Nila Patil Becomes Sweden MP: મૂળ ભારતીય 41 વર્ષીય નીલા વિખે પાટીલ સ્વીડનની ગ્રીન પાર્ટી સાથે જોડાયેલા છે. ગ્રીન પાર્ટીએ સ્ટોકહોમ શહેર મતવિસ્તારમાંથી નીલા પાટીલને પોતાના ઉમેદવાર બનાવ્યા હતા. આ ચૂંટણી માટે 13 સપ્ટેમ્બરે મતદાન યોજાયું હતું. ચૂંટણીના આખરી પરિણામ 20-21 સપ્ટેમ્બર સુધીમાં આવવાની ધારણા છે. આ દરમિયાન નીલા પાટીલએ પોતાની બેઠક પર જીત મેળવી લીધી છે.
સંસદનો હિસ્સો બનવા બદલ ખૂબ ઉત્સાહ
જીત મેળવ્યા બાદ નીલાએ જણાવ્યું હતું કે, 349 સભ્યો ધરાવતી સંસદનો ભાગ બનીને તેમને ખૂબ સારું લાગી રહ્યું છે અને તેઓ શહેર તથા દેશ માટે યોગદાન આપવા માટે ઉત્સાહિત છે. નીલા પાટીલે સંસદમાં બાળકોના કલ્યાણ અને પર્યાવરણના ક્ષેત્રોમાં વિશેષ કાર્ય કરવાની વાત કહી છે.
રાજકીય અનુભવ અને અગાઉની જવાબદારી
નીલા અગાઉ પણ સ્ટોકહોમ નગર નિગમની સિટી કાઉન્સિલમાં ચૂંટાઈ ચૂક્યા છે. તેમણે સ્વીડનના પૂર્વ વડાપ્રધાન સ્ટીફન લોફવેનના વહીવટમાં વડાપ્રધાનના રાજકીય સલાહકાર તરીકે પણ સેવા આપી હતી. તે સમય દરમિયાન તેમની મુખ્ય જવાબદારીઓ નાણાં, ટેક્સ અને આવાસ સાથે જોડાયેલી બાબતો સંભાળવાની હતી.
ભારત સાથે લગાવ અને પરિવારની પ્રતિક્રિયા
નીલાના પિતા અશોક વિખે પાટીલ મહારાષ્ટ્રમાં શૈક્ષણિક સંસ્થાઓની શ્રૃંખલા ચલાવતા વિખે પાટીલ ફાઉન્ડેશનના પ્રમુખ છે. તેમણે નીલાની આ સિદ્ધિ પર ગર્વ વ્યક્ત કર્યો હતો. બીજી તરફ નીલા પાટીલએ કહ્યું હતું કે તેઓ ભારતને ખૂબ પ્રેમ કરે છે અને ભારત સાથે ઊંડો માનસિક લગાવ અનુભવે છે.