Jantar Mantar Protest Ban: દિલ્હી હાઈકોર્ટમાં જંતર-મંતરને શાંતિપૂર્ણ વિરોધ પ્રદર્શનો માટે બંધ કરી દેવાના પગલા સામે એક અરજી દાખલ કરવામાં આવી છે. આ નિર્ણયથી નાગરિકોના અભિવ્યક્તિની સ્વતંત્રતાના અધિકારને સીમિત કરવામાં આવી રહ્યો હોવાનો ગંભીર આરોપ લગાવતા અરજદારે અરજી કરી છે.
અભિવ્યક્તિની આઝાદી અને બીજી જગ્યાનો અભાવ
અદાલતમાં રજૂઆત કરતા એડવોકેટે જણાવ્યું હતું કે, જંતર-મંતરને બંધ કરી દેવામાં આવ્યું છે અને કાયદા મુજબ વિરોધ પ્રદર્શન કરવા માટે કોઈ અન્ય વૈકલ્પિક જગ્યા પણ નક્કી કરવામાં આવી નથી. અરજીમાં ભારપૂર્વક કહેવામાં આવ્યું છે કે, આ સમગ્ર બાબત નાગરિકોના અભિવ્યક્તિની આઝાદીના મૂળભૂત અધિકારને મર્યાદિત કરવા સાથે જોડાયેલી છે.
આ પણ વાંચો
શાંતિપૂર્ણ વિરોધ પ્રદર્શન માટે જંતર-મંતરને બંધ કરવા સામેની આ અરજી અંગે એક એડવોકેટે દિલ્હી હાઈકોર્ટના કાર્યવાહક મુખ્ય ન્યાયાધીશ નીતિન વાસુદેવ સામ્બ્રેની ખંડપીઠ સમક્ષ મામલાનો ઉલ્લેખ કર્યો હતો. જોકે, આ બાબતે કાર્યવાહક મુખ્ય ન્યાયાધીશ નીતિન વાસુદેવ સામ્બ્રેની ખંડપીઠે સ્પષ્ટ કર્યું કે, આ મામલાને 13 ઓક્ટોબર, મંગળવારે સુનાવણી માટે સૂચિબદ્ધ કરવામાં આવશે.
'સુપ્રીમ કોર્ટ પણ આ મામલાની સુનાવણી કરી રહી છે'
જ્યારે એડવોકેટે આ મામલે આજે જ સુનાવણી કરવા માટે જરૂરી નિર્દેશ આપવાની માંગ કરી, ત્યારે ખંડપીઠે ટિપ્પણી કરતા કહ્યું કે "કૃપા કરીને સમજવાનો પ્રયાસ કરો, સુપ્રીમ કોર્ટ પણ આ મામલાને જોઈ રહી છે."ખંડપીઠે વધુમાં ઉમેર્યું હતું કે, સુપ્રીમ કોર્ટે આ વિષય પર કેન્દ્ર સરકાર પાસેથી એફિડેવિટ (હલફનામું) પણ દાખલ કરવા માટે કહ્યું છે. તેથી જ્યારે સર્વોચ્ચ અદાલત પોતે આ મામલાની સુનાવણી કરી રહી હોય, ત્યારે હાઈકોર્ટ આના પર કઈ હદ સુધી વિચાર કરી શકે છે.