Murasu Cyclone Update: ભારતીય હવામાન વિભાગ (IMD)અનુસાર બંગાળની ખાડી પર બનેલું ડીપ ડિપ્રેશન હવે વધુ તીવ્ર બનીને "મુરાસુ" (Murasu) વાવાઝોડામાં પરિવર્તિત થઈ ગયું છે. આ વાવાઝોડાને લઈને તંત્ર દ્વારા હાઈ એલર્ટ જારી કરવામાં આવ્યું છે.
વાવાઝોડાની વર્તમાન સ્થિતિ અને ગતિ
1 નવેમ્બર, 2026ના રોજ 11-30 કલાકે આ ચક્રવાતી વાવાઝોડું દક્ષિણ-પશ્ચિમ અને પશ્ચિમ-મધ્ય બંગાળની ખાડી પર કેન્દ્રિત હતું, જે ચેન્નઈથી આશરે 560 કિમી પૂર્વ-અગ્નિ દિશામાં હતું. હવામાન વિભાગના જણાવ્યા અનુસાર, આ વાવાઝોડું પશ્ચિમ-ઉત્તરપશ્ચિમ તરફ આગળ વધીને 2 નવેમ્બરની સવાર સુધીમાં 'ગંભીર ચક્રવાતી વાવાઝોડા' (Severe Cyclonic Storm)માં ફેરવાઈ જશે. તે 2 નવેમ્બરની મધરાત્રિથી 3 નવેમ્બરની વહેલી સવાર દરમિયાન આંધ્રપ્રદેશના દરિયાકાંઠાને નેલ્લોર અને નરસાસુર વચ્ચે પાર કરશે. આ સમયગાળા દરમિયાન પવનની ઝડપ 100 થી 110 કિમી પ્રતિ કલાક અને ક્યારેક 120 કિમી પ્રતિ કલાક સુધી પહોંચવાની શક્યતા છે.
વિવિધ રાજ્યોમાં વરસાદની વ્યાપક ચેતવણી
આ વાવાઝોડાની અસરને કારણે અનેક રાજ્યોમાં ભારેથી અત્યંત ભારે વરસાદ પડવાની સંભાવના છે.
કોસ્ટલ આંધ્રપ્રદેશ અને યાનમ: 1 નવેમ્બરે છૂટાછવાયા સ્થળોએ ભારે વરસાદ તથા 2 થી 3 નવેમ્બર દરમિયાન ભારેથી અત્યંત ભારે વરસાદ પડવાની ચેતવણી છે.
તમિલનાડુ અને પુડુચેરી: 2 અને 3 નવેમ્બરે કેટલાક સ્થળોએ ભારેથી અતિ ભારે વરસાદની સંભાવના છે.
ઓડિશા અને અન્ય રાજ્યો: દક્ષિણ ઓડિશામાં 2 નવેમ્બરે હળવાથી મધ્યમ અને 3 થી 4 નવેમ્બરે ભારેથી અતિ ભારે વરસાદ પડશે. આ ઉપરાંત, તેલંગાણા, રાયલસીમા (Rayalaseema) અને છત્તીસગઢના કેટલાક વિસ્તારોમાં પણ 2 થી 4 નવેમ્બર દરમિયાન ભારે વરસાદની આગાહી કરવામાં આવી છે.
પવનની ગતિ અને દરિયાની તોફાની સ્થિતિ
આંધ્રપ્રદેશ, ઉત્તર તમિલનાડુ અને પુડુચેરીના દરિયાકાંઠે પવનની ઝડપ ક્રમશઃ વધતી જશે અને તે ભારે ગેલ વિન્ડમાં ફેરવાશે. દરિયાની સ્થિતિ અત્યંત તોફાની રહેશે અને મોજાંની ઊંચાઈ 9 થી 14 મીટર સુધી ઊંચી જઈ શકે છે. ખાસ કરીને દક્ષિણ આંધ્રપ્રદેશના નીચાણવાળા વિસ્તારોમાં (જેમાં બાપાટલા, કૃષ્ણા અને પ્રકાશમ જિલ્લાઓનો સમાવેશ થાય છે) દરિયાનું પાણી આશરે 1 મીટર જેટલું કિનારા પર (Storm Surge) ચડી જવાની સંભાવના છે.
સંભવિત નુકસાન અને નાગરિકો માટે સલામતીના પગલાં
વાવાઝોડાને કારણે કાચા ઘરના છાપરાં ઉડી જવા, ઝાડ અને વીજળીના ખાંભલા ઉખડી જવા, પાકને વ્યાપક નુકસાન થવા તથા રસ્તાઓ અને નીચાણવાળા વિસ્તારોમાં પાણી ભરાવાની પૂરી શક્યતા છે. આ સ્થિતિને ધ્યાનમાં રાખીને તંત્ર દ્વારા નીચે મુજબના સાવચેતીના પગલાં સૂચવવામાં આવ્યા છે-
માછીમારો માટે પ્રતિબંધ: માછીમારોને દક્ષિણ-પૂર્વ, દક્ષિણ-પશ્ચિમ અને પશ્ચિમ-મધ્ય બંગાળની ખાડી તેમજ આંધ્રપ્રદેશ, ઓડિશા અને તમિલનાડુના દરિયાકાંઠે 4 નવેમ્બર સુધી જવાની સખત મનાઈ ફરમાવવામાં આવી છે.
સુરક્ષા અને સ્થળાંતર: દરિયાકાંઠાના ઝૂંપડપટ્ટી અને જોખમી વિસ્તારોમાં રહેતા લોકોને સુરક્ષિત સ્થળોએ ખસેડવામાં આવી રહ્યા છે. લોકોને બિનજરૂરી મુસાફરી ટાળવા અને ઘરમાં જ રહેવા અપીલ કરવામાં આવી છે.