Sri City Boiler Explosion: આંધ્રપ્રદેશના તિરુપતિ જિલ્લામાં આવેલા શ્રીસિટી સ્પેશિયલ ઈકોનોમિક ઝોન (SEZ) ખાતે સ્થિત એક ફેક્ટરીમાં સર્જાયેલા ભયાનક બોઈલર બ્લાસ્ટમાં 5 કામદારોના મોત અને 10થી વધુ લોકો ગંભીર રીતે ઘાયલ થયા હોવાના અહેવાલ બાદ અગ્રણી ફાર્માસ્યુટિકલ કંપની 'ટેબ્લેટ્સ (ઈન્ડિયા) લિમિટેડ' (Tablets India Limited) દ્વારા એક મહત્વપૂર્ણ સ્પષ્ટતા જારી કરવામાં આવી છે. કંપનીએ સ્પષ્ટ કર્યું છે કે જે ફેક્ટરીમાં આ દુર્ઘટના ઘટી છે તે તેમની નથી અને આ કેસમાં નામમાં ઉદ્ભવેલી ગેરસમજ દૂર કરવી જરૂરી છે.
નામની સમાનતાથી સર્જાયેલી ગેરસમજ
3 ઓક્ટોબરે શ્રીસિટી ખાતે આવેલી 'ટીઆઈએલ હેલ્થકેર પ્રાઇવેટ લિમિટેડ' (TIL Healthcare Private Limited)ના ઉત્પાદન એકમમાં બોઈલર ફાટવાની ગંભીર ઘટના બની હતી. શરૂઆતી મીડિયા રિપોર્ટ્સમાં ફેક્ટરીનો ઉલ્લેખ 'ટેબ્લેટ્સ ઈન્ડિયા' અથવા 'ટેબ્લેટ્સ ઈન્ડિયા લિમિટેડ હેલ્થકેર' તરીકે કરવામાં આવ્યો હતો, જેના કારણે લોકો અને મીડિયામાં એવી અટકળો વહેતી થઈ હતી કે આ એકમ ટેબ્લેટ્સ (ઈન્ડિયા) લિમિટેડનું છે.
બંને સ્વતંત્ર કંપનીઓ: ટેબ્લેટ્સ (ઈન્ડિયા) લિમિટેડનો દાવો
આ અંગે નિવેદન જારી કરીને ટેબ્લેટ્સ (ઈન્ડિયા) લિમિટેડે આ અહેવાલોને સખત શબ્દોમાં નકારી કાઢ્યા છે. કંપનીએ જણાવ્યું છે કે, 'ટીઆઈએલ હેલ્થકેર પ્રાઇવેટ લિમિટેડ' અને 'ટેબ્લેટ્સ (ઈન્ડિયા) લિમિટેડ' બંને સંપૂર્ણપણે અલગ અને સ્વતંત્ર કાનૂની સંસ્થાઓ છે. બંને કંપનીઓ વચ્ચે કોઈ સમાન માલિકી કે સંચાલન નથી. શ્રીસિટીમાં ટેબ્લેટ્સ (ઈન્ડિયા) લિમિટેડની કોઈ ફેક્ટરી કે મેન્યુફેક્ચરિંગ યુનિટ આવેલું નથી.
કંપનીએ મૃતક કામદારોના પરિવારજનો પ્રત્યે ઊંડા શોકની સંવેદના વ્યક્ત કરી હતી અને મીડિયાને વિનંતી કરી હતી કે આ દુર્ઘટનાનું રિપોર્ટિંગ કરતી વખતે બંને કંપનીઓ વચ્ચેનો તફાવત સ્પષ્ટ રાખવામાં આવે.
ઉચ્ચ સ્તરીય તપાસ અને બોઈલર ઈન્સ્પેક્ટર સસ્પેન્ડ
આંધ્રપ્રદેશ સરકારે આ ભયાનક બોઈલર વિસ્ફોટ અંગે ઉચ્ચ સ્તરીય તપાસના આદેશ આપ્યા છે. પ્રાથમિક તપાસ અહેવાલ મુજબ, બોઈલરમાં પાણીની અછતને કારણે આ અકસ્માત સર્જાયો હોવાની આશંકા વ્યક્ત કરવામાં આવી રહી છે. સલામતીના ધોરણોમાં બેદરકારી દાખવવા બદલ સંબંધિત બોઈલર ઈન્સ્પેક્ટરને સસ્પેન્ડ કરી દેવામાં આવ્યા છે. હાલ ટેકનિકલ ખામી અને માનવભૂલ સહિતના તમામ પાસાઓ પર તપાસ ચાલી રહી છે.