Shahid Afridi Rahul Gandhi Statement: પૂર્વ પાકિસ્તાની ક્રિકેટર શાહિદ આફ્રિદીએ કોંગ્રેસ સાંસદ રાહુલ ગાંધી વિશે આપેલા નિવેદન બાદ ભારતમાં રાજકીય વિવાદ સર્જ્યો છે. એક કાર્યક્રમ દરમિયાન આફ્રિદીએ રાહુલ ગાંધીના વખાણ કર્યા હતા જેના પર ભારતીય જનતા પાર્ટી (BJP) એ આકરા પ્રહારો કર્યા છે અને કહ્યું છે કે ભારત વિરોધી તત્વો રાહુલ ગાંધીની પ્રશંસા કરી રહ્યા છે. જવાબમાં કોંગ્રેસ સહિતના વિપક્ષી દળોએ પણ ભાજપના નેતા સાથે આફ્રિદીની તસવીર શેર કરીને વળતો જવાબ આપ્યો છે.
આફ્રિદીનું વિવાદાસ્પદ નિવેદન
એક ચેનલ સાથેની વાતચીતમાં શાહિદ આફ્રિદીએ કહ્યું હતું કે ભારત સરકાર સત્તામાં રહેવા માટે હિંદુ અને મુસ્લિમ કાર્ડ રમે છે. આ ખૂબ જ ખરાબ માનસિકતા છે. રાહુલ ગાંધીની માનસિકતા ખૂબ જ સકારાત્મક છે. તેઓ વાતચીતમાં વિશ્વાસ રાખે છે. શું ઈઝરાયલ પુરતું નથી કે તમે એક બીજા બનતા જાવ છો. આફ્રિદીના આ નિવેદન બાદ ભાજપે કોંગ્રેસ અને રાહુલ ગાંધી પર નિશાન સાધ્યું છે.
ભાજપે કોંગ્રેસને આડેહાથ લીધું
ભાજપના પ્રવક્તા શહજાદ પૂનાવાલાએ કહ્યું કે હાફિઝ સઈદ પછી હવે શાહિદ આફ્રિદી રાહુલ ગાંધીના વખાણ કરી રહ્યા છે. ભારતને નફરત કરનાર દરેક વ્યક્તિને રાહુલ ગાંધી અને કોંગ્રેસમાં એક સાથી મળી જાય છે.
પાર્ટીના IT વિભાગના વડા અમિત માલવિયાએ કહ્યું કે શાહિદ આફ્રિદી ભારત વિરુદ્ધ ઝેર ઓકવાનો કોઈ મોકો છોડતો નથી, તે અચાનક રાહુલ ગાંધીના વખાણ કરવા લાગ્યો છે. કેન્દ્રીય મંત્રી કિરેન રિજિજુએ કહ્યું કે રાહુલ ગાંધી પાકિસ્તાનના પ્રિય રહ્યા છે અને પાકિસ્તાનના લોકો તેમને પોતાના નેતા બનાવી શકે છે.
વિપક્ષનો પલટવાર
ભાજપના આરોપોનો જવાબ આપતાં કોંગ્રેસના પ્રવક્તા સુપ્રિયા શ્રીનેતે ભાજપના નેતા અનુરાગ ઠાકુર સાથે શાહિદ આફ્રિદીની એક તસવીર પોસ્ટ કરી અને કહ્યું કે સત્તાધારી પક્ષે કોંગ્રેસ પર સવાલ ઉઠાવતા શરમાવું જોઈએ, જ્યારે તેઓ પોતે તેની સાથે સંબંધો રાખે છે. શિવસેના (UBT)ના નેતા પ્રિયંકા ચતુર્વેદીએ પણ કહ્યું કે આફ્રિદી થોડા મહિના પહેલા જ દુબઈમાં ભાજપના સાંસદો સાથે જોવા મળ્યા હતા.
આ દરમિયાન કોંગ્રેસના સાંસદ અભિષેક મનુ સિંઘવીએ આફ્રિદીના નિવેદન પર નારાજગી વ્યક્ત કરી હતી. તેમણે કટાક્ષ કરતાં કહ્યું કે હવે જ્યારે તેમના જમાઈ (શાહીન આફ્રિદી)ના બોલ પર ભારતીય બેટ્સમેનો પ્રહાર કરી રહ્યા છે, ત્યારે ભારત વિરોધી નિવેદનો વધુ તેજ થઈ ગયા છે. હવે સમય આવી ગયો છે કે આફ્રિદી બહાના પાછળ છુપાવવાનું બંધ કરે અને સ્કોરબોર્ડ પર નજર નાખે.