CBI Chargesheet NEET Case: દેશભરમાં ભારે ચર્ચાસ્પદ બનેલા NEET-UG 2026 પેપર લીક કેસમાં સેન્ટ્રલ બ્યુરો ઓફ ઇન્વેસ્ટિગેશન (CBI) એ કાનૂની શિકંજો વધુ મજબૂત કર્યો છે. તપાસ એજન્સીએ બુધવારે દિલ્હીની રાઉસ એવન્યુ સ્થિત વિશેષ CBI કોર્ટમાં આ કેસના 14મા આરોપી શેષરાવ બજરંગ સૂર્યવંશી વિરુદ્ધ પૂરક ચાર્જશીટ દાખલ કરી છે. આ અગાઉ તપાસ એજન્સી દ્વારા આ જ ગંભીર ષડયંત્રમાં સામેલ અન્ય 13 મુખ્ય આરોપીઓ વિરુદ્ધ કોર્ટ સમક્ષ ચાર્જશીટ રજૂ કરી દેવામાં આવી હતી.
આરોપી શેષરાવ સૂર્યવંશીની ભૂમિકા અને તપાસ એજન્સીના દાવો
CBI ની તપાસમાં સામે આવેલા તથ્યો અનુસાર, આરોપી શેષરાવ બજરંગ સૂર્યવંશી આ કેસના અન્ય એક મુખ્ય આરોપી શુભમ ખૈરનારનો નજીકનો સહયોગી હતો. પેપર લીક રેકેટને અંજામ આપવા તેમજ પરીક્ષાર્થીઓ સુધી ગેરકાયદેસર રીતે પ્રશ્નપત્રો પહોંચાડવાના સમગ્ર નેટવર્કમાં સૂર્યવંશીએ મહત્વની ભૂમિકા ભજવી હોવાનો ચોંકાવનારો ખુલાસો થયો છે.
CBI દેશની સૌથી મોટી મેડિકલ પ્રવેશ પરીક્ષા NEET-UG 2026 માં થયેલી ગોટાળા અને પેપર લીકની ઘટનાની અત્યંત ઊંડાણપૂર્વક તપાસ કરી રહી છે. સૂર્યવંશી વિરુદ્ધ ચાર્જશીટ દાખલ થવાની સાથે જ હવે તમામ આરોપીઓ સામેની કાનૂની કાર્યવાહી વધુ ઝડપી બનશે.
કોર્ટનો નિર્દેશ: 22 ઓક્ટોબરે થશે મહત્વની સુનાવણી
વિશેષ CBI કોર્ટે ચાર્જશીટને રેકોર્ડ પર લેતા આ કેસની આગામી સુનાવણી 22 ઓક્ટોબરના રોજ નિયત કરી છે. આ સાથે જ અદાલતે તપાસ એજન્સીને નિર્દેશ આપ્યો છે કે આરોપી શેષરાવ સૂર્યવંશીને ચાર્જશીટ અને તેની સાથે જોડેલા દસ્તાવેજોની નકલ નિયમ મુજબ પૂરી પાડવામાં આવે.
NEET-UG પરીક્ષામાં ગેરરીતિ સામે આવ્યા બાદ દેશભરના લાખો વિદ્યાર્થીઓ અને વાલીઓમાં ભારે આક્રોશ જોવા મળ્યો હતો. કેન્દ્ર સરકારે સમગ્ર મામલાની ગંભીરતા જોઈને તપાસ CBI ને સોંપી હતી. હવે એક પછી એક આરોપીઓ વિરુદ્ધ સબળ પુરાવાઓ સાથે ચાર્જશીટ રજૂ થતાં દોષિતોને સજા અપાવવાની કાનૂની પ્રક્રિયા આખરી તબક્કામાં પહોંચી રહી છે.