Maharashtra News: મહારાષ્ટ્રના વસઈ-વિરાર વિસ્તારમાં સ્થિત લિંક રોડ પર આવેલી 'ઈમ્પીરિયલ ટાવર' (ઈમ્પીરિયલ હાઈટ્સ) નામની હાઈરાઈઝ બિલ્ડિંગના 8મા થી 10મા માળ વચ્ચે મંગળવારે રાત્રે ભીષણ આગ ફાટી નીકળી હતી. આ ઘટનામાં શોર્ટ સર્કિટ થયું હોવાની આશંકા વ્યક્ત કરવામાં આવી રહી છે.
15 લોકોને સુરક્ષિત બહાર કાઢવામાં આવ્યા
વસઈ-વિરાર સિટી મ્યુનિસિપલ કોર્પોરેશનના કમિશનર પૃથ્વીરાજ બી.પી.એ જણાવ્યું કે ઘટના અંગે રાત્રે આશરે 11:30 વાગ્યે માહિતી મળી હતી. આ જાણ થતાં જ ફાયર બ્રિગેડ, પોલીસ અને વહીવટી ટીમે તાત્કાલિક સ્થળ પર પહોંચીને રાહત અને બચાવ કામગીરી શરૂ કરી હતી.
બચાવ કામગીરી દરમિયાન 15 લોકોને સુરક્ષિત બહાર કાઢવામાં આવ્યા હતા, જ્યારે અન્ય ઘણા લોકો જાતે જ નીચે ઉતરી આવ્યા હતા. આ દુર્ઘટનામાં 60 વર્ષથી વધુ વયના એક વૃદ્ધ મહિલાનું મોત થયું હોવાના સમાચાર સામે આવી રહ્યા છે, પરંતુ તેની હજુ સુધી સત્તાવાર પુષ્ટિ થઈ નથી.
જીવ બચાવવા લોકો બિલ્ડિંગ બહાર લટક્યા
આગ એટલી તીવ્ર હતી કે કેટલાક લોકો પોતાના જીવ બચાવવા માટે ઇમારતના બહારના ભાગે લટકી ગયા હતા. બચાવ ટીમો દ્વારા તેમને ક્રેનની મદદથી સુરક્ષિત રીતે રેસ્ક્યુ કરવામાં આવ્યા હતા.