Manipur Kangpokpi Firing: મણિપુરના કાંગપોકપી જિલ્લામાં ગુરુવારે શંકાસ્પદ ઉગ્રવાદીઓના બે જૂથો વચ્ચે થયેલા ભીષણ ગોળીબારમાં કુકી સમુદાયની એક મહિલાનું કરૂણ મૃત્યુ થયું છે, જ્યારે અન્ય બે વ્યક્તિઓ ગંભીર રીતે ઘાયલ થયા છે. આ ઘટના બાદ સ્થાનિક કુકી સંગઠને જિલ્લામાં 48 કલાકના સંપૂર્ણ બંધનું એલાન આપ્યું છે. સંગઠને સુરક્ષા દળો નાગરિકોની સુરક્ષા કરવામાં નિષ્ફળ રહ્યા હોવાનો આક્ષેપ કરીને જિલ્લામાંથી તમામ સુરક્ષા દળોને પાછા ખેંચવાની માંગ કરી છે.
ખેતરમાં કામ કરતી મહિલાને વાગી ગોળી
અધિકારીઓના જણાવ્યા અનુસાર, કાંગપોકપી જિલ્લાના તાફોઉ કુકી ગામ અને પડોશી સેનાપતિ જિલ્લાના કૈલેંગજાંગ નજીક પ્રતિસ્પર્ધી ઉગ્રવાદી જૂથો વચ્ચે ગોળીબાર શરૂ થયો હતો. આ ગોળીબાર દરમિયાન, તાફોઉ કુકી ગામની રહેવાસી કે. ચોંગલોઈ જ્યારે પોતાના ખેતરમાં કામ કરી રહી હતી ત્યારે તેને અચાનક ગોળી વાગી હતી, જેના કારણે તેનું ઘટનાસ્થળે જ મોત નીપજ્યું હતું. આ હુમલામાં એસ. ડેવિડ ચોંગલોઈ અને લામખોચોન ચોંગલોઈ પણ ઘાયલ થયા છે, જેમણે તાત્કાલિક હોસ્પિટલમાં દાખલ કરવામાં આવ્યા છે.
ઘટનાને પગલે વિસ્તારમાં CRPF, BSF અને આસામ રાઈફલ્સના વધારાના જવાનોને તૈનાત કરવામાં આવ્યા છે. સુરક્ષા દળો દ્વારા સર્ચ ઓપરેશન હાથ ધરવામાં આવતા સ્થાનિક રહેવાસીઓ—ખાસ કરીને મહિલાઓએ—વિરોધ કરીને દળોને ગામમાં પ્રવેશતા રોકવાનો પ્રયાસ કર્યો હતો. ઉલ્લેખનીય છે કે તાજેતરમાં જ તાફોઉ કુકી ગામના બે યુવાનો ગુમ થયા બાદ 1 નવેમ્બરે તેમના મૃતદેહો મળી આવ્યા હતા, જેને લઈને 'કમિટી ઓન ટ્રાઇબલ યુનિટી' (CoTU) દ્વારા અગાઉથી જ વિરોધ પ્રદર્શન કરવામાં આવી રહ્યું છે.
અન્ય હિંસા અને ડ્રગ્સ જપ્તીની કાર્યવાહી
અલગ ઘટનામાં, ઉખરુલ જિલ્લાના સિનાકેઇથેઇ નજીક ડાંગરની કાપણી કરી રહેલા ખેડૂતો પર શંકાસ્પદ ઉગ્રવાદીઓએ ગોળીબાર કર્યો હતો, જેમાં એક વ્યક્તિ ઇજાગ્રસ્ત થઈ છે. બીજી તરફ, ચુરાચંદપુર જિલ્લામાં સુરક્ષા દળોએ હથિયારો અને દારૂગોળાનો મોટો જથ્થો જપ્ત કર્યો છે, જેમાં 10 ફૂટ લાંબો રોકેટ, ચીનમાં બનેલા ચાર મોર્ટાર અને છ આઈઈડી (IEDs) સામેલ છે. ઉપરાંત, કાંગપોકપીમાં એક પેસેન્જર બસમાંથી 1.147 કિલોગ્રામ મેથામ્ફેટામાઇન પણ જપ્ત કરવામાં આવ્યો છે.
મુખ્યમંત્રી દ્વારા સમિતિની રચનાની જાહેરાત
દરમિયાન, મણિપુરના મુખ્યમંત્રી યુમનામ ખેમચંદ સિંહે જાહેરાત કરી છે કે રાજ્ય સરકાર તમામ સમુદાયોનું પ્રતિનિધિત્વ કરતી એક વિશેષ સમિતિની રચના કરશે. વડાપ્રધાન નરેન્દ્ર મોદી સાથે નવી દિલ્હીમાં થયેલી બેઠક અને વિવિધ સમુદાયો વચ્ચે સુમેળભર્યું વાતાવરણ કેળવવાના ઉદ્દેશ્યથી આ પગલું લેવામાં આવ્યું છે. સરકાર આ સમગ્ર કેસને નેશનલ ઇન્વેસ્ટિગેશન એજન્સી (NIA) ને સોંપવા અંગે પણ વિચારણા કરી રહી છે.