Murasu Cyclone Update: ચક્રવાતી તોફાન 'મુરાસુ' (Murasu) ની અસર હવે ધીમે ધીમે ઓછી થઈ રહી છે, પરંતુ તે નબળું પડી રહ્યું હોવા છતાં હજુ પણ દેશના કેટલાક ભાગોમાં નોંધપાત્ર તબાહી મચાવી રહ્યું છે. ભારતીય હવામાન વિભાગ (IMD) અનુસાર, આજે 4 નવેમ્બરના રોજ દેશના 13 રાજ્યોમાં તોફાન અને વરસાદ માટે વિશેષ ચેતવણી જારી કરવામાં આવી છે. આ તોફાનના કારણે દક્ષિણ ભારત સહિત અનેક વિસ્તારોમાં 90 કિમી પ્રતિ કલાકની ઝડપે તેજ પવન ફૂંકાવાની સાથે ગાજવીજ સાથે વરસાદ પડવાની સંભાવના છે.
આંધ્રપ્રદેશ અને દરિયાકાંઠાના વિસ્તારોમાં ભારે નુકસાનની આશંકા
હવામાન વિભાગે ભારે વરસાદને કારણે આંધ્રપ્રદેશના દરિયાકાંઠાના વિસ્તારોમાં વ્યાપક નુકસાન થવાની ચેતવણી આપી છે. તેજ પવન અને ભારે વરસાદના કારણે વૃક્ષોની ડાળીઓ તૂટી શકે છે તેમજ કેળા, પપૈયા અને સરગવા જેવા નાના છોડ મૂળમાંથી ઉખડી જવાની સંભાવના છે. આ ઉપરાંત બાગાયતી પાકો, ખેતરોમાં ઊભા પાકને નુકસાન થવાની સાથે મકાનો ધરાશાયી થવાનું જોખમ પણ રહેલું છે. પ્રતિકૂળ હવામાનને કારણે રેલ પરિવહન અને હેલિકોપ્ટર સેવાઓ પણ ભારે પ્રભાવિત થઈ શકે છે.
કયા 13 રાજ્યોમાં છે ભારે વરસાદનું એલર્ટ?
IMD ના જણાવ્યા અનુસાર, ચક્રવાતના પ્રભાવ હેઠળ આંધ્રપ્રદેશ, છત્તીસગઢ, મધ્યપ્રદેશ, ઓડિશા, ઝારખંડ, પશ્ચિમ બંગાળ, સિક્કિમ, કેરળ, કર્ણાટક, તેલંગાણા, લક્ષદ્વીપ અને અંદમાન-નિકોબાર ટાપુઓમાં મધ્યમથી ભારે વરસાદ પડી શકે છે. આ દરમિયાન પવનની ગતિ 40 થી 90 કિમી પ્રતિ કલાકની વચ્ચે રહી શકે છે.
દિલ્હી-NCRનું હવામાન:
આજે 4 નવેમ્બરના રોજ દિલ્હીમાં આકાશ મોટે ભાગે સ્વચ્છ રહેશે, જોકે સવારના સમયે હળવું ધુમ્મસ કે ઝાંખપ જોવા મળી શકે છે. અહીં મહત્તમ તાપમાન 27 થી 29 ડિગ્રી સેલ્સિયસ અને લઘુત્તમ તાપમાન 14 થી 16 ડિગ્રી સેલ્સિયસની વચ્ચે રહેવાની શક્યતા છે. બપોરના સમયે ઉત્તર-પશ્ચિમ દિશાથી ફૂંકાતા પવનની ગતિ 20 કિલોમીટર પ્રતિ કલાક સુધી પહોંચી શકે છે. આગામી 5 અને 6 નવેમ્બરે પણ વાતાવરણ મુખ્યત્વે સ્વચ્છ રહેશે.
ઉત્તર પ્રદેશ અને બિહારનું હવામાન:
આ બંને રાજ્યો પર 'મુરાસુ' ચક્રવાતની અસર નહિવત રહી છે. આજે 4 નવેમ્બરે યુપી અને બિહારમાં હવામાન સંપૂર્ણપણે સામાન્ય અને સૂકું રહેશે. વરસાદની કોઈ ચેતવણી નથી. તાજેતરના વરસાદ બાદ સવાર અને સાંજ દરમિયાન ગુલાબી ઠંડીનો અહેસાસ થઈ રહ્યો છે.
આંધ્રપ્રદેશ અને યાનમનું હવામાન:
ચક્રવાત નબળું પડીને 'ડીપ ડિપ્રેશન'માં ફેરવાયું છે, જેના કારણે 4 નવેમ્બરે દરિયાકાંઠાના વિસ્તારો અને યાનમમાં ખૂબ ભારે વરસાદની શક્યતા છે. આ ઉપરાંત 5 થી 9 નવેમ્બર દરમિયાન રાયલસીમા અને આસપાસના વિસ્તારોમાં છૂટોછવાયો વરસાદ ચાલુ રહેશે.
તમિલનાડુ, પુડુચેરી અને કરાઈકલનું હવામાન:
આ ક્ષેત્રોમાં 5 થી 8 નવેમ્બર દરમિયાન વરસાદી ગતિવિધિઓ જોવા મળશે, જ્યારે 3 થી 7 નવેમ્બર દરમિયાન તેજ પવનો ફૂંકાશે.
કેરળ અને માહેનું હવામાન:
4 થી 8 નવેમ્બર દરમિયાન વ્યાપક વરસાદની આગાહી છે, જેમાં 4 નવેમ્બરે કેટલાક સ્થળોએ ભારે વરસાદ પડી શકે છે.
ઓડિશા અને ઝારખંડનું હવામાન:
ઓડિશામાં 3 થી 7 નવેમ્બર દરમિયાન વિવિધ તબક્કામાં વરસાદ પડવાની સંભાવના છે. દક્ષિણ ઓડિશાના માલકાનગિરી, કોરાપુટ, રાયગડા, ગજપતિ અને ગંજામ જિલ્લાઓમાં પ્રતિકૂળ હવામાન જોવા મળ્યું છે. ઝારખંડના કેટલાક વિસ્તારોમાં પણ પવન સાથે વરસાદની સંભાવના વ્યક્ત કરવામાં આવી છે.