સાવધાન! ટ્રેનમાં આ ભૂલ કરી તો ખિસ્સું ખાલી થઈ જશે; રેલવેએ નવા નિયમોની ગાઇડલાઈન જાહેર કરી

Indian Railway New Rules: ભારતીય રેલવે દ્વારા મુસાફરોની સુરક્ષા અને સુવિધાને ધ્યાનમાં રાખીને દંડના નિયમોમાં મોટો ફેરફાર કરવામાં આવ્યો છે. હવે રેલવેમાં નાની-નાની ભૂલો પણ તમને ભારે પડી શકે છે અને ₹2,000 થી લઈને ₹10,000 સુધીનો દંડ થઈ શકે છે.

મહિલા આરક્ષિત કોચમાં પ્રવેશ

મહિલાઓની સુરક્ષા માટે રેલવેએ નિયમો વધુ કડક બનાવ્યા છે. જો કોઈ પુરુષ મુસાફર યોગ્ય કારણ વગર મહિલાઓ માટે અનામત રાખવામાં આવેલા કોચમાં મુસાફરી કરતો પકડાશે, તો તેની સામે કડક કાર્યવાહી કરવામાં આવશે. આવા કિસ્સામાં પરિસ્થિતિને આધારે દંડ નક્કી કરવામાં આવે છે.

ટ્રેન કે રેલવે સ્ટેશન પર ધૂમ્રપાન

ટ્રેનની અંદર, પ્લેટફોર્મ અથવા રેલવે પરિસરમાં સિગરેટ કે બીડી પીવી હવે ખૂબ મોંઘી પડી શકે છે. અગાઉ આ માટે માત્ર ₹100નો દંડ હતો, જે હવે વધારીને ₹2,000 સુધી કરવામાં આવ્યો છે. જો મુસાફર સ્થળ પર દંડ ન ભરે, તો મામલો કોર્ટમાં જઈ શકે છે, જ્યાં દંડની રકમ ₹5,000 સુધી પહોંચી શકે છે.

રેલવે સુવિધાઓનો દુરુપયોગ

રેલવે સ્ટેશન પરના વેઈટિંગ રૂમ, રિઝર્વ સીટો અને અન્ય જાહેર સુવિધાઓનો હેતુ મુસાફરોની સુવિધાનો છે. જો કોઈ વ્યક્તિ આ સુવિધાઓનો ખોટો ઉપયોગ કરે, તેમાં તોડફોડ કરે અથવા નિયમોનું ઉલ્લંઘન કરે, તો રેલવે તંત્ર કાયદેસરની કાર્યવાહી કરી શકે છે. નવા નિયમો હેઠળ હવે દંડની રકમમાં પણ વધારો કરવામાં આવ્યો છે.

પરવાનગી વગર સામાનનું વેચાણ

ઘણીવાર ટ્રેન કે સ્ટેશન પર લોકો પરવાનગી વગર ખાવા-પીવાની વસ્તુઓ કે અન્ય રમકડાં વેચતા જોવા મળે છે. હવે આવા અનધિકૃત ફેરિયાઓ પર સીધો ₹2,000નો દંડ લાદવામાં આવશે. અગાઉ આ દંડ માત્ર ₹100 હતો.

ટ્રેન કે સ્ટેશન પર ભીખ માંગવી

રેલવે પરિસરમાં ભીખ માંગવાની પ્રવૃત્તિ અટકાવવા માટે પણ નિયમો કડક કરાયા છે. હવે ટ્રેન કે સ્ટેશન પર ભીખ માંગતા પકડાવા પર ₹2,000 સુધીનો દંડ થઈ શકે છે. પહેલા આ દંડની રકમ ₹100 હતી.

જોખમી અને વિસ્ફોટક સામાન લઈ જવો

આ સૌથી ગંભીર ગુનો માનવામાં આવે છે. જો કોઈ મુસાફર ટ્રેનમાં જ્વલનશીલ પદાર્થો, વિસ્ફોટકો કે પ્રતિબંધિત સામાન સાથે મુસાફરી કરે છે, તો તેને ભારે દંડ અને જેલની સજા થઈ શકે છે. આ ગુના માટે દંડ અગાઉ ₹1,000 હતો, જે હવે 10 ગણો વધારીને ₹10,000 સુધી કરવામાં આવ્યો છે.

મુસાફરો માટે ખાસ સૂચના

રેલવે દ્વારા લેવાયેલા આ પગલાંનો મુખ્ય ઉદ્દેશ્ય મુસાફરોની સુરક્ષા સુનિશ્ચિત કરવાનો છે. તેથી, રેલવેમાં મુસાફરી કરતી વખતે હંમેશા નિયમોનું પાલન કરો અને ટિકિટ વગર કે પ્રતિબંધિત વસ્તુઓ સાથે મુસાફરી કરવાનું ટાળો, જેથી તમે કોઈપણ મોટી આર્થિક મુશ્કેલી કે કાયદાકીય કાર્યવાહીથી બચી શકો.