રાજસ્થાનમાં રેલવે ટ્રેક ઉડાવવાના ષડયંત્ર મામલે મોટી કાર્યવાહી, પાકિસ્તાન કનેક્શન ધરાવતા બે આરોપીઓ પંજાબથી ઝડપાયા

Sri Ganganagar Railway Track Blast: રાજસ્થાનના શ્રી ગંગાનગર જિલ્લામાં રેલવે ટ્રેક પર થયેલા બોમ્બ વિસ્ફોટ (Railway Track Blast) કેસમાં રાજસ્થાન અને પંજાબ પોલીસને એક મોટી સફળતા મળી છે. બંને રાજ્યોની પોલીસ દ્વારા હાથ ધરવામાં આવેલા એક સંયુક્ત ઓપરેશનમાં પંજાબના ગુરદાસપુર જિલ્લામાંથી બે મુખ્ય શંકાસ્પદ આરોપીઓની ધરપકડ કરવામાં આવી છે. પોલીસ તપાસમાં આ સમગ્ર ષડયંત્ર પાછળ પાકિસ્તાન સ્થિત હેન્ડલરનું કનેક્શન અને વિદેશી ફંડિંગ હોવાની ચોંકાવનારી વિગતો સામે આવી છે.

સંયુક્ત ઓપરેશનમાં બે આરોપીઓ ઝડપાયા

ઉલ્લેખનીય છે કે, ગત 3 નવેમ્બર, 2026ના રોજ શ્રી ગંગાનગર જિલ્લાના રામસિંહપુર વિસ્તારમાં અનુપગઢ-સુરતગઢ રેલવે લાઇન પર આવેલા '50 GB' ગામ નજીક રેલવે ટ્રેક પર જોરદાર વિસ્ફોટ થયો હતો. આ મામલાની ગંભીરતાને જોતાં રાજસ્થાનના ADGP દિનેશ એમ.એન. (Dinesh MN) અને વરિષ્ઠ પોલીસ અધિકારી નિતિન ચૌધરીની આગેવાની હેઠળ વિશેષ તપાસ શરૂ કરવામાં આવી હતી.

તપાસ દરમિયાન પંજાબ સરહદ નજીકના ગામો સાથે જોડાયેલી કેટલીક મહત્વની કડીઓ મળતા રાજસ્થાન પોલીસની ટીમે ગુરદાસપુર જિલ્લાના કલાનૌર પોલીસ સ્ટેશન હેઠળની દોસ્તપુર પોલીસ ચોકીની મદદથી દરોડા પાડ્યા હતા. આ કાર્યવાહીમાં દોસ્તપુર ગામની રહેવાસી 24 વર્ષીય મહકપ્રીત કૌર (પુત્રી તરલોક સિંહ) અને નજીકના સરહદી ગામ 'ચૌદા કલાં'ના રહેવાસી દવિંદર સિંહ (પુત્ર રવિંદર સિંહ) ની ધરપકડ કરવામાં આવી છે. આ ઉપરાંત, તેમના અન્ય કેટલાક સહયોગીઓને પણ કસ્ટડીમાં લઈને પૂછપરછ કરવામાં આવી રહી છે.

બે પ્રયાસો નિષ્ફળ રહ્યા બાદ ત્રીજા પ્રયાસમાં કર્યો વિસ્ફોટ

ગુરદાસપુરના SSP આદિત્યએ આ કેસ અંગે મહત્વની જાણકારી આપતા જણાવ્યું હતું કે, આ બંને આરોપીઓ વિસ્ફોટને અંજામ આપવા માટે ત્રણ વખત રાજસ્થાન ગયા હતા:

પ્રથમ મુલાકાત: આરોપીઓ વિસ્ફોટ માટે જરૂરી સામગ્રી એકત્રિત કરવામાં નિષ્ફળ રહ્યા હતા.
બીજી મુલાકાત: સામગ્રી હોવા છતાં તેઓ ટ્રેક પર વિસ્ફોટ કરવામાં અસફળ રહ્યા હતા.
ત્રીજી મુલાકાત: આખરે તેમના ત્રીજા પ્રયાસમાં 3 નવેમ્બરના રોજ રેલવે ટ્રેક પર વિસ્ફોટ કરવામાં તેઓ સફળ રહ્યા હતા.

પાકિસ્તાન કનેક્શન અને વિદેશી હથિયારોની જપ્તી

પોલીસ તપાસમાં એવો ઘટસ્ફોટ થયો છે કે ધરપકડ કરાયેલી યુવતી મહકપ્રીત કૌરને પાકિસ્તાનમાં બેઠેલા 'શાહ' નામના એક વ્યક્તિ પાસેથી આ કૃત્ય માટે ₹1 લાખ મળ્યા હતા. પોલીસે આરોપીઓ પાસેથી આ રકમ પૈકી ₹30,000 રોકડા જપ્ત કર્યા છે. આ ઉપરાંત, દરોડા દરમિયાન તેમની પાસેથી એક અત્યાધુનિક બેરેટા 9mm પિસ્તોલ, એક .30-બોરની પિસ્તોલ અને આશરે 40 જીવતા કારતૂસ પણ મળી આવ્યા છે. હાલ પોલીસ અને સુરક્ષા એજન્સીઓ એ દિશામાં તપાસ કરી રહી છે કે આ હથિયારો સરહદ પારથી કેવી રીતે આવ્યા અને આ નેટવર્કમાં અન્ય કેટલા લોકો સામેલ છે.