Mumbai BMW Car Accident: મુંબઈના કોસ્ટલ રોડ પર રવિવારની સવારે એક અત્યંત રોમાંચક અને હૃદયદ્રાવક અકસ્માતની ઘટના સામે આવી છે. પૂરઝડપમાં દોડતી એક લક્ઝરી BMW કાર અચાનક અનિયંત્રિત થઈને પુલ પરથી નીચે કન્સ્ટ્રક્શન સાઇટ પર તૂટી પડી હતી. આ ગમખ્વાર અકસ્માતમાં ડ્રાઇવર સહિત ત્રણ યુવકોના ઘટનાસ્થળે જ કમકમાટીભર્યા મોત નીપજ્યા છે, જ્યારે એક યુવક ગંભીર રીતે ઘાયલ થયો છે.
કેમેરામાં કેદ થઈ કાળઝાળ દુર્ઘટના
પ્રાપ્ત માહિતી અનુસાર, આ દુર્ઘટના 20 સપ્ટેમ્બર, 2026ના રોજ વહેલી સવારે અંદાજે 5 વાગ્યાની આસપાસ બની હતી. આ ભયાનક અકસ્માતનો લાઈવ સીસીટીવી (CCTV) ફૂટેજ પણ સામે આવ્યો છે, જેમાં જોઈ શકાય છે કે ફુલ સ્પીડમાં આવી રહેલી કાર પુલની રેલિંગ તોડીને હવામાં પલટી ખાતી ખાતી સીધી નીચે કન્સ્ટ્રક્શન સાઇટ પર પટકાઈ હતી. અકસ્માત એટલો જોરદાર હતો કે કારના સ્પેરપાર્ટ્સ દૂર સુધી છૂટા પડી ગયા હતા અને કારનો કૂચડો બોલી ગયો હતો.
ઓવરસ્પીડ બની જીવલેણ
પોલીસ સૂત્રોના જણાવ્યા અનુસાર, આ ઘટના મુંબઈના લાલા લજપાત રાય કોલેજની સામે લોટસ જેટી પાસે બની હતી. કાર મરીન ડ્રાઇવથી હાજી અલી તરફ જઈ રહી હતી. તે દરમિયાન વધુ પડતી સ્પીડ હોવાને કારણે ડ્રાઇવરે કાર પરથી કાબૂ ગુમાવ્યો હતો અને કાર સીધી નીચે ખાબકી હતી. આ ગંભીર દુર્ઘટનાની જાણ થતાં જ પોલીસ અને બચાવ ટુકડી તાત્કાલિક ઘટનાસ્થળે દોડી આવી હતી અને ઘાયલોને તાત્કાલિક નજીકની હોસ્પિટલ ખસેડવામાં આવ્યા હતા, જ્યાં ડૉક્ટરોએ ત્રણ યુવકોને મૃત જાહેર કર્યા હતા.
ભોગ બનનાર યુવકોની ઓળખ
આ કરુણ અકસ્માતમાં જીવ ગુમાવનાર અને ઘાયલ થયેલા યુવકોની ઓળખ થઈ ચૂકી છે:
- સનાય ગુજર (ઉંમર 21 વર્ષ): જે તે સમયે કાર ચલાવી રહ્યો હતો.
- આદિત્ય ઓસવાલ (ઉંમર 20 વર્ષ): (આ દુર્ઘટનામાં એકમાત્ર જીવિત બચેલો યુવક).
- આદિત્ય જકસનિયા (ઉંમર 19 વર્ષ).
- એક 17 વર્ષીય સગીર કિશોર.
ગુજરાત સાથે છે કનેક્શન
મળતી માહિતી મુજબ, અકસ્માતનો ભોગ બનેલા આ તમામ યુવકો મૂળ ગુજરાતના અમદાવાદના વતની હતા. તેઓ મુંબઈના જુહુ વિસ્તારમાં આવેલા જાણીતા એન.એમ.આઈ.એમ.એસ. (NMIMS) કોલેજમાં અભ્યાસ કરતા હતા અને મુંબઈમાં પેઈંગ ગેસ્ટ (PG) તરીકે રહેતા હતા. શનિવારની રાત્રે તેઓ મુંબઈ મરીન ડ્રાઇવ ફરવા ગયા હતા અને પરત ફરતી વેળાએ આ કાળમુખો અકસ્માત નડ્યો હતો.
આ અકસ્માતના પગલે મુંબઈમાં રહેતા પીડિતોના સગા-સંબંધીઓ તાત્કાલિક હોસ્પિટલ દોડી આવ્યા હતા, જ્યારે ગુજરાતથી મૃતકોના માતા-પિતા અને પરિવારજનો પણ મુંબઈ જવા રવાના થઈ ગયા છે. મુંબઈ પોલીસે આ મામલે ગુનો નોંધીને અકસ્માત પાછળના ચોક્કસ કારણો જાણવા માટે વધુ તપાસ હાથ ધરી છે.