદ્ધિ ભારતીય રેલવેની સ્વદેશી ટેકનોલોજી, આધુનિક એન્જિનિયરિંગ અને આત્મનિર્ભર ભારતના વિઝનને મજબૂત રીતે દર્શાવે છે.
ટ્રાયલ રન દરમિયાન ટ્રેનની સ્પીડ, સેફ્ટીના ધોરણો અને સવારીની ગુણવત્તાનું બારીકાઈથી પરીક્ષણ કરવામાં આવ્યું હતું. સમગ્ર પરીક્ષણ ચીફ કમિશનર ઓફ રેલવે સેફ્ટી જનક કુમાર ગર્ગની દેખરેખ હેઠળ હાથ ધરવામાં આવ્યું હતું. સફળ ટ્રાયલ બાદ આ વંદે ભારત સ્લીપર રેક્સ હવે મુસાફરોની મુસાફરી માટે ઉપલબ્ધ થશે.
વંદે ભારત સ્લીપર ટ્રેનમાં કુલ 16 કોચ હશે , જેમાં સ્લીપર અને એસી બંને કોચનો સમાવેશ થાય છે. મુસાફરોની સુવિધા માટે આરામદાયક બર્થ આપવામાં આવી છે. સેમી-હાઈ-સ્પીડ ટ્રેન હોવાથી તેમાં અપગ્રેડેડ સસ્પેન્શન સિસ્ટમ છે જે મુસાફરી દરમિયાન આંચકા અને કંપનોમાં નોંધપાત્ર ઘટાડો કરે છે. મુસાફરોને હાઈ સ્પીડે પણ ખાસ કરીને સ્લીપર કોચમાં મુસાફરી કરતી વખતે શ્રેષ્ઠ આરામ મળશે.
રેલવેનું કહેવું છે કે આધુનિક શૌચાલય વ્યવસ્થા, અગ્નિ સલામતી સાધનો, સીસીટીવી સર્વેલન્સ અને ડિજિટલ પેસેન્જર ઇન્ફર્મેશન સિસ્ટમ જેવી અત્યાધુનિક સુવિધાઓથી સજ્જ વંદે ભારત સ્લીપર મુસાફરોને સલામત, આરામદાયક અને આંતરરાષ્ટ્રીય કક્ષાનો મુસાફરી અનુભવ પ્રદાન કરાવશે.