NEET UG 2026 Paper Leak: દેશની સૌથી મોટી તબીબી પ્રવેશ પરીક્ષા NEET-UG 2026 ના પ્રશ્નપત્ર લીક મામલે તપાસ એજન્સીઓએ એક મોટા આંતરરાજ્ય રેકેટનો પર્દાફાશ કર્યો છે. મહારાષ્ટ્રના નાસિકથી શરૂ થયેલા આ કૌભાંડના તાર હરિયાણા અને રાજસ્થાન સુધી ફેલાયેલા હોવાનું બહાર આવ્યું છે. આ કેસમાં કાર્યવાહી કરતા તપાસ એજન્સીઓએ જયપુરમાંથી મનીષ નામના મુખ્ય સૂત્રધારની ધરપકડ કરી છે, જેનાથી સમગ્ર દેશમાં ખળભળાટ મચી ગયો છે.
જણાવી દઈએ કે, NTA એ પેપર લીકના ગંભીર વિવાદો અને આક્ષેપોને ધ્યાનમાં રાખીને 3 મે, 2026 ના રોજ લેવાયેલી NEET UG (મેડિકલ પ્રવેશ પરીક્ષા) રદ કરવાનો મહત્વનો નિર્ણય લીધો છે. પરીક્ષાની વિશ્વસનીયતા જાળવી રાખવા માટે એજન્સીએ હવે આ સમગ્ર મામલાની તપાસ CBI ને સોંપી છે.
તપાસમાં ચોંકાવનારા ખુલાસા
તપાસ એજન્સીઓના જણાવ્યા અનુસાર, લીક થયેલા પ્રશ્નપત્રની પ્રથમ ડિજિટલ નકલ નાસિકમાં મળી આવી હતી. તપાસમાં બહાર આવ્યું છે કે મનીષ અને તેના સાથીદારો વાસ્તવિક પ્રશ્નપત્રો છાપવામાં આવે તે પહેલાં જ તેની ગુપ્ત માહિતી મેળવવામાં સફળ રહ્યા હતા. આ નેટવર્ક દ્વારા 'અનુમાન પેપર' (Guess Paper) ના નામે ચોક્કસ વિદ્યાર્થીઓને પરીક્ષાના ગણતરીના કલાકો પહેલા પ્રશ્નો પૂરા પાડવામાં આવ્યા હતા. આશ્ચર્યજનક બાબત એ છે કે આ અનુમાન પેપરના 100 થી વધુ પ્રશ્નો વાસ્તવિક NEET પરીક્ષાના પ્રશ્નો સાથે હૂબહૂ મળતા આવે છે.
આંતરરાજ્ય તપાસનો ધમધમાટ
રાજસ્થાન SOG, કેન્દ્રીય તપાસ એજન્સીઓ અને વિવિધ રાજ્યોની પોલીસ દ્વારા હાલ સંયુક્ત સર્ચ ઓપરેશન ચલાવવામાં આવી રહ્યું છે. તપાસની કડીઓ હવે હરિયાણા અને ઉત્તરાખંડ સુધી પહોંચી છે. એજન્સીઓએ શંકાસ્પદોના મોબાઇલ ફોન, લેપટોપ અને સોશિયલ મીડિયા એકાઉન્ટ્સની ફોરેન્સિક તપાસ શરૂ કરી છે. પ્રાથમિક અહેવાલો મુજબ, આ કૌભાંડમાં કેટલાક કોચિંગ સેન્ટરો, વચેટિયાઓ અને ટેકનિકલ નિષ્ણાતોની સંડોવણી હોવાની પ્રબળ શક્યતા છે.
NTA ની ભૂમિકા પર ઉઠતા સવાલો
શરૂઆતમાં National Testing Agency (NTA) દ્વારા પેપર લીકની તમામ અફવાઓને નકારી દેવામાં આવી હતી અને પરીક્ષા પ્રક્રિયા સુરક્ષિત હોવાનો દાવો કરવામાં આવ્યો હતો. જોકે, હવે જ્યારે મોટા પાયે પ્રશ્નોના મેચ થવાના પુરાવા સામે આવ્યા છે, ત્યારે NTA ની સુરક્ષા વ્યવસ્થા અને પારદર્શિતા પર ગંભીર સવાલો ઉભા થયા છે.
દેશભરમાં આક્રોશ અને ફરી પરીક્ષાની માંગ
આ ખુલાસા બાદ દેશભરના લાખો વિદ્યાર્થીઓ અને વાલીઓમાં ભારે રોષ જોવા મળી રહ્યો છે. સોશિયલ મીડિયા પર અને વિવિધ શહેરોમાં વિદ્યાર્થીઓ વિરોધ પ્રદર્શન કરી રહ્યા છે. વિદ્યાર્થીઓનો મુખ્ય સવાલ એ છે કે આટલી કડક સુરક્ષા હોવા છતાં પેપર લીક કેવી રીતે શક્ય બન્યું? હાલમાં મુખ્ય માસ્ટરમાઇન્ડની પૂછપરછ ચાલુ છે અને આ કેસમાં આગામી દિવસોમાં વધુ કેટલીક મોટી ધરપકડો થવાની શક્યતા છે.