PM Modi Gen Z Video Message: વડાપ્રધાન નરેન્દ્ર મોદીએ શુક્રવારે રાત્રે ફરી એકવાર વિશેષ વીડિયો સંદેશ દ્વારા દેશના યુવાનોને સંબોધિત કર્યા હતા. પેપર લીકના ગંભીર મુદ્દા અંગે તેમણે અગાઉ જાહેર કરેલા વીડિયો પર મળેલી સકારાત્મક પ્રતિક્રિયાઓ અને યુવાનો તરફથી મળેલા મૂલ્યવાન સૂચનો બદલ વડાપ્રધાને આભાર વ્યક્ત કર્યો હતો.
Gen-Z સાથે જોડાવાની અનોખી શૈલી
રેલીઓમાં સ્થાનિક બોલી અને પોશાક દ્વારા જનતા સાથે જોડાવા માટે જાણીતા વડાપ્રધાને આ વખતે પણ યુવાનો એટલે કે ‘Gen-Z’ સાથે સંવાદ સાધવા માટે એક અલગ શૈલી અને સમય પસંદ કર્યો હતો. સામાન્ય રીતે માનવામાં આવે છે કે Gen-Z મોડી રાત્રે ડિજિટલ પ્લેટફોર્મ પર સૌથી વધુ સક્રિય હોય છે. તેથી, ગુરુવાર બાદ શુક્રવારે રાત્રે 11:30 વાગ્યે જાહેર કરેલા વીડિયોમાં વડા પ્રધાને પોતાના સંબોધનની શરૂઆત "આભાર મિત્રો" કહીને કરી હતી.
વડાપ્રધાને સંદેશમાં જણાવ્યું હતું કે, "ગઈકાલે મોડી રાત્રે મને તમારી સાથે જોડાવાની તક મળી. મેં પોસ્ટ કરેલા વીડિયો પર તમે જે રીતે પ્રતિભાવ આપ્યો અને જે સકારાત્મક સૂચનો આપ્યા તે બદલ હું આપ સૌનો આભાર માનું છું. આપણો આ સ્નેહ અને બંધન વધુ મજબૂત તથા સક્રિય બને."
24 કલાકમાં 30 કરોડથી વધુ વ્યુઝ સાથે વર્લ્ડ રેકોર્ડ**
ગુરુવારે મોડી રાત્રે વડા પ્રધાન મોદી દ્વારા જાહેર કરવામાં આવેલા વીડિયોએ સોશિયલ મીડિયા પર ઈતિહાસ રચી દીધો છે. આ વીડિયોએ 24 કલાકમાં સૌથી વધુ વ્યૂઝ મેળવવાનો નવો વર્લ્ડ રેકોર્ડ સ્થાપ્યો છે. માત્ર 24 કલાકના ટૂંકા ગાળામાં આ વીડિયોને 303 મિલિયન વ્યુઝ અને 16 લાખથી વધુ લાઈક્સ મળી હતી. આ સાથે જ તેમણે અગાઉના 30 કરોડ વ્યૂઝના રીલ રેકોર્ડને પણ માત આપી દીધી છે.
જંતર-મંતર પર વિરોધ અને વાંગચુકની તબિયત
બીજી તરફ, પેપર લીક મામલે વિપક્ષ અને સીજેપીના નેતાઓએ સ્પષ્ટ કર્યું છે કે શિક્ષણ મંત્રી ધર્મેન્દ્ર પ્રધાનના રાજીનામા સુધી વિરોધ પ્રદર્શન જારી રહેશે. જંતર-મંતર પર પ્રદર્શનકારીઓની સંખ્યા સતત વધી રહી છે. આ દરમિયાન, લદ્દાખના જાણીતા સામાજિક કાર્યકર સોનમ વાંગચુકે પોતાના ઉપવાસ સમાપ્ત કર્યા છે. મેદાંતા હોસ્પિટલમાં દાખલ વાંગચુકના સ્વાસ્થ્ય અંગે મેડિકલ સુપરિન્ટેન્ડેન્ટ ડૉ. સંજય દુરાનીએ જણાવ્યું હતું કે તેમની સ્થિતિ હાલ સ્થિર છે અને તેઓ ભાનમાં છે. તબીબી પ્રોટોકોલ અને તેમની સંમતિ મુજબ તેમને જરૂરિયાત અનુસાર પ્રવાહી ખોરાક આપવામાં આવી રહ્યો છે.