Vande Bharat Sleeper Rules: ભારતીય રેલવે દ્વારા વંદે ભારત સ્લીપર એક્સપ્રેસ ટ્રેનોમાં તત્કાલ બુકિંગની સુવિધા ન રાખવાનો મહત્વનો નિર્ણય લેવામાં આવ્યો છે. ઉત્તર મધ્ય રેલવેના મુખ્ય જનસંપર્ક અધિકારી ડૉ. શિવમ શર્માના જણાવ્યા અનુસાર, મુસાફરો છેલ્લા સમયે દોડાદોડી કરવાને બદલે અગાઉથી જ પોતાની યાત્રાનું આયોજન કરે તે માટે આ પગલું ભરવામાં આવ્યું છે. આ ટ્રેનમાં તમામ બર્થ માત્ર જનરલ રિઝર્વેશન કોટા અંતર્ગત જ ખુલ્લી મૂકવામાં આવશે, જેથી વધુમાં વધુ સામાન્ય નાગરિકોને એડવાન્સ પ્લાનિંગનો લાભ મળી શકે. આ ઉપરાંત, આ ટ્રેનોમાં મુસાફરો પર વધારાનો આર્થિક બોજ ન પડે તે માટે ડાયનેમિક કે ફ્લેક્સી-ફેર પ્રાઇસિંગ સિસ્ટમ પણ લાગુ કરવામાં આવી નથી.
માત્ર કન્ફર્મ ટિકિટધારકોને જ પ્રવેશ અને કડક નિયમો
રેલવે બોર્ડના આદેશ અનુસાર વંદે ભારત સ્લીપર ટ્રેનમાં મુસાફરી કરવા માટેના નિયમો અત્યંત કડક રાખવામાં આવ્યા છે. આ ટ્રેનમાં માત્ર અને માત્ર કન્ફર્મ ટિકિટ ધરાવતા મુસાફરોને જ બોર્ડિંગ કરવાની પરવાનગી આપવામાં આવશે. જો કોઈ મુસાફર પાસે આરએસી (RAC), વેઇટલિસ્ટ કે અંશતઃ કન્ફર્મ થયેલી ટિકિટ હશે, તો તેમને ટ્રેનમાં પ્રવેશ આપવામાં આવશે નહીં. આ નિયમનો મુખ્ય ઉદ્દેશ્ય મુસાફરોની સફરને વધુ આરામદાયક અને સુરક્ષિત બનાવવાનો છે જેથી ટ્રેનમાં બિનજરૂરી ભીડ ન થાય.
ટ્રેનની આધુનિક રચના અને પેસેન્જર ક્ષમતા
ચેન્નાઈ સ્થિત ઇન્ટિગ્રલ કોચ ફેક્ટરીની અદ્યતન ટેકનોલોજીનો ઉપયોગ કરીને BEML દ્વારા નિર્મિત આ પ્રીમિયમ સેમી-હાઈ-સ્પીડ ટ્રેન મહત્તમ 180 કિમી/કલાકની ઝડપે દોડવા માટે સક્ષમ છે.
- સમગ્ર ટ્રેનમાં કુલ 16 કોચનો સમાવેશ થાય છે, જેમાં 11 કોચ AC 3-ટાયરના (611 મુસાફરોની ક્ષમતા)
- 4 કોચ AC 2-ટાયરના (188 મુસાફરોની ક્ષમતા)
- 1 કોચ ફર્સ્ટ ACનો (24 મુસાફરોની ક્ષમતા) છે. આમ, એક ફેરામાં કુલ 823 મુસાફરો આરામદાયક મુસાફરીનો આનંદ માણી શકે છે.
હાલમાં કાર્યરત વંદે ભારત સ્લીપર રૂટ્સ
દેશમાં હાલમાં વંદે ભારત સ્લીપર ટ્રેનની 3 જોડી (3 રૂટ્સ) સફળતાપૂર્વક ચલાવવામાં આવી રહી છે-
- ટ્રેન નંબર 27575 / 27576: હાવડા – કામખ્યા – હાવડા વંદે ભારત સ્લીપર
- ટ્રેન નંબર 27421 / 27422: વારાણસી – નવી દિલ્હી – વારાણસી વંદે ભારત સ્લીપર
- ટ્રેન નંબર 27651 / 27651: એસએમવીટી બેંગલુરુ – સીએસએમટી મુંબઈ – એસએમવીટી બેંગલુરુ વંદે ભારત સ્લીપર
ટિકિટ કેન્સલેશન અને રિફંડના નિયમો
જો કોઈ કારણસર મુસાફરે પોતાની કન્ફર્મ ટિકિટ રદ કરાવવી પડે, તો ભારતીય રેલવે દ્વારા સમયના આધારે રિફંડના ચોક્કસ નિયમો નક્કી કરવામાં આવ્યા છે.
જો ટ્રેન ઉપડવાના 72 કલાકથી વધુ સમય પહેલાં ટિકિટ કેન્સલ કરવામાં આવે, તો ભાડાના 25% રકમ કાપીને બાકીના 75% પરત આપવામાં આવે છે.
જો ટ્રેન ઉપડવાના 72 થી 8 કલાકની વચ્ચે ટિકિટ રદ થાય, તો 50% ચાર્જ કપાઈને બાકીની રકમ રિફંડ મળે છે.
જો કે, જો ટ્રેન ઉપડવાના 8 કલાકની અંદર ટિકિટ કેન્સલ કરાવવામાં આવે, તો એક પણ રૂપિયો રિફંડ તરીકે મળશે નહીં (100% રકમ જપ્ત થશે). તેથી મુસાફરોએ પ્રવાસનું આયોજન ખૂબ જ કાળજીપૂર્વક કરવું જરૂરી છે.